आंगनवाड़ी की आत्म कथा

 आंगनवाड़ी की आत्म कथा 

आंगनवाड़ी मैं काम क रूं आप बीती बताऊं बेबे ।।

काम घणा करना होसै  तंनखा नाम की पाऊं बेबे ।।

1

मां और बच्चों की सेवा का केंद्र आंगनवाड़ी बताया 

कुपोषण तैं निपटने का यो ग्रामीण केंद्र बनाया

 उन्नीस सौ पिचासी मैं सरकार ने प्रोग्राम चलाया 

आंगन आश्रय भी कहदें यो हिंदुस्तान में फैलाया 

सार्वजनिक स्वास्थ्य का बुनियादी ढांचा सुनाऊं बेबे ।।

काम घणा करना होसै  तंनखा नाम की पाऊं बेबे ।।

2

गांव की महिला नै गर्भ निरोधक परामर्श देती 

इनकी सप्लाई करने का जिम्मा अपने जीमै लेती 

सेफ पीरियड के बारे मैं बैठ बात करैं मेरे सेती 

कई सुना कै अपना दुखड़ा रो रो के आंख भेती

 जी करड़ा कर कै नै उन ताहिं सारी समझाऊं बेबे ।।

काम घणा करना होसै  तंनखा नाम की पाऊं बेबे ।।

3

और कामां की गेल्यां सै यो पोषण शिक्षा का जिम्मा मेरा 

खून की कमी कइया मैं चालती हाण आवै अंधेरा

खाने पीने मैं के खाना कईयां नै ना इसका बेरा 

बाल कुपोषित मां का पीला पड़ता आवै चेहरा

के खाना पीना चाहिए कई कई घंटे लाऊं बेबे ।।

काम घणा करना होसै  तंनखा नाम की पाऊं बेबे ।।

4

सतरां रजिस्टर मेरे पास बात जरे कोन्या थारे

 बुनियादी दवाई भी देना कई काम जिम्मे म्हारे 

टीकाकरण की जिम्मेदारी घर-घर घूमैं सारे

छोटे बालकां नै पढ़ाऊं कामां का बोझ मनै मारे 

रणबीर और भी काम घने ये किसनै बताऊं बेबे।।

काम घणा करना होसै  तंनखा नाम की पाऊं बेबे ।।

देश पै खतरा मंडरावै लडां आजादी बचाने की लड़ाई।।

 आजादी

देश पै खतरा मंडरावै लडां आजादी बचाने की लड़ाई।।

इसकी खातर ज्यान झोंकी हक म्हारा आजादी बताई।।

1

पूरे देश मैं फैल रहया खतरा यो मनुवाद का बताया 

चलता आवै खतरा देश मैं इबै सामंतवाद का बताया 

बढ़ता जावै सै शिकंजा  आज पूंजीवाद का बताया 

इन सब तैं बड्डा खतरा गया साम्राज्यवाद का बताया

संविधान नै पूरा खतरा आजादी इन खतरों तैं चाही।।

इसकी खातर ज्यान झोंकी हक म्हारा आजादी बताई।।

2

एक खतरा और बताया सै यो हिंदुत्ववाद का सुनियो

दूजा खतरा और छाया सै  तालिबानवाद का सुनियो

तीजा खतरा और दिखाया सै यो संघवाद का सुनियो

चौथा खतरा समझाया सै यो आतंकवाद का सुनियो

इन खतरयां तैं मिलकै या आजादी की आवाज लगाई।।

इसकी खातर ज्यान झोंकी हक म्हारा आजादी बताई।।

3

पितृ सत्ता बड़ी बीमारी इसतैं भी आजादी चाहिए सै

भ्रूण हत्या उधम मचारी इसतैं भी आजादी चाहिये सै

दहेज का उत्पीड़न भारी इसतैं भी आजादी चाहिए सै

बेरोजगारी बढ़ती जारी इसतैं भी आजादी चाहिए सै

आर्थिक संकट बढ़ता जावै इसकी बात गई छिपाई।।

