वोट देवां जिब राखते हम सही गलत का ध्यान नहीं ॥

 चमेली पड़ौस की महिलाओं के बीच दोपहर को बात करती है । 

सभी महिलाएं महंगाई के बारे में बताती हैं । लैक्सन आगे पर महंगाई फेर 

बी कम नहीं हुई । चमेली क्या कहती है ----

वोट देवां  जिब राखते हम सही गलत का ध्यान नहीं ॥ 

नाश करैंगे वे नेता जिनकै धोरै आज ईमान नहीं ॥ 

1

नजर घुमा कै देख लियो नित पेड़ झूठ का फलै सै 

सच का तेल घलै दीवे मैं तो यो ज्ञान उजाला जलै सै 

सच के दायरे मैं रहकै मन नहीं हिलाया हिलै सै 

सच पै खड्या रहवै उसनै दिलां मैं जगां मिलै सै 

विचार करै बुद्धि चेतन बिन चेतन मिलै ज्ञान नहीं ॥ 

नाश करैंगे वे नेता जिनकै धोरै आज ईमान नहीं ॥ 

2

भगत सिंह का नाम सुण्या धूम मचाई हिन्द म्हारे मैं 

तेईस बरस का फांसी चढग्या सोचो कदे इस बारे मैं 

सुणो आसान बात नहीं होती या ज्यान देनी आरे मैं 

घर बार कति छोड़ दिया उसनै देश के प्रेम इशारे मैं  

म्हणत करकै दौलत पैदा करां समझे जां इंसान नहीं ॥ 

नाश करैंगे वे नेता जिनकै धोरै आज ईमान नहीं ॥ 

3

साच्ची बात कहूँ थारे तैं हम सच्चाई मंजूर करावैं 

हाथ जोड़ कहूँ थारे तैं सच का साथ जरूर निभावैं

सच्चाई पै चलना चाहिए सच्चाई का घर दूर बतावैं 

बनावटी मिलावटी की जागां इंसानियत का नूर खिलावैं

सच्चा सौदा ए बिकवावेंगे झूठ की चलै दुकान नहीं ॥ 

नाश करैंगे वे नेता जिनकै धोरै आज ईमान नहीं ॥ 

4

वो मानस ना किसे काम का जो सच पै सिर धुनै नहीं 

अपनी कमाई का हिसाब वो बैठ कै कदे बी गिनै नहीं 

वोहे मानस सदा सुख पावै सै जो बात झूठी सुनै नहीं 

आज जो ठीक नहीं वो उस परम्परा का जाल बुनै नहीं 

छुआछात की जो बात करै वो इंसान की संतान नहीं ॥

नाश करैंगे वे नेता जिनकै धोरै आज ईमान नहीं ॥