जाट आरक्षण पर सारे जाटां कै सांस चढ़ा राखे ॥
जीते पाच्छै देऊँ आरक्षण न्यों भोले जाट भका राखे ॥
जाट कौम हरयाणा की आज दबंग कौम कहावै
गुजर हीर सिख अपने नै नहीं कम कति बतावै
बैकवर्ड और जाट आज आरक्षण पै भिड़ा राखे ॥
जीते पाच्छै देऊँ आरक्षण न्यों भोले जाट भका राखे ॥
गंभीर सुझाव सै सुणियो ध्यान लगाकै बात मेरी
दलितां का रहवै सुणियो कान लगाकै बात मेरी
बैकवर्ड का रहवै वोहे जो भी आज दिखा राखे ॥
जीते पाच्छै देऊँ आरक्षण न्यों भोले जाट भका राखे ॥
बाकी बची कौमां मैं यो इसका आर्थिक आधार हो
जाट भी शामिल हों इसमेँ संविधान मैं सुधार हो
काला धन भुला दिया आरक्षण के टांड पै बिठा राखे ॥
जीते पाच्छै देऊँ आरक्षण न्यों भोले जाट भका राखे ॥
सारी कौम होकै कठ्ठी इसपै एक मत हो ज्यावां
दस प्रतिशत खातर या संविधान मैं बदल करावां
रणबीर रोजगार खोसकै आरक्षण पै लड़ा राखे ॥
जीते पाच्छै देऊँ आरक्षण न्यों भोले जाट भका राखे ॥
