किसानों की 7 रागनी

 चौदह दिन होगे किसानों नै दिल्ली मैं डेरे डाल रहे।

तीन कानून जो पास करे सैं किसानी कै घर घाल रहे।
1
पूरी और लाम्बी तैयारी करकै आज किसान आये सैं
अनुशासन घणे गजब का समझदार घणे पाये सैं
किसानी और जनता एकता बणा गजब की ढाल रहे।
तीन कानून जो पास करे सैं किसानी कै घर घाल रहे।
2
हिन्दू मुस्लिम सिख ईसाई आपस में हैं भाई भाई
इसकी ताकत के आगै भाजपा सरकार घबराई
या एकता घणे गजब की इसके ऊपर चाल रहे।
तीन कानून जो पास करे सैं किसानी कै घर घाल रहे।
3
अडानी अम्बानी की खातिर किसानों की कड़ तोड़ दई
सब किमैं बायपास करकै क्यों तीन बिल जोड़ दई
कारपोरेट खेती की खातिर कर जनता को बेहाल रहे।
तीन कानून जो पास करे सैं किसानी कै घर घाल रहे।
4
संघर्ष की रही पकड़ी आर पार की लड़ाई होवैगी
फुट गेरो संघर्ष पीटो भाजपा सब किमैं झोवैगी
रणबीर सिंह की कलम तै उठ सही सवाल रहे।
तीन कानून जो पास करे सैं किसानी कै घर घाल रहे।
2*****
खाई
खाई चौड़ी होंती आवै सै इसनै आज कौण पाटैगा।
म्हारे किसानों का हाथ सही मैं आज कौण डाटैगा।
बधगी घर घर मैं खाई या बधगी पूरे समाज मैं
देशां के बीच की खाई ना बताते पूरे अंदाज मैं
अमरीका टोप पै रहवण नै तीसरी दुनिया नै काटैगा।
एक देश के भित्तर भी कई ढाल की खाई दीखैं
एक अरबपति बनरया दूजे ये भूखे पेट नै भींचें
शांति कड़े तैं आवैगी जब कारपोरेट इसतै नाटैगा।
लड़ाई बढ़ेगी इस तरियां विनास की राही करकै
पिचानवै हों कठे होंवैंगे चौड़ी होंती खाई करकै
नहीं तो पर्यावरण प्रदूषण सबका कालजा चाटैगा।
लोभ लालच और मुनाफ़ा और बधारे इस खाई नै
समाज गया रसातल मैं चौड़ै भाई  मारै सै भाई नै
रणबीर सिंह समझावै देखो छंद यो न्यारा छांटैगा।
3*****
इस गोदी मीडिया नै किसानों के खिलाफ जहर फैलाया।
जमीनी हकीकत देख कै मोदी भी बहोत घणा घबराया।।
1
वार्ता मैं झुके नहीं किसान अपनी मांग पै अड़े खड़े सै
सरकार के हथकंडे एकता आगै ओछे घणे पड़े सैं
गोदी मीडिया रोज घड़ कै दखे झूठी खबर सै ल्याया।।
जमीनी हकीकत देख कै मोदी भी बहोत घणा घबराया।।

