Monday, 13 February 2023

कमला रामफल

 




रणबीर
पूरे गांव में यह चर्चा का विषय बन गया। कुछ पुरुष कह रहे हैं कि क्या इस गांव को अमरीका बनाओगे? पुरुषों का खासा हिस्सा यही चाहता था कि कमला रामफल भाई-बहन बन जाएं। मगर औरतों का बड़ा हिस्सा इसके खिलाफ था। कई औरतों ने कहा-अब यह कैैसे हो सकता है? वे आपस में बातें करती हैं और क्या कहती हैं भला-

पेट मैं पलै साथ मैं क्यों तुम दो ज्यानां नै मार रहे।
गया बदल जमाना क्यूं पाप की माला गल मैं डाल रहे
1
बालक का रिश्ता के होगा भाण-भाई बनावैं सैं। भाण-भाई के रिश्ते कै बी क्यों कालस  लगावें सै।
गाम में जो बड़े पंचायती वे घणे दुष्कर्म करावें  सैं।
छेड़खानी-बलात्कार पै ना कदे पंचायत बुलावै सैं।
कंस रूपी ये पंचायती बिकलाने मैं पिना धार रहे।
2
राठी और दहिया बीच ब्याह ये णुरतै होत्ते आये सै।
चौटाला गाम मैं कई नै आपस मैं ब्याह रचाये सैं।
हरेक गाम मैं गोत पन्दरा गये आज ये गिनाये सैं।
किस किसनै बचावांगे ये सवाल गये ईब ठाये सैं।
क्यों इन मासूमां ने बिना बात के फांसी तार रहे।।
3
परम्परावादी सोतै बैल की खेती ल्यादी हटकै रै। जंग लागै चाकू तै ओरनाल काटो सब डटकै रै। पुराना घाघरा कड़ै गया गोत क्यों थोरे अटकै रै। इतने गोत क्यूंकर बचैंगे बात म्हारै योह खटकै रै।
ना पुराना ठीक सारा इसपै नहीं कर विचार रहे।
4
इतनी प्यारी छोरी लाग्गै क्यों पेट मैं इनै मार रहे।
खरीद कै ल्याओ यू पी तै जिब ना गोत विचार रहे।
ब्याह-शादी मुश्किल होरे ना नये नियम धार रहे। गोतां की सीमा ये टूटैंगी लोग खड़े-खड़े निहार रहे।
रणबीर बरोनिया पै पंचायती पिना ये तलवार रहे।

सरोज कमला की बचपन की दोस्त सै। वा कैनेडा मैं सै। वह एक वेबसाइट पर कमला के बारे में जानकारी हासिल करले सै। अंग्रेजी के अखबार ‘दि ट्रिब्यून "में भी खबर पढ़ै है। वह कमला के बारे में बड़ी चिंतित हो जाती है। वह कमला को एक पत्र लिखती है। क्या लिखती है भला-
रोज पढूं खबर कमला अंग्रेजी के अखबार मैं। महिला फांसी तोड़ी जावैं बिकलाने के दरबार मैं।
1
संविधान की खुल कै नै पंचायत नै धज्ज्यिां उड़ाई हैं।
राजनैतिक नेतावां नै चुप्पी मामले मैं खूब दिखाई है।
जमा शरम नहीं आई है जहर मिलाया घरबार मैं।
2
प्रशासन खडय़ा देखै क्यों मेरै समझ नहीं आया हे।
संविधान का चौड़े मैं पंचायत नै मजाक उडाया है।
ना कोए कदम ठाया है इस झझर की सरकार मैं।
3
कोर्ट मैं ब्याह करया था पंचायत नै आज तोड़ दिया।
भाण-भाई का उसनै इसमैं ब्यर्थ नाता जोड़ दिया।
रामफल जमा मरोड़ दिया गोतां की तकरार मैं।
4
परम्परावादी रूढि़वादी रणबीर ये नाश करैंगे हे।
आगली पीधी  के बालक घाटा किस ढाल भरैंगे हे।
के बेरा कितने लोग मरैंगे हे पंचायतां की हुंकार मैं।

    दस गामां पंचायत के अध्यक्ष गांव बरवाना के प्रणान कर्मबीर को जब पता लगता है इस फैसले का तो उन्हें बहुत दुख होता है। वे इस तालिबानी फरमान से सहमत नहीं। के कहवैं सै भला-
अठगामा पंचात राठी की बिकलाना फरमान गल्त बतावै।
बरवाना का प्रधान कर्मबीर कोन्या सुर मैं सुर मिलावै।
1
दसगामे नै कोए लेना-देना ना तालिबानी फरमान तै।
राठी दहिया मैं ब्याह होवैं चाहूं बताया हिंदुस्तान तै।
बण कसाई इंसान तै क्यूं बिकलाना घणी धौंस दिखावै।
2
राठी दहिया के छोरा-छोरी आपस मैं खूब बयाह रचावैं।
कोए बन्दिश कोन्या पंचायती हम खोल कै नै बात बतावैं।
हम बिकलाने मैं समझावैं सडांण फैसले मैं तै घणी आवै।
3
कमला-रामफल पति-पत्नी भाण-भाई बनाना ठीक नहीं।
संविधान सै भारत का इसका मजाक उड़ाना ठीक नहीं।
उत्पात मचाना ठीक नहीं इस ढाल की बात सुनावै।
4
निजाम पुर गाम दिल्ली मैं उड़ै जाकै खुद देख लियो।
पिछड़ी समझदारी त्याग कै उड़ै जाकै माथा टेक लियो।
चौबीस नै फैसले नेक कियो रणबीर बरोनिया समझावै।