इसकी खातर ज्यान झोंकी हक म्हारा आजादी बताई।।

4

हिदू राष्ट्र तैं आजादी हो यो सबका ही भाई चारा हो

इस्लामी राष्ट्र तैं आजादी हो पूरी दुनिया का नारा हो

जातपात से आजादी हो चाहवै अम्बेडकर म्हारा हो

अभिव्यक्ति की आजादी हो सबनै संविधान प्यारा हो

रणबीर बनती जावै सै नबै दस की पालेबन्दी भाई।।

इसकी खातर ज्यान झोंकी हक म्हारा आजादी बताई।।

महिला पलटन --90 ---

 महिला पलटन 

आई एन ए मैं भर्ती होकै बनाई महिला पलटन न्यारी।।

लक्ष्मी सहगल बनी कमांडर दी अंग्रेजों को किलकारी।।

1

भारत आजाद कराऊं जरूरी सहगल नै मन मैं धार लिया

फिरंगी हमारा भारत छोड़ो सारी दुनिया मैं प्रचार किया

आजाद हिंद फौज बोस की अलग से पलटन तैयार किया

तोप गोले बन्दूक चलाई रणचण्डी सा फेर सिंगार किया

वही लक्ष्मी सहगल देखी मोर्चे पर आगै बढ़ती जारी।।

लक्ष्मी सहगल बनी कमांडर दी अंग्रेजों को किलकारी।।

2

गोरे गए आजादी आयी सपने खूब सजाए हमनै भाई

मेहनत करी बहोत देखो अपने डेम बनाये हमनै भाई

रामधन सिंह जिसे विज्ञानी अपने बीज उगाए हमनै भाई

खान फैक्ट्री और खेतों मैं अपने शरीर खपाये हमनै भाई

लक्ष्मी सहगल पूछ रही है दे दी किसनै आज बुहारी।।

लक्ष्मी सहगल बनी कमांडर दी अंग्रेजों को किलकारी।।

3

खेत खलिहान और सड़कों पर औरत खूब सताई जाती

दहेज अच्छा नहीं मिल्या सै यों हर रोज जलाई जाती

जुल्म की हद नहीं कोये जबरी फांसी चढ़ाई जाती

नँगी तस्वीरें फूहड़ गाने ऐसी ये फ़िल्म बनाई जाती

जीना सै तो लड़ना सीखो क्यों बनी बैठी हो बेचारी।।

लक्ष्मी सहगल बनी कमांडर दी अंग्रेजों को किलकारी।।

4

महिला के हकों की खातिर लड़ने का बीड़ा उठाया है

सबको इकट्ठा करने खातिर संगठन सही बनाया है

इकट्ठी होकै लडें लड़ाई घर घर अलख जगाया है

गांव गांव कर ल्यो तैयारी सन्देश तै योहे पहूंचाया है

महिला दबकर नहीं रहेगी रणबीर की कलम पुकारी।।

लक्ष्मी सहगल बनी कमांडर दी अंग्रेजों को किलकारी।।

आज काल के कई नेता म्हारे दिल तैं उतर लिये

आज काल के कई नेता म्हारे दिल तैं उतर लिये

कहवैं किमैं और करते किमैं पर म्हारे कुतर लिये

1

जै मेरी बस चालज्या तै दिन मैं तारे दिखवा दयूं

इन लिडरां नै दो रेलां मैं नेपाल के मैं भिजवा दयूं

बाह कै खूब देखे हमनै इब टूट म्हारे सबर लिये

कहवैं किमैं और करते किमैं पर म्हारे कुतर लिये

2

जी करता जनता धोरै इनकी इब पोल खुलवाऊं 

ये पापी घनघोर कसूते ये नारे सारे कै लगवाऊं

राजगुरु भगतसिंह से नेता चढ़ा अपनी नजर लिये 

कहवैं किमैं और करते किमैं पर म्हारे कुतर लिये

3

