म्हारी ये कौन नाक कटावैं ना उनकी चाल जाणी क्यों

 नया हरियाणा

म्हारी ये कौन नाक कटावैं ना उनकी चाल जाणी क्यों

व्यभिचारी भ्रष्टाचारी ये बोलें नैतिकता की बाणी क्यों

पुलिसिया बीस रपिये लेले उसकी चर्चा अखबार पुकारैं

ऊंचे महलां होज्यां सौदे करोड़ों कमीशन बदकार डकारैं

शरीफ खड़े लाचार निहारैं जनता जाणै ना कहाणी क्यों

भ्रष्टाचार बलात्कार रिश्वत खोरी ये फण सैं व्यवस्था के

नैतिकता की बात करैं वे जो चाकर इसी व्यवस्था के

अमीर मालिक व्यवस्था के गरीब की कुन्बा घाणी न्यों

गरीब हकां की लड़ै लड़ाई लड़कै व्यवस्था नै बदलांगे

गरीब अमीर की चौड़ी खाई राज व्यवस्था का समझांगे

पासा रलमिल पलटांगे पाळां इसी नागण काली क्यों

पीस्से आले इजारेदार नै म्हारी सरकार बढ़ावै लोगो

तब दिली करकै कानूनां मैं इनकी टहल बजावै लोगो

बहुराष्ट्रीय कम्पनी ल्यावै लोगो देखै ना म्हारी हाणी क्यों

छोटी पूंजी मेहनत मिलकै बड़ी पूंजी तैं हम टकरावांगे

किसान मजदूर दूकानदार सब मिल यो नारा लावांगे

यो नया हरियाणा बनावांगे रणबीर बीमारी पिछाणी न्यों

ranbir dahiya

यो सी ए ए के बला सै?

 कमलू -- रमलू

कमलू-- रै रमलू ! यो सी ए ए के बला सै?

रमलू- यो सिटीजन अमेंडमेंट एक्ट ( नागरिकता संशोधन अधिनियम ) का छोटा नाम सै कमलू

कमलू-- यो नागरिकता अधिनियम कद बनाया था रमलू?

रमलू-- न्यों कहैं सैं अक यो 1955 मैं बनाया था।

कमलू-- इस संशोधन तैं पहलम भी कोये संशोधन होए थे इसमैं?

रमलू--हाँ ! यो पांचवां संशोधन बतावैं सैं ।

कमलू-- पहले चार संशोधन कुणसे थे रमलू?

रमलू-- भाई उनका तो मनै बेरा कोण्या। किसे भाई नै बेरा होगा तो बतावैगा।

कमलू-- तो यो पांचवां संशोधन के सै?

रमलू-- इस संशोधन के द्वारा अफगानिस्तान,  पाकिस्तान और बंगलादेश इन तीन देशां तैं 31 दिसंबर 2014 तैं पहले भारत मैं प्रवेश करे औड़ हिंदुओं, सिखों, बौद्धों, जैनियों, पारसियों और ईसाईयों नै अवैध आप्रवासी नहीं मान्या जागा बल्कि उन ताहिं भारतीय नागरिकता दी जावैगी।

कमलू-- इसमैं तो कई पड़ौसी देश छोड़ दिये। ये बस तीन देश क्यूँ? अर जै इन देशां मैं कोये दुखी पीड़ित मुसलमान हो तै उसका के बनैगा?

रमलू--ये बात बूझिये उन नेतावां धोरै जिणनै यो संशोधन करया सै।

नौंजवानों का हाल सुनाऊं, साच्ची बात ना झूठ भकाऊं,

 हरियाणा के युवाओं -लड़के

और लड़कियों की मेहनत ने
हरयाणा नम्बर वन बनाया ,
मगर हमने युवाओं को कहां पहुंचाया?
क्या बताया भला--
नौंजवानों का हाल सुनाऊं,
साच्ची बात ना झूठ भकाऊं,
बिना नौकरी दुखी दिखाऊं ,
के होगा इस हरियाणे का।।
बेरोजगारी बढ़ती जावै सै,
शिक्षा महंगी होंती आवै सै,
युवक युवती हाँडै खाली,
खत्म हुई चेहरे की लाली,
नशे नै कसूती घेरी घाली,
के होगा इस हरियाणे का।।
छोटा मोटा ठेके का काम यो,
ठेकेदार खींचै म्हारा चाम यो,
तनखा मिलती घणी थोड़ी,
मालिक बणे हाँडै करोड़ी,
काम नै म्हारी कड़ तोड़ी,
के होगा इस हरियाणे का ।
बेरोजी नै युवा रूआया रै,
संकट सिर ऊपर छाया रै
नशे का पैकेज ल्याये देखो ,
युवा इसमें फँसाये देखो,
अंधविश्वासी बनाये देखो,
के होगा इस हरियाणे का।
मजबूत संगठन बनाना हो
संघर्ष मिलकै चलाना हो
सोचां युवा युवती सारे रै,
कैसे क्लेश मिटेंगे महारे रै,
छोड़ जात पात के नारे रै ,
फेर कुछ होगा हरियाणे का ।