घड़ा भर लिया पाप का यो एक दिन फूटैगा जरूर

 *घड़ा भर लिया पाप का यो एक दिन फूटैगा जरूर।*

*मेडिकल छात्र जाग लिया थारा घमंड टूटैगा जरूर।।*
1
चालीस लाख के बांड पै सरकार तैं तकरार ठनी
जनता की गर्दन के उपर आज नंगी तलवार तनी
*विधान सभा मैं भी बॉण्ड ऊपर सवाल उठैगा जरूर।।*
2
चालीस लाख का बॉण्ड म्हारे घर मैं काली रात करी
भोली जनता की कड़ पै क्यों थमने अपनी लात धरी
*कूबध जारी राखी तो सारा जन थारे पै थूकैगा  जरूर।*
3
थारे चाटूकार गुण गावैं गलत नै सही ठहरावैं थारी
बॉन्ड करकै जनता दुखी ना साची बात बतावैं सारी
*तानाशाही कसूत चलारे  इसतैं पैंडा छूटैगा जरूर।।*
4
म्हंगी शिक्षा, महंगा स्वास्थ्य महंगाई तीनों ही मां जाई ये
सारे मिलकै इनकै देवां घेरा ना मुश्किल फेर लड़ाई ये
*बॉण्ड वापिस लेना होगा रणबीर डूंडा पाटैगा जरूर।।*

मानस का धर्म

 


मानस का धर्म
धर्म के सै माणस का मनै कोए बतादयो नै।।
माणस मारो लिख्या कड़ै मनै कोए दिखादयो नै।।
1
माणस तैं मत प्यार करो कौणसा धर्म सिखावै
सरे आम बलात्कार करो कौणसा धर्म सिखावै
रोजाना नर संहार करो कौणसा धर्म सिखावै
तम दारू का व्यापार करो कौणसा धर्म सिखावै
धर्म क्यों खून के प्यासे मनै कोए समझादयो नै।।
माणस मारो लिख्या कड़ै मनै कोए दिखादयो नै।।
2
ईसा और राम अलाह जिब एक बताये सारे रै
इनके चाह्वण आले बन्दे क्यूँ खार कसूती खारे रै
क्यों एक दूजे नै मारण नै एके जी हाथां ठारे रै
अमीर देश हथियार बेच कै खूबै मौज उड़ारे रै
बैर करो मारो काटो लिखै वो ग्रन्थ भुलादयो नै।।
माणस मारो लिख्या कड़ै मनै कोए दिखादयो नै।।
3
मानवता का तत कहैं सब धर्मां की जड़ में सै
कुदरत का प्रेम सारा सब धर्मां की लड़ मैं सै
कदे कदीमी प्रेम का रिश्ता माणस की धड़ मैं सै
कट्टरवाद नै घेर लिए यो हर धरम जकड़ मैं सै
लोगां तैं अरदास मेरी क्युकरै इनै छटवादयो नै।।
माणस मारो लिख्या कड़ै मनै कोए दिखादयो नै ।।
4
यो जहर तत्ववाद का सब धर्मों मैं फैला दिया
कट्टरवाद घोल प्याली मैं सब ताहिं पिला दिया
स्कीम बणा दंगे करे इंसान मासूम जला दिया
बड़ मानवता का आज सब धर्मों नै हिला दिया
रणबीर सिंह रोवै खड़या इनै चुप करवादयो नै ।।
माणस मारो लिख्या कड़ै मनै कोए समझादयो नै ।।
2001 की रचना

गोहाना में जो कुछ हुआ--110 ---

 गोहाना में जो कुछ हुआ वह बहुत ही शर्म नाक और दिल दहला देने वाली बात थी। कसूर किसी का सजा किसी को। उसी वक्त लिखी एक रचना । क्या बताया भला:-

मारै कोए भुगतै कोए घणा बुरा जमाना आया रै।

गोहाना मैं दलितां उपर जुलम कसूता ढाया रै।।

1. 

स्वर्ण जातां का जुलम उड़ै हटकै दिया दिखाई सै

ऊँची जात आले चौधरी दलितां की बस्ती जलाई सै

पुलिस भी हाजिर थी उड़ै जिब आग लगाई सै

एम पी के छोरे नै उड़ै अपफवाह खूब फैलाई सै

स्वयंभू पंचायत नै फेर हटकै नै रंग दिखाया रै।।

गोहाना मैं दलितां उपर जुलम कसूता ढाया रै।।

2. 

