ईजाजत बहुमंजिली इमारतों की

 

ईजाजत बहुमंजिली  इमारतों की सैक्टरां की भ्यां  बुलवावैंगी
बणी बणाई इमारतों की देखियो यॆ जमा नींव हिलवावैंगी।।
1
सरकार कति आंधी  होगी दीखै चौड़ै पड़या दिखाई ना
एक्सपर्ट कहते म्हारे तैं बूझण खातर मीटिंग बुलाई ना
इसे कारनामे करकै ये हकूमत गलत इतिहास लिखवावैंगी!!
बणी बणाई इमारतों की देखियो यॆ जमा नींव हिलवावैंगी।।
2
नई  कालोनियां पै तो यो कानून समझ  मैं आवै सै
पर पूरानियां मैं  हो लागू सुणकै दिल कांप  जावै सै
सब शहरों की जनता मिलकै कानून जरुर  वापस करवावैंगी !!
बणी बणाई इमारतों की देखियो यॆ जमा नींव हिलवावैंगी।।
3
एक घर के बाएं दाएं चार मंजली घर  नै जरुर  ढा देगी
ढावै ना तो तरेड़ तो या मानलयो पक्की ए ल्या देगी
तरेड़ आए औड़ भींतां नै ये सैक्टर क्युकर हटकै चुणवावैंगी।।
बणी बणाई इमारतों की देखियो यॆ जमा नींव हिलवावैंगी।।
4
पूरे हरियाणा मैं जोरदार विरोध मैं अभियान चलावां भाई
ईसके नफे-नुकसान सबनै हम पूरी ढाल समझावां भाई
रणबीर सिंह की रागनी जन जन मैं घणा जोश ऊठवावैंगी।।
बणी बणाई इमारतों की देखियो यॆ जमा नींव हिलवावैंगी।।