छोटूराम नै राह दिखाया बोलना

 

चारों कांहीं लुट पिट लिया अपणा ठिकाना पाज्या रै।।
जात पात और इलाके पै के थ्याया मनै बताज्या रै।।
1
छोटूराम नै राह दिखाया बोलना तूँ सीख किसान दुश्मन की पहचान सही तोलना तूँ दीख किसान
तीस साल मैं हीर फिर कै कर्जा हट हटकै नै खाज्या रै।।
जात पात और इलाके पै के थ्याया मनै बताज्या रै।।
2
जात गोत इलाके पर किसान कसूते बांट दिए रै
किसान की कमाई लूट ली सबतैं न्यारे छांट दिए रै
अन्नदाता क्यों सै भूखा मनै मतलब समझाज्या रै।।
जात पात और इलाके पै के थ्याया मनै बताज्या रै।।
3
दो किले धरती बची बीस लाख किले के लगवाए
धरती गई चालीस लाख फेर तनै खा पड़काए
चकाचौंध मचारे सैं कसूती आंख जमा चुंधियाज्या रै।।
जात पात और इलाके पै के थ्याया मनै बताज्या रै।।
4
पीसे आले तेरी कौम के तनै तड़पता छोड़ गए रै
किमैं दलाल बने ठेकेदार तेरे तैं नाता तोड़ गए रै
रणबीर किसान सभा मैं सोच समझ कै आज्या रै।।
जात पात और इलाके पै के थ्याया मनै बताज्या रै।।