दो दिन पहलम हुया पंचायत का फतवा जारी

डीसी एसपी सोवैं तान कै जनता बस्ती छोड़गी सारी

पंचायती नहीं गेरे जेल मैं या गलती कर दी भारी

ना बस्ती मैं पुलिस बिठाई क्यों अकल मारी थारी

मिल सबनै दलितां तै सबक सिखाना चाहया रै।।

गोहाना मैं दलितां उपर जुलम कसूता ढाया रै।।

3. 

सब कुछ साहमी हुया पुलिस देखती रही खड़ी

स्वर्ण जात की हिम्मत दलित बस्ती मैं आण बड़ी

धूं-धूं करकै घर जलगे चौगरदे थी आग पड़ी

इस कांड तैं दलितों ऊपर थी या घणी जुल्म घड़ी

सोच समझ प्लान बणा कै गया सै काण्ड रचाया रै।।

गोहाना मैं दलितां उपर जुलम कसूता ढाया रै।।

4.  

साल की आजादी मैं किसी आजादी पाई या

दलितां पै जुलम बढ़े सरकार नहीं शरमाई या

एक बाल्मीकि के कारण बस्ती सारी क्यों जलाई या

मानवता के बणे रूखाले हवा जहरी चलाई या

कलम कांपण लागी रणबीर घणा दुख पाया रै।।

गोहाना मैं दलितां उपर जुलम कसूता ढाया रै।।

गरीब अमीर का मेल नहीं

 गरीब अमीर का मेल नहीं, बकरी शेर का खेल नहीं,सही कातल नै जेल नहीं , बीर मर्द की रखैल नहीं,जी छोडै अमर बेल नहीं, या दुनिया कहती आई।।

1
बिना शिक्षा के ज्ञान नहीं,
बिना ज्ञान हो सम्मान नहीं
टोहवां हम असल सच्चाई , जो सबकी साहमी आई,कमेरे की हो खाल तराई, जानै सरतो और भरपाई,या बात गई आजमाई, नहीं मनै झूठ भकाई।।
2
बिना मणि के नाग नहीं,
बिना माली के बाग नहीं
लुटेरे बिना हो ना लूट , और कोए ना बोवै फुट,सबर का यो प्यावै घूंट, नयों हमनै यो खावै चूट,यो फेर दिखावै सै बूट, कदे समझ नहीं पाई।।
3
बिना सुर के राग नहीं,
बिना घर्षण के आग नहीं
दफन सभी फ़रयाद हुई, घनी लीलो बरबाद हुई,कबूल नहीं फ़रयाद हुई, मेहनत सारी खाद हुई, कमजोर म्हारी याद हुई, न्यों या नौबत ठाई।।
4
ना बिना पदार्थ कुछ साकार,
ना बिना तत्व गुणां का सार
ये नीति इसी चाल रहे, बिछा हम पर जाल रहे,बिकवा घर का माल रहे, सब ढालां कर काल रहे,गलूरे बना ये लाल रहे, रणबीर की शामत आई।।
1989

किसानों की 7 रागनी

 चौदह दिन होगे किसानों नै दिल्ली मैं डेरे डाल रहे।

तीन कानून जो पास करे सैं किसानी कै घर घाल रहे।
1
पूरी और लाम्बी तैयारी करकै आज किसान आये सैं
अनुशासन घणे गजब का समझदार घणे पाये सैं
किसानी और जनता एकता बणा गजब की ढाल रहे।
तीन कानून जो पास करे सैं किसानी कै घर घाल रहे।
2
हिन्दू मुस्लिम सिख ईसाई आपस में हैं भाई भाई
इसकी ताकत के आगै भाजपा सरकार घबराई
या एकता घणे गजब की इसके ऊपर चाल रहे।
तीन कानून जो पास करे सैं किसानी कै घर घाल रहे।
3
अडानी अम्बानी की खातिर किसानों की कड़ तोड़ दई
सब किमैं बायपास करकै क्यों तीन बिल जोड़ दई
कारपोरेट खेती की खातिर कर जनता को बेहाल रहे।
तीन कानून जो पास करे सैं किसानी कै घर घाल रहे।
4
संघर्ष की रही पकड़ी आर पार की लड़ाई होवैगी
फुट गेरो संघर्ष पीटो भाजपा सब किमैं झोवैगी
रणबीर सिंह की कलम तै उठ सही सवाल रहे।
तीन कानून जो पास करे सैं किसानी कै घर घाल रहे।
2*****
खाई
खाई चौड़ी होंती आवै सै इसनै आज कौण पाटैगा।
म्हारे किसानों का हाथ सही मैं आज कौण डाटैगा।
बधगी घर घर मैं खाई या बधगी पूरे समाज मैं
देशां के बीच की खाई ना बताते पूरे अंदाज मैं
अमरीका टोप पै रहवण नै तीसरी दुनिया नै काटैगा।
एक देश के भित्तर भी कई ढाल की खाई दीखैं
एक अरबपति बनरया दूजे ये भूखे पेट नै भींचें
शांति कड़े तैं आवैगी जब कारपोरेट इसतै नाटैगा।
लड़ाई बढ़ेगी इस तरियां विनास की राही करकै
पिचानवै हों कठे होंवैंगे चौड़ी होंती खाई करकै
नहीं तो पर्यावरण प्रदूषण सबका कालजा चाटैगा।
लोभ लालच और मुनाफ़ा और बधारे इस खाई नै
समाज गया रसातल मैं चौड़ै भाई  मारै सै भाई नै
रणबीर सिंह समझावै देखो छंद यो न्यारा छांटैगा।
3*****
इस गोदी मीडिया नै किसानों के खिलाफ जहर फैलाया।
जमीनी हकीकत देख कै मोदी भी बहोत घणा घबराया।।
1
वार्ता मैं झुके नहीं किसान अपनी मांग पै अड़े खड़े सै
सरकार के हथकंडे एकता आगै ओछे घणे पड़े सैं
गोदी मीडिया रोज घड़ कै दखे झूठी खबर सै ल्याया।।
जमीनी हकीकत देख कै मोदी भी बहोत घणा घबराया।।

