साल 2023
आपा धापी माची रही पूरा बाइस का साल लिकड़ग्या।।जात धर्म पै झगड़ण का राह दीखै तेईस भी पकड़ग्या ।।
1
ये घर बणे तबेले लोगो रही माणस की खोड़ नहीं
सोच तै परहेज करैं बात का टोहते क्यों औड़ नहीं
झूठ पै चालै पूरी दुनियां सच्चाई नै अंधविश्वास
जकड़ग्या।।
जात धर्म पै झगड़ण का राह दीखै तेईस भी पकड़ग्या ।।
2
मेहनत करी कमेरयां नै विज्ञान नै राह दिखाया
या दुनिया बदल दई घणा खून पसीना बाहया
लालची नै डाण्डी मारी आज कमरे कै साहमी अकड़ग्या।।
जात धर्म पै झगड़ण का राह दीखै तेईस भी पकड़ग्या ।।
3
न्याय की बात भूलगे नहीं ठीक करया बंटवारा
पांच सितारा होटल दूजे कान्ही यो फूटया ढारा
समाज का म्हारा भाईचारा आज घणा कसूता बिगड़ग्या।।
जात धर्म पै झगड़ण का राह दीखै तेईस भी पकड़ग्या ।।
4
टीवी पै सपने हमनै आज खूब के दिखाये जावैं
रणबीर तै लालच दे कै उल्टे प्रचार कराये जावैं
मेल मिलाप भूल गए माणस अपने आप के मैं सुकड़ग्या।।
जात धर्म पै झगड़ण का राह दीखै तेईस भी पकड़ग्या ।।
No comments:
Post a Comment