देखियो के होगा

 देखियो के होगा

नए राज पाट नै म्हारे देश के कति बिगाड़े हाल
देखियो के होगा ।।
म्हारे खेत उजाड़ दिए और किसान मार दिया धरती कै
बिकवा खिड़की किवाड़ दिए दिवाला पिटग्या सरती कै
किसान छोडडे ना किसे दीन के इसी बिगाड़ी चाल
देखियो के होगा ।।
कमा कमा खेताँ मैं मर लिए लूट कै पेप्सी कोला लेग्या
पलंग निवारी देऊंगा कैहकै खोस म्हारा खटोला लेग्या
दो किल्ले आला जकड दिया बिछाकै चौगिरदें जाल
देखियो के होगा ।।
भारत की सरकार पसार रही अमरीका आगै झोली रै
इसे चश्में चढ़ाये अमरीका नै ना दीखै उसकी रोली रै
राज पाट की नीतियां नै पाड़ लिए सिर के सारे बाल
देखियो के होगा ।।
कपास पीटी धान पीट दिया गिंहूँ पिटण की बारी सै
नौकरी खोसी धंधे चौपट यो हमला इसका भारी सै
रणबीर सरकार नै गोडडे टेके बणगी जमा दलाल
देखियो के होगा ।।
28.4.2015