2
कसूता अनुशाषन किसानों का दुनिया देख कै दंग रैहगी
भाजपा की सरकार इनकी गेल्याँ जान बूझ कै क्यों फैहगी
आर पार की लड़ाई खिंचगी किसान नै पूरा प्लान बनाया।
जमीनी हकीकत देख कै मोदी भी बहोत घणा घबराया।।
3
तीन कानून वापसी बिना किसान नहीं  उल्टा जावैगा रै
सांस दिल्ली की सरकार कै यो घणे कसूते चढ़ावैगा रै
कई महिन्यां का इंतजाम करकै किसान दिल्ली मैं आया।।
जमीनी हकीकत देख कै मोदी भी बहोत घणा घबराया।।
4
हिन्दू मुस्लिम सिख इसाई आपस मैं सब सैं भाई भाई 
  जवान किसान जनता एकता की देखो मिशाल बनाई
रणबीर सिंह सोच समझ कै नै यो छंद तुंरत बनाया।।
जमीनी हकीकत देख कै मोदी भी बहोत घणा घबराया।।
4*****
किसानी खातर भारत बंद आज कसूता होवैगा।।
आज हिंदुस्तानी किसान बीज एकता के बोवैगा।।
1
कारपोरेट के खिलाफ छेड़ दई जंग पूरी देखो
सरकार इसकी तलहडू सै करै जी हजूरी देखो
आर पार की लड़ाई होगी ,मोदी नई झूठ टोहवैगा।।
आज हिंदुस्तानी किसान बीज एकता के बोवैगा।।
2
जात धर्म इलाके पर लड़वा कै तेज कररे लूट म्हारी
किसानों और मजदूरों कै दे दी आछे तरियां बुहारी
तीन बिल किसान विरोधी ,मोदी देश नै डबोवैगा।।
आज हिंदुस्तानी किसान बीज एकता के बोवैगा।।
3
निजीकरण करकै सारे महकमे  बेच रहया सै
अडानी अम्बानी के निशाने पै टेक रहया सै
संविधान की परवाह कोण्या, समान देश का खोवैगा।।
आज हिंदुस्तानी किसान बीज एकता के बोवैगा।।
4
समझ बूझ तै सँघर्ष को आगै लेज्यावैंगे भाई
या नब्बे दस की लड़ाई जीत कै दिखावैंगे भाई
रणबीर सिंह बरोने आला नए नए छंद पिरोवैगा।।
आज हिंदुस्तानी किसान बीज एकता के बोवैगा।।
5*****
विवेक तैं सोचां
किसानो थारे बरगा विज्ञानी मनै कोए भी नहीं पाया।।
थारे अनुभव तैं थामनै खेती मैं खूब नाम कमाया।।
भैंस खरीदी जब थामनै धार काढ कै देखी बताई
बुलध खरीदया थामनै सार काढ़ कै देखी बताई
अगवा पिछवा हवा हिसाब हमेशा ही थामनै लगाया।।
पर मण्डी मैं जाकै बेबस विज्ञान काम नहीं आया रै
भा नै देकै मारे धरती कै जी थारा घणा दुःख पाया रै
कदे समझलयो लूट की जड़ जात्यां मैं किसान बंटाया ।।
पंजाब का किसान बोल्या आतंकवादी कैहकै पीटया
हीर गुजर जाट मैं बाँट हरियाणे का किसान भींच्या
किसान की तोड़ एकता जात्यां पै आपस मैं भिड़ाया ।।
अम्बानी अडानी की लूट रणबीर जारी रहैगी देखो
जात्यां मैं बंटी किसानी कितनी पिटाई सहैगी देखो
जात पात का पहरा चश्मा विवेक चश्मा थारा बगाया ।।
6****
चीनी मील
खेत मैं ईंख खड्या सै, चीनी मील बन्द पड्या सै।
टोटा घरां आण बड्या सै, नहीं दीखै कोए राही।।
1. मेहनत करकै बाहये खेत जी लाकै बोई गंडेरी थी
  ईंख नुलाया शिखर दोफेरी मेरी गैल मरी भतेरी थी
  पात्ते हाथ चीरगे म्हारे रै, हम ईंख बांधण चाहरे रै
  इसपै घणी आशा लारे रै, बेटी की करी सगाई।।
2. मील आल्यां नै पर्ची ना दी मारया मारया फिरता रै
  अपमान करैं कम तोलैं कहर मेरे पर गिरता रै
  ईंख आज मेरा सूक रहया, कुछ मनै ना सूझ रहया
  अजीत पै मैं बूझ रहया, करी क्यों म्हारी तबाही।।
3. मुलायम सिंह जुग-जुग जीयो भा बढ़िया दिया म्हारा
  कल्याण सिंह नै दागी गोली मारया किसान बिचारा
  कांग्रेस कै पटकी मारांगे, मुलायम पै सब कुछ वारांगे
  पार वामपंथ नै तारांगे, बीजेपी की श्यामत आई।।
4. जातपात का भ्रम टूटैगा , किसान एकता जिन्दाबाद
  अमीरां की चाल समझगे या मुनाफाखोरी मुर्दाबाद
  संघर्ष का बिगुल बजाया रै, यो झण्डा लाल उठाया रै
  रणबीर नै राह दिखाया रै, गजब की करी कविताई।।
7*****
किसान आत्मनिर्भर देश बनाया ज्यान हथेली पै धरकै रै।।
किसान तै पढ़ण बिठाया तीन बिल आज पास करकै रै।
1
किसानी संकट बढ़ा दिया ईब  कड़ै बिलां मैं बड़गे रै
के मजबूरी थी तमनै क्यों ये बिल पास करने पड़गे रै
गिहूं गोदामां मैं सड़गे रै चुहे खागे बोरी नै कुतर कै रै।।
किसान तै पढ़ण बिठाया तीन बिल आज पास करकै रै।।
2
पहलमै फांसी खा खाकै किसान मरण लाग रहे थे
कारपोरेट के काले ये इनकै लड़ण नाग रहे थे
किसान ईब जाग रहे सैं हक लेंवैंगे चाहे मर कै रै।।
किसान तै पढ़ण बिठाया तीन बिल आज पास करकै रै।।
3
बिन किसान ना खेती बताई बिन खेती उद्योग कड़ै
क्यूकर देश बढ़ैगा आगै इतना दुखी किसान जड़ै
मुंह खोलना जरूर पड़ै पानी गया म्हारे सिर पर कै रै।।
किसान तै पढ़ण बिठाया तीन बिल आज पास करकै रै।।
4
मजदूर विरोधी बिल ल्याये इसकी ना मजबूरी बताई
कारपोरेट की गोज भरी म्हारी करी चाहवैं खूब खिंचाई
पार्लियामेंट मैं मोहर लवाई लडांगे लड़ाई समर कै रै।।
किसान तै पढ़ण बिठाया तीन बिल आज पास करकै रै।।
5
भारत का किसान दुखी हुया फसल पिटगी चौड़े मैं
चांद तो कदे बी मांग्या ना करया सै गुजर थोड़े मैं
अम्बानी के घमोड़े मैं कोण्या मरैं किसान पसर के रै।।
किसान तै पढ़ण बिठाया तीन बिल आज पास करकै रै।।
किसान तै पढ़ण बिठाया तीन बिल आज पास करकै रै।।
6
बिना एकता ना काम चलै पिट्या किसान न्यारा-न्यारा
जातपात और गोत नात पै बांटया कैहकै यारा प्यारा
रणबीर सिंह साथ देगा थारा उठियो संघर्ष पूरा करकै रै।।
किसान तै पढ़ण बिठाया तीन बिल आज पास करकै रै।।




