पढ़ाई लिखाई व्यापार बणादी खट्टर साहब की सरकार

 पढ़ाई लिखाई व्यापार बणादी खट्टर साहब की सरकार नै।

या फीस कई गुणा बधा दी मारे म्हंगाई की रफ्तार नै।।
1.
स्कूल बक्से ना बक्से कालेज इस बढ़ती फीस के जाल तैं
दस लाख साल की फीस यो मांस तार लिया सै खाल तै
हरियाणे मैं हाहाकार माचग्या इस आण्डी बाण्डी चाल तैं
जमा धरती कै मार दिये के सीएम वाकफ ना म्हारे हाल तै
दस लाख के बॉण्ड भराकै देखो लूटैं जनता लाचार नै।।
2.
सुप्रीमकोर्ट द्वारा बढ़ी फीस के कदम सही ना बताये जावैं
यूजीसी कटपुतली बणादी उल्टे नियम बणवाये जावैं
के थोड़ी फीस थी पहलम दस लाख के बांड भरवाये जावैं
एकला हरियाणा सै जित दस लाख  शुरू मैं धरवाये जावैं
बन्धुओ थारी बढ़ी फीस या लेगी खोस कै म्हारी बहार नै।।
3.
चार पांच सरकारी कालेज पूरे हरियाणा में बताये सैं
पीजीआईएमएस रोहतक ढाई सौ की संख्या
ल्याये सैं
इनको पढाने की खातिर नहीं और केन्सल्टेंट
बढ़ाये सैं
गरीब बालक माखी की ढालां काढ़ कै बाहर गेरे चाहे सैं
चौंतीस दिन होगे हड़ताल पै जुल्म ढाये म्हारी सरकार नै।।

4.
कारपोरेट के कहने पै बन्धुओ क्यों गोड्डे टेके तमनै
उनके फायदे खातर क्यों म्हारे फायदे नहीं देखे तमनै
सब्सिडी खत्म गरीबां की बर्बादी पै परोंठे सेके तमनै
जनता साथ फीस बढ़ा कै ईब फंसा लिये पेचे तमनै
रणबीर सिंह सफल बनाया चाहवै छात्रों की हुंकार नै।।