मोदी राज नै वायदे भुला कै किसान करे बेहाल, देखियो के होगा ।।

 देखियो के होगा

मोदी राज नै वायदे भुला कै किसान करे बेहाल,
देखियो के होगा ।।
खेत क्यार उजाड़ दिए और किसान मार दिया धरती कै
बिकवा खिड़की किवाड़ दिए दिवाला पिटग्या सरती कै
किसान छोडडे ना किसे दीन के इसी बिगाड़ी चाल, देखियो के होगा ।।
कमा कमा खेताँ मैं मर लिए लूटकै पेप्सी कोला लेग्या
पलंग निवारी देऊंगा कैहकै खोस म्हारा खटोला लेग्या
दो किल्ले आला जकड दिया बिछाकै चौगिरदें जाल,  देखियो के होगा ।।
भारत की सरकार पसार रही अमरीका आगै झोली रै
इसे चश्में चढ़ाये अमरीका नै ना दीखै उसकी रोली रै
मोदी थारी नीतियां नै पाड़ लिए सिर के सारे बाल, देखियो के होगा ।।
कपास पीटी धान पीट दिया गिंहूँ पिटण की बारी सै
नौकरी खोसी धंधे चौपट यो अग्निपथ किया जारी सै
रणबीर अडानी आगै गोडडे टेके बणगे जमा दलाल,  देखियो के होगा ।।
18/07/2022