एमबीबीएस की फीस बढ़ाई, या चालीस लाख करी बताई,

 हरि के हरियाणे मैं

एमबीबीएस की फीस बढ़ाई,
या चालीस लाख करी बताई,
जनता की करी सै खिंचाई,
हरि के हरियाणे में।।
बॉण्ड पालिसी करड़ी ल्याये ,
जनता कै आज सांस चढ़ाये
करजा चढज्यागा भारी भाई
बैंक का खटका भारी भाई
डूंडी पिटदी म्हारी भाई,
हरि के हरियाणे मैं।।
धरती चढ़ै लाल स्याही मैं,
यो परिवार फ़ँसै तबाही मै
सरकारी घंटी सै खुड़की,
शहर चाहे गाम रूड़की,
फीस करावै म्हारी कुड़की,
हरि के हरियाणे मैं।।
या बढ़ी फीस नाश करैगी,
जनता बिन इलाज मरैगी
देवैगी घरां के मैं बुहारी, ,
सरकार देखो धुम्मा ठारी ,
ईब श्यामतआवैगी भारी,
हरि के हरियाणे मैं।।
महंगी होन्ती जागी पढ़ाई रै,
रणबीर मरैंगे बिना दवाई रै
दुख होज्याग्या भारया रै
मन बी होज्याग्या खारया रै,
नहीं कोये रास्ता पारया रै,
हरि के हरियाणे मैं।।

