नेता की जागां पार्टी की नीति

 

नेता की जागां पार्टी की नीति असल मैं बोल्या करै।।
या हिम्माती बैरी किसकी सबके भेद खोल्या करै।।
1
स्वदेशी का नारा लाकै देश बेच्या म्हारा किसनै
देश द्रोही सरकार कै यो लाया सै साहरा किसनै
या रीजनल पार्टी न्योंए बीच के म्हां डोल्या करै।।
2
पूंजीवादी सोच की पार्टी नीति एकसी अपनारी देखो
वैश्वीकरण और निजीकरण का ये झंडा ठारी देखो
पूंजीपति के इशारे पै म्हारी चमड़ी छोल्या करै।।
3
बदेशी कम्पनी सिर पै इन सबनै चढ़ाई देखो
देशी कम्पनी छोटी छोटी सारी पढ़ण बिठाई देखो
इन बाताँ नै धर तराजू मैं वोटर नहीं तोल्या करै।।
4
सीपीएम नै वैश्वीकरण का करकै विरोध दिखाया
अपने पाहयाँ खड़े होण का रास्ता नया बताया
पूंजीवाद जात धर्म पै रणबीर जहर घोल्या करै।।