Sunlyo dhayan laga kai

सुनल्यो नै ध्यान लगा कै, एक बै देखो नजर घुमा कै, शरीफ लोगों नै जितवा कै, अपना विकास सही करां ।। 1 बढ़िया सी पंचायत बना कै चैन मिलै गरीबां नै काले धन नै मुश्किल होज्या चैन मिलै शरीफां नै ज्ञान विज्ञान की यही पुकार, बराबर हों सब नर नार , या दी हरियाणे मैं ललकार ,अपना विकास सही करां ।। 2 बदेशी कंपनी अर देशी ये मिलकै नै लूट रही रै किसे की काबू की ना जन सांड मरखना छूट रही रै म्हारी एकता नाथ घालदे,उनका पकड़ चोर माल दे,या गरीबां नै देख भाल दे,अपना विकास सही करां ।। 3 महिलावां का दोयम दर्जा गलत विकास के कारण सै गरीब देशों के सिर कर्जा गलत विकास के कारण सै नहीं होसै हरजा सुनने मैं, सोच समझ कै गुणने मैं, यो सही मानस चुनने मैं,अपना विकास सही करां ।। 4 पंचायत और जिला परिषद सारै ईमानदार ल्याने हों इसके बिना सुनल्यो बालक बिन लतयां के उभाने हों खींची सै सही तस्वीर देखो, लिखने आला रणबीर देखो, काढ़ी सै नई लकीर देखो, अपना विकास सही करां।।