दो दिन मैं धन काला फेर सबका कढ़वा देवैंगे

अरबां मैं खेलैं देखो इनकै हथकड़ी लगवा देवैंगे

फोली फोली खाई सै नहीं सही नेता टकर लिये

कहवैं किमैं और करते किमैं पर म्हारे कुतर लिये

4

जनहित की राजनीती का सबनै पाठ पढ़ावैं रै

इसकी खातर जन मोर्चा मजबूत आज बनावैं रै

कहै रणबीर बरोणे आला चढ़ सही डगर लिये

कहवैं किमैं और करते किमैं पर म्हारे कुतर लिये

स्वीडन मैं

 स्वीडन मैं

पति गैल स्वीडन जावै राजबाला फूली नहीं समाई

कई जोड़ी जूती तुड़वा कै उसनै लेदे कै नौकरी थ्याई

1

कई सहेली न्यों बोली अपना पता जरूर बताइये

उड़ै जायें पाछै बेबे हम गरीबां नै भूल ना जाइये

दो चार म्हारे बर्गीयाँ नै तूँ बेबे उड़ै जरूर बुलाइये

दूसरे देश मैं तूँ जावैगी उड़ै साख सही जमाइये

क्युकर रैहना प्रदेशां मैं सबनै आछी तरियां समझाई

कई जोड़ी जूती तुड़वा कै उसनै लेदे कै नौकरी थ्याई

2

बदेश मैं जाकै देश अपना भूलतें नहीं वार लगै

अपना फेर भी अपना पराया उड़ै घर बार लगै

माणस नै बहोतै आच्छा न्यों तो पूरा संसार लगै

दुनिया पूरी सै सुंदर बढ़िया किया कारोबार लगै

स्वीडन देश मैं शांति सै उड़ै बताए बढ़िया लोग लुगाई

कई जोड़ी जूती तुड़वा कै उसनै लेदे कै नौकरी थ्याई

3

म्हारे देश की ढालां महिलावां पै जुल्म ना होवैं

अपनी मर्जी की मालिक ना अपना आपा खोवैं

सोच साच कै करैं फैसला नहीं बैठ अकेली रोवैं

फैसले लेवण मैं साझा बीज सलाह करकै बोवैं

बराबर के हक महिला के समतावादी समाज बताई

कई जोड़ी जूती तुड़वा कै उसनै लेदे कै नौकरी थ्याई

4

सुनी सुनाई बात सारी हमनै साच्ची बात बताईयो

किसा समाज स्वीडन का खोल पूरा समझाईयो

दोनों रहियो रलमिल कै ना राई का पहाड़ बनाइयो

पीसा सब कुछ ना होंता दिल अपने नै सुझाइयो

रणबीर बरोणे आले नै थारे कैड़ की चिंता होरी सै सवाई

कई जोड़ी जूती तुड़वा कै उसनै लेदे कै नौकरी थ्याई

सारे देश मैं धूम मचाई हे सखी किसान आंदोलन नै।।

 सारे देश मैं धूम मचाई हे सखी

         किसान आंदोलन नै।।

या गजब एकता दिखाई हे सखी

         किसान आंदोलन नै।।

मोदी कै ख़ूब सांस चढ़ाये, ये अमित शाह भी  घबराये

सरकार की रेल बनाई हे सखी 

            किसान आंदोलन नै।।

सात सौ शहीद किसान हुये, जंग जारी बोर्डरों  पै ऐलान हुये

मोदी की खूब करी खिंचाई हे सखी

              किसान आंदोलन नै।।

इनपै लाठी गोली चलवाई , जात धर्म पै चाही फूट गिरवाई

सबकी वीडियो रील बनाई हे सखी

               किसान आंदोलन नै।।

एक साल ताहिं डटे रहे , सरकार के पाछ्ने फटे रहे 

तीनों कानून वापिस कराई हे सखी

                 किसान आंदोलन नै।।