फीस बढ़ा कै परेशान कर दिए बची इब कति समाई कोण्या।।*

 समाई कोण्या*

*फीस बढ़ा कै परेशान कर दिए बची इब कति समाई कोण्या।।*
*क्यावण दिन होगे हड़ताल पै सरकार नै करी  सुनाई कोण्या।।*
1
कुर्बान होज्यांगे पर झुकां नही न्यू मिलकै कसम खाई
डॉक्टर छात्रों की आवाज आज पूरे देश मैं पहूंचाई
*बांड कानून मंजूर नहीं हम होण देवैं और तबाही कोण्या।।*
क्यावण दिन होगे हड़ताल पै सरकार नै करी  सुनाई कोण्या।।
2
लूटैं बनकै म्हारे हितेषी इब आज आंख म्हारी खुलगी
फीस अर बांड कानूनों मैं जमा लूटैं तस्वीर हमनै मिलगी
*कहते यो बांड थारे भले मैं हमनै पाई वा भलाई कोण्या।।*
क्यावण दिन होगे हड़ताल पै सरकार नै करी  सुनाई कोण्या।।
3
एमबीबीएस की फीस बढ़ाकै नै म्हारी जेब पै बोझ धरैं
बालक क्युकर बनैंगे डॉक्टर इस बात नै वे ना सोच करैं
*खावैं हमनै दीमक की ढालां चाहते म्हारी भलाई कोण्या।।*
क्यावण दिन होगे हड़ताल पै सरकार नै करी  सुनाई कोण्या।।
4
सारे कालेजों नै करी एकता संघर्ष जबरदस्त चला रहे
कितणी ए लाठी गोली चलाओ नहीं पाछै कदम हटा रहे
*रणबीर बरोणे आले की रहै पाछै आज कविताई कोण्या।।*
क्यावण दिन होगे हड़ताल पै सरकार नै करी  सुनाई कोण्या।।





मेडिकल छातर आंदोलन की दी हरियाणे मैं गूंज सुनाई रै।।*

 


लड़े हैं जीते हैं , लड़ेंगे जीतेंगे
*मेडिकल छातर आंदोलन की दी हरियाणे मैं गूंज सुनाई रै।।*
*इनकी कुर्बानी चौवण दिन की आज पूरा रंग ल्याई रै।।*
1
विद्यार्थी आंदोलन कारण सरकार नै धरती भिड़ी होगी
पांचों कालेज कट्ठे होकै लड़े जनता भी तार सही पिरोगी
*हरियाणा सरकार आपा खोगी विद्यार्थियों नै धूल चटाई रै।।*
2
पीजीआईएमएस नै हुंकार भरी गैल दूजे कालेज भी आये फेर
आरडीए भी गेल्याँ आगी जन संगठन भी ना पाछै पाये फेर
*एकता के हाथ बढ़ाये फेर या सरकार भी घनी घबराई रै।।*
3
विद्यार्थी एकता तोडण नै घणे हथकंडे अपनाये थे
मेडिकल छात्र समझे चाल इनकी ना बहका मैं आये थे
*हर कदम पै हौंसले दिखाए थे एकता कसूत बढ़ाई रै।।*
4
एक लड़ाई लड़े सैं जीते सैं हम आगै भी लड़ेंगे जीतेंगे
हड़ताल के ये दिन याद रहैंगे आड़े का समों नहीं भूलेंगे
*ईब जमकै पढ़ाई करेंगे रणबीर करी तुरत कविताई रै।।*

सृष्टि बारे सब धर्मां नै न्यारा-न्यारा अन्दाज लगाया।

 



सृष्टि बारे सब धर्मां नै न्यारा-न्यारा अन्दाज लगाया।
देवी भगवती पुराण न्यों बोले एक देवी संसार रचाया।।
ब्रह्राा के भगत जगत मैं ब्रह्रा को जनक बताते भाई
शिव पुराण का किस्सा न्यारा शिव जी जनक कहाते भाई
गणेश खण्ड न्यों कहवै गणेश जी दुनिया चलाते भाई
सुरज पुराण की दुनिया सुरज महाराज घुमाते भाई
विष्णु आले न्यों रुक्के मारते विष्णु की निराली माया।।
देवी भगवती पुराण न्यों बोले एक देवी संसार रचाया।।
विष्णु और महेश के चेले दुनिया मैं घणे बताये देखो
आपस मैं झगड़ा करकै कई बै सिर फड़वाये देखो
आपस की राड़ मेटण नै त्रिमूर्ति सिद्धांत ल्याये देखो
ब्रह्राा पैदा करैं विष्णु पालैं शिव नै संहार मचाये देखो
बाइबल नै सबतै हटकै पैगम्बर का नाम चलाया।।
देवी भगवती पुराण न्यों बोले एक देवी संसार रचाया।।
यो बुद्धमत उभर कै आया त्रिमूर्ति का विरोध किया
जैन मत बी गया चलाया नहीं दोनों को सम्मान दिया
यहूदी और धर्म ईसाई एक ईश्वर को धार लिया
इस्लाम नै एक खुदा मैं अपणा लगाया फेर हिया
दुनिया मैं माणस नै एक ईश्वर सिद्धान्त पनपाया।।
देवी भगवती पुराण न्यों बोले एक देवी संसार रचाया।।
बिना सोचें समझें इसाइयां नै परमेश्वर गले लगाया सै
मुसलमान क्यों पाछै रहवैं यो अल्लाह हाकिम बनाया सै
सिक्खां नै शब्द टोह लिये औंकार झट दे सी सुनाया सै
हिन्दुआं नै तावल करकै नै ओइम दिल पै खिनवाया सै
माणस एक पर धर्म इतने जीवन क्यूकर जावै बिताया।।
देवी भगवती पुराण न्यों बोले एक देवी संसार रचाया।।

