त्राहि-त्राहि माच

 त्राहि-त्राहि माच रही दुनिया मरै सै तिसाई देखो

पाणी बिना विकास किसा चाले उल्टी राही देखो
1
बीस करोड़ तैं फलटी पै साफ पाणी ना पीवण खातर
पाणी दूसरी जरूरत बताई आड़ै जीवन की खातर
बिना पाणी के ताल सूने गामां की रूसवाई देखो
2
दो सौ एम ए एफ पाणी हरियाणे मैं लगभग बताया
चार सौ एम ए एफ चाहिए नहीं कदे  ज़िकर चलाया
एस वाई एल देगी सतरा मची सै लड़ाई देखो
3
यो एक सौ तिरासी एम ए एफ कित तैं आवै म्हारै
इसे विकास की आज साच्ची कौन तस्वीर तारै
रणबीर बात बिचारै बिचार कै बहन अर भाई देखो