चौधरी छाजू राम

 हरियाणे का जिला भिवानी अलखपुरा गाम सुण्या होगा*

*इसे गाम के  रहने आले चौधरी छाजू राम सुण्या होगा*

*1*

*छाजू राम नै मेहनत करकै जूट का व्यापार चलाया*

*जूट का बादशाह उसनै जाकै कलकत्ते मैं कहवाया*

*सेठ घनश्याम दास बिड़ला ऊँका पक्का यारी बताया*

*बिड़ला परिवार मैं छाजू राम बालकां नै नाना बनाया*

*भिवानी किसान का बेटा इसा करग्या काम सुण्या होगा* 

*इसे गाम के  रहने आले चौधरी छाजू राम सुण्या होगा*

*2*

*दानवीर के रूप मैं कहते छाजूराम नै नाम कमाया*

*शांति निकेतन कलकते का उसनै था सम्मान बढ़ाया*

*लाहौर का डीएवी कालेज हमेशा राख्या याद बताया*

*आर्यकन्या पाठशालाओं की मदद नै हमेश तैयार पाया* 

*छाजूराम नै समझया जरूरी शिक्षा का काम सुण्या होगा*

*इसे गाम के  रहने आले चौधरी छाजू राम सुण्या होगा*

*3*

*आजादी की लड़ाई मैं भी कदे ना पाछै कदम हटाये*

*गांधी नेहरू पटेल सबतैं दिए दिल खोल दान बताये*

*सुभाषचंद्र बोस जर्मनी उनकी मदद तैं कहते जा पाये*

*चौधरी छोटू राम नै तो सेठ छाजूराम धर्म पिता बनाये*

*दिवाई उच्च शिक्षा कईयां तैं यो नेक काम सुण्या होगा*

*इसे गाम के  रहने आले चौधरी छाजू राम सुण्या होगा*

*4*

*लाला लाजपतराय नै एक बै दो सौ रूपये लेने चाहे*

*दोसौ की जागां लाला जी धोरै दो हजार थे पहुंचाये*

*शिक्षा की खातर ये कई स्कूल कॉलेज भी खुलवाये*

*ढाई मिहने भगत सिंह भी अपनी कोठी मैं ठहराये*

*रणबीर झाजू राम का यो किस्सा तमाम सुण्या होगा*

*इसे गाम के  रहने आले चौधरी छाजू राम सुण्या होगा*