रागनी जींद रैली
नई अनाज मंडी के मां किसान मजदूर आये भाई।।
संयुक्त किसान मोर्चे के किसान जींद मैं छाये भाई।।
1
पूरी भरी भरी बस ये चारों तरफ तैं आवण लागी रै
ट्रैक्टर ट्राली भरी लोगां तैं सड़कों पै छावण लागी रै
पीला ओढ़ना पीली पगड़ी हरी टोपी नै नारे लाये भाई।।
2
ग्यारां बजते बजते उड़ै महिला पुरुष थे आण लगे
किसान मजदूर एकता के वे मिलकै नारे लाण लगे
बीस पच्चीस हजार पहोंचे बारा बजे ताहिं बताये भाई।।
3
आस पास के गामां तैं कई कई मण रोटी आई भाई
किसे गाम तैं टनों दूध के ये ड्राम किसानी ल्याई भाई
खाण पीन के लंगर लागे सबनै परांठे उड़ै खाये भाई।।
4
सात सौ किसान भाईयों की शहादत सबनै याद करी थी
उनके सम्मान मैं खड़े होकै सबनै दो मिंट मौन धरी थी
इसके बाद उग्राहा जी नै माइक पै आकै हालात बताये भाई।।
5
जोगिंदर सिंह उग्राहा के भाषण पै सबनै ताली बजाई थी
राकेश टिकैत नै भी सभा मैं जोर की हुंकार लगाई थी
युद्धवीर सिंह अतुल अंजान नै अपने ख्याल सुनाए भाई।।
6
दर्शन पाल नै वायदा खिलाफी सरकार की बताई थी
हन्नान मोल्ला नै विस्तार तैं वे सारी बात याद दिवाई थी
रलदू सिंह आशीष मित्तल नै सरकार पै सवाल उठाए भाई।।
7
न्यूनतम समर्थन मूल्य की कानूनी गारंटी की बात उठाई
बिजली संशोधन विधेयक दो हजार बाइस पै बात चलाई
लखीमपुर खीरी कांड के मुद्दे महा पंचायत मैं ल्याये भाई।।
8
कर्ज मुक्ति का सवाल भी आगै संयुक्त किसान मोर्चा ठावैगा
राष्ट्रीय स्तर पै बड्डा संघर्ष सोच विचार कै नै मोर्चा ल्यावैगा
रणबीर सिंह नै भी टूटे फूटे आज अपने विचार जताये भाई।।
No comments:
Post a Comment