2
कसूता अनुशाषन किसानों का दुनिया देख कै दंग रैहगी
भाजपा की सरकार इनकी गेल्याँ जान बूझ कै क्यों फैहगी
आर पार की लड़ाई खिंचगी किसान नै पूरा प्लान बनाया।
जमीनी हकीकत देख कै मोदी भी बहोत घणा घबराया।।
3
तीन कानून वापसी बिना किसान नहीं  उल्टा जावैगा रै
सांस दिल्ली की सरकार कै यो घणे कसूते चढ़ावैगा रै
कई महिन्यां का इंतजाम करकै किसान दिल्ली मैं आया।।
जमीनी हकीकत देख कै मोदी भी बहोत घणा घबराया।।
4
हिन्दू मुस्लिम सिख इसाई आपस मैं सब सैं भाई भाई 
  जवान किसान जनता एकता की देखो मिशाल बनाई
रणबीर सिंह सोच समझ कै नै यो छंद तुंरत बनाया।।
जमीनी हकीकत देख कै मोदी भी बहोत घणा घबराया।।
4*****
किसानी खातर भारत बंद आज कसूता होवैगा।।
आज हिंदुस्तानी किसान बीज एकता के बोवैगा।।
1
कारपोरेट के खिलाफ छेड़ दई जंग पूरी देखो
सरकार इसकी तलहडू सै करै जी हजूरी देखो
आर पार की लड़ाई होगी ,मोदी नई झूठ टोहवैगा।।
आज हिंदुस्तानी किसान बीज एकता के बोवैगा।।
2
जात धर्म इलाके पर लड़वा कै तेज कररे लूट म्हारी
किसानों और मजदूरों कै दे दी आछे तरियां बुहारी
तीन बिल किसान विरोधी ,मोदी देश नै डबोवैगा।।
आज हिंदुस्तानी किसान बीज एकता के बोवैगा।।
3
निजीकरण करकै सारे महकमे  बेच रहया सै
अडानी अम्बानी के निशाने पै टेक रहया सै
संविधान की परवाह कोण्या, समान देश का खोवैगा।।
आज हिंदुस्तानी किसान बीज एकता के बोवैगा।।
4
समझ बूझ तै सँघर्ष को आगै लेज्यावैंगे भाई
या नब्बे दस की लड़ाई जीत कै दिखावैंगे भाई
रणबीर सिंह बरोने आला नए नए छंद पिरोवैगा।।
आज हिंदुस्तानी किसान बीज एकता के बोवैगा।।
5*****
विवेक तैं सोचां
किसानो थारे बरगा विज्ञानी मनै कोए भी नहीं पाया।।
थारे अनुभव तैं थामनै खेती मैं खूब नाम कमाया।।
भैंस खरीदी जब थामनै धार काढ कै देखी बताई
बुलध खरीदया थामनै सार काढ़ कै देखी बताई
अगवा पिछवा हवा हिसाब हमेशा ही थामनै लगाया।।
पर मण्डी मैं जाकै बेबस विज्ञान काम नहीं आया रै
भा नै देकै मारे धरती कै जी थारा घणा दुःख पाया रै
कदे समझलयो लूट की जड़ जात्यां मैं किसान बंटाया ।।
पंजाब का किसान बोल्या आतंकवादी कैहकै पीटया
हीर गुजर जाट मैं बाँट हरियाणे का किसान भींच्या
किसान की तोड़ एकता जात्यां पै आपस मैं भिड़ाया ।।
अम्बानी अडानी की लूट रणबीर जारी रहैगी देखो
जात्यां मैं बंटी किसानी कितनी पिटाई सहैगी देखो
जात पात का पहरा चश्मा विवेक चश्मा थारा बगाया ।।
6****
चीनी मील
खेत मैं ईंख खड्या सै, चीनी मील बन्द पड्या सै।
टोटा घरां आण बड्या सै, नहीं दीखै कोए राही।।
1. मेहनत करकै बाहये खेत जी लाकै बोई गंडेरी थी
  ईंख नुलाया शिखर दोफेरी मेरी गैल मरी भतेरी थी
  पात्ते हाथ चीरगे म्हारे रै, हम ईंख बांधण चाहरे रै
  इसपै घणी आशा लारे रै, बेटी की करी सगाई।।
2. मील आल्यां नै पर्ची ना दी मारया मारया फिरता रै
  अपमान करैं कम तोलैं कहर मेरे पर गिरता रै
  ईंख आज मेरा सूक रहया, कुछ मनै ना सूझ रहया
  अजीत पै मैं बूझ रहया, करी क्यों म्हारी तबाही।।
3. मुलायम सिंह जुग-जुग जीयो भा बढ़िया दिया म्हारा
  कल्याण सिंह नै दागी गोली मारया किसान बिचारा
  कांग्रेस कै पटकी मारांगे, मुलायम पै सब कुछ वारांगे
  पार वामपंथ नै तारांगे, बीजेपी की श्यामत आई।।
4. जातपात का भ्रम टूटैगा , किसान एकता जिन्दाबाद
  अमीरां की चाल समझगे या मुनाफाखोरी मुर्दाबाद
  संघर्ष का बिगुल बजाया रै, यो झण्डा लाल उठाया रै
  रणबीर नै राह दिखाया रै, गजब की करी कविताई।।
7*****
किसान आत्मनिर्भर देश बनाया ज्यान हथेली पै धरकै रै।।
किसान तै पढ़ण बिठाया तीन बिल आज पास करकै रै।
1
किसानी संकट बढ़ा दिया ईब  कड़ै बिलां मैं बड़गे रै
के मजबूरी थी तमनै क्यों ये बिल पास करने पड़गे रै
गिहूं गोदामां मैं सड़गे रै चुहे खागे बोरी नै कुतर कै रै।।
किसान तै पढ़ण बिठाया तीन बिल आज पास करकै रै।।
2
पहलमै फांसी खा खाकै किसान मरण लाग रहे थे
कारपोरेट के काले ये इनकै लड़ण नाग रहे थे
किसान ईब जाग रहे सैं हक लेंवैंगे चाहे मर कै रै।।
किसान तै पढ़ण बिठाया तीन बिल आज पास करकै रै।।
3
बिन किसान ना खेती बताई बिन खेती उद्योग कड़ै
क्यूकर देश बढ़ैगा आगै इतना दुखी किसान जड़ै
मुंह खोलना जरूर पड़ै पानी गया म्हारे सिर पर कै रै।।
किसान तै पढ़ण बिठाया तीन बिल आज पास करकै रै।।
4
मजदूर विरोधी बिल ल्याये इसकी ना मजबूरी बताई
कारपोरेट की गोज भरी म्हारी करी चाहवैं खूब खिंचाई
पार्लियामेंट मैं मोहर लवाई लडांगे लड़ाई समर कै रै।।
किसान तै पढ़ण बिठाया तीन बिल आज पास करकै रै।।
5
भारत का किसान दुखी हुया फसल पिटगी चौड़े मैं
चांद तो कदे बी मांग्या ना करया सै गुजर थोड़े मैं
अम्बानी के घमोड़े मैं कोण्या मरैं किसान पसर के रै।।
किसान तै पढ़ण बिठाया तीन बिल आज पास करकै रै।।
किसान तै पढ़ण बिठाया तीन बिल आज पास करकै रै।।
6
बिना एकता ना काम चलै पिट्या किसान न्यारा-न्यारा
जातपात और गोत नात पै बांटया कैहकै यारा प्यारा
रणबीर सिंह साथ देगा थारा उठियो संघर्ष पूरा करकै रै।।
किसान तै पढ़ण बिठाया तीन बिल आज पास करकै रै।।