यो सूचना का हक म्हारा किसनै दबाया सै।।

 यो सूचना का हक म्हारा किसनै दबाया सै।।

सबनै यो हक मिलै सवाल जगत मैं छाया सै।।
1
समाज के विकास मैं ज्यां खपाई जनता नै
भुखे पेट रैह कै भी  करी सै कमाई जनता नै
पेट भराई जनता नै कड़ै यो खाणा थ्याया सै।।
सबनै यो हक मिलै सवाल जगत मैं छाया सै।
2
आह भरैं बदनाम होज्यां उनका कत्ल माफ सै
कब्जा किसका सूचना पै बात कति साफ सै
बिना रिजाई के लिहाफ सै किसा जमाना आया सै।।
सबनै यो हक मिलै सवाल जगत मैं छाया सै।।
3
सौ रपीये चाले दिल्ली तैं पन्दरा थ्यावैं हमनै रै
पिचासी गए कड़ै ना कोये बी बतावैं हमनै रै
धौंस तैं दबावैं हमनै रै जी घणा दुख पाया सै।।
सबनै यो हक मिलै सवाल जगत मैं छाया सै।।
4
एक टन कपास मैं यो धागा कितना निकलता रै
रणबीर धागे का लत्ता फेर कितना बनता रै
हिसाब नहीं मिलता रै ज्यां कलम उठाया सै।।
सबनै यो हक मिलै सवाल जगत मैं छाया सै।।

सौ प्रतिशत प्रमोशन खातर डॉक्टर

 सौ प्रतिशत प्रमोशन खातर डॉक्टर फिरते मारे मारे।।

कुछ नीचे तैं कूद कै उप्पर आवण नै इंटरव्यू चाहरे।।
1
इंटरव्यू की तैयारी करली फ़ाइल मैं कागज धरकै नै
कई डॉक्टर जोर लगारे हांडें बैग मैं पीसे भरकै नै
जोर आजमाई करकै नै प्रोफेसर बणण की आशा लारे।।
कुछ नीचे तैं कूद कै उप्पर आवण नै इंटरव्यू चाहरे।।
2
एक दूजे तैं कम्पीटीशन होग्या मैरिट का ज़िकरा पावै कोण्या
अपना सिफ़ारसी दूजे ताहिं कति कोये बतावै कोण्या
उणनै रोटी जमा भावैं कोण्या मंत्रीयां के घरां धक्के खारे।।
कुछ नीचे तैं कूद कै उप्पर आवण नै इंटरव्यू चाहरे।।
3
इंटरव्यू कैंसल होगे खबर पढ़ी अखबार मैं देखो
सारयां नै खुशी मनाई मातम मच्या दो चार मैं देखो
सब कुंदन आले बुखार मैं देखो प्रोफेसर बुड़बुडाते जारे ।।
कुछ नीचे तैं कूद कै उप्पर आवण नै इंटरव्यू चाहरे।।
4
मैडीकल मैं कसूता रूक्का माचग्या इसा किसनै चाला रोप्या
कूदन आले डॉक्टर तीस मारखां कहै पीठ मैं छुरा घोंप्या
रणबीर सही रोक्या ना तै मारे जाते कई डॉक्टर बिचारे।।
कुछ नीचे तैं कूद कै उप्पर आवण नै इंटरव्यू चाहरे।।
(कुछ साल पहले की घटना पर आधारित रागनी। उस वक्त प्रोफेसर की पोस्ट पर इंटरव्यू का सिलसिला था। 100 प्रतिशत प्रमोशन की संघर्ष हुई थी)

साल 2023

 साल 2023

आपा धापी माची रही पूरा बाइस का साल लिकड़ग्या।।
जात धर्म पै झगड़ण का राह दीखै तेईस भी पकड़ग्या ।।
1
ये घर बणे तबेले लोगो रही माणस की खोड़ नहीं
सोच तै परहेज करैं बात का टोहते क्यों औड़ नहीं
झूठ पै चालै पूरी दुनियां सच्चाई नै अंधविश्वास
जकड़ग्या।।
जात धर्म पै झगड़ण का राह दीखै तेईस भी पकड़ग्या ।।
2
मेहनत करी कमेरयां नै विज्ञान नै राह दिखाया
या दुनिया बदल दई घणा खून पसीना बाहया
लालची नै डाण्डी मारी आज कमरे कै साहमी अकड़ग्या।।
जात धर्म पै झगड़ण का राह दीखै तेईस भी पकड़ग्या ।।
3
न्याय की बात भूलगे नहीं ठीक करया बंटवारा
पांच सितारा होटल दूजे कान्ही यो फूटया ढारा
समाज का म्हारा भाईचारा आज घणा कसूता बिगड़ग्या।।
जात धर्म पै झगड़ण का राह दीखै तेईस भी पकड़ग्या ।।
4
टीवी पै सपने हमनै आज खूब के दिखाये जावैं
रणबीर तै लालच दे कै उल्टे प्रचार कराये जावैं
मेल मिलाप भूल गए माणस अपने आप के मैं सुकड़ग्या।।
जात धर्म पै झगड़ण का राह दीखै तेईस भी पकड़ग्या ।।

दिल्ली आल्यो--120 ----

 दिल्ली आल्यो

बाइस मैं दिये ये बोल तीन सौ साठ दिल्ली आल्यो।
तेईस मैं तै सुनियो बात म्हारी देखैं बाट दिल्ली आल्यो।।
1
खत्म म्हारी करदी पढ़ाई थाम कति बोलते कोण्या
मरण लागरे बिना दवाई थाम कति सोचते कोण्या
जुबां कति खोलते कोण्या होगे लाट दिल्ली आल्यो।।
2
इसी नीति अपनाई बाइस मैं किसान सड़कों पै आरया
घर उजाड़ कै आज म्हारा अडानी अम्बानी का सजारया
तमनै आम जन यो मारया तोल कै घाट दिल्ली आल्यो।।
3
म्हारे बालक सरहद पै अपनी ज्यान खपावैं रोज
थारे घूमैं जहाजां मैं म्हारे खेत खान कमावैं रोज हम भूख मैं टेम बितावैं थारे सैं ठाठ दिल्ली आल्यो।।
4
बहोत घणी चीजां की रणबीर सीम ये खोल दई
ये भैंस और बकरी सब बिकवा बिन मोल दई
मचा बाइस मैं घनी रोल दई गया बेरा पाट दिल्ली
आल्यो।।

नए साल 2023 की चुनौती*

 नए साल 2023 की चुनौती*

*फासीवाद का शिकंजा सत्ता नए साल मैं बढावैगी।।*
*इसके विरोध मैं या जनता सड़कां के ऊपर आवैगी।।*
1
यो बेरोजगारी का मुद्दा इसका कितै बी जिकर कोन्या
फांसी खा खाकै किसान मरैं इसका कोय फिकर कोन्या
*एमएसपी पै हटकै किसानी
अपने रंग दिखावैगी।।*
*इसके विरोध मैं या जनता सड़कां के ऊपर आवैगी।।*

2
शिक्षा म्हंगी इलाज महंगा गरीब जमा निचौड़ दिया
असंगठित मजदूर मारया सारा कानून मरौड़ दिया
*मजदूर कर्मचारी यूनियन दिल्ली मैं विरोध जतावैगी।।*
*इसके विरोध मैं या जनता सड़कां के ऊपर आवैगी।।*
3
पुलवामा कदे सीएए ल्यावैं जात धर्म पै बांट रहे
आर्थिक संकट के हल तैं शाह मोदी जी नाट रहे
*नये साल मैं बैर आपस का सत्ता और घणा बधावैगी।।*
*इसके विरोध मैं या जनता सड़कां के ऊपर आवैगी।।*
4
जात धर्म पै लडां नहीं हम असली मांग उठावांगे
हो एकजुट नए साल मैं हम धर्मान्धता नै हरावांगे
*देश की जनता मिलकै रणबीर बहुविविधता बचावैगी।।*
*इसके विरोध मैं या जनता सड़कां के ऊपर आवैगी।।*

अमरीका और धनी देश ये दुनिया मैं मौज करैं देखो

 अमरीका और धनी देश ये दुनिया मैं मौज करैं देखो

भारत बरगे गरीब देश ये क्यों भूखे आज मरैं देखो
1
पाउडर लिपस्टिक पै ये छह अरब डॉलर फूंकैं सैं
यूरोप मैं नौ अरब डॉलर की कुल्फी खाणी ना चूकें सैं
बारां अरब का इतर खरचैं उड़ै छिदे ए माणस उकैं सैं
सतरां अरब खावैं कुत्ते आड़ै भूखे बालक सूकैं सैं
लूट लूट कै म्हारी कमाई ये अपणे घर भरैं देखो
2
मनोरंजन पै अरब पैंतीस डॉलर खर्च जापान मैं
सिगरेट पै पचास अरब डॉलर यूरोप खरचै श्यान मैं
एक सौ पांच अरब डॉलर दारू खर्चा यूरोप महान मैं
दवा नशीली चार सौ अरब की पीते पूरे ही जहान मैं
हमनै भी ढ़बबै गेरैं सैं ये म्हारै बात नहीं जरैं देखो।।
3
इनकी नकल करणिया की भारत मैं कोये औड़ नहीं
धनी देश ये डांडी मारते उनका पाया कोये तोड़ नहीं
ये डब्ल्यू टी ओ तैं दाबैं हमनै बच्या कोये भी ठोड़ नहीं
हथियार बनावैं दवा नशीली फैशन मैं कोये जोड़ नहीं
विकास की सही राही कोण्या विनाश रही डिंग धरैं देखो।।
म्हारे देश मैं दलाल इनके बड्डे साहूकार बताये सैं
इनकