रेल बनाई

 *रेल बनाई

*कोरोना वायरस आगी इनें गरीब की रेल बनाई रै।।*

*न्यून पड़ै तो कुआं दीखै न्यून पड़ै तो खाई रै।।*

1

*कितै हवन करकै इसनै खत्म करना चाहरे* 

*गोमूत्र का सेवन करो इलाज पक्का ये बतारे*

*जनता का बेकूफ़ बनारे, बता पक्की दवाई रै।।*

*न्यून पड़ै तो कुआं दीखै न्यून पड़ै तो खाई रै।।*

2

*भ्रम और अफवाह ये रोजाना नई नई घूमैं सैं* 

*एमएलए और मंत्री देखो पैर बाबयाँ के चूमैँ सैं* 

*थाली बजा झूमैं सैं कहैं सुन कोरोना घबराई रै।।*

*न्यून पड़ै तो कुआं दीखै न्यून पड़ै तो खाई रै।।*

3

*साइंसदानों नै इबै ना कोये वैक्सीन बनाई सै*

*इलाज खातर ना कोये इसकी बणी दवाई सै*

*लोक डाउन लगाई सै ज्यान मरण मैं आई रै।।*

*न्यून पड़ै तो कुआं दीखै न्यून पड़ै तो खाई रै।।*

4

*अंधविश्वास अनपढ़ता नै समस्या और बढ़ाई*

*लोक डाउन के साथ जीती कई देशां नै लड़ाई*

*रणबीर करी कविताई भ्रम दूर करनी चाही रै।।*

*न्यून पड़ै तो कुआं दीखै न्यून पड़ै तो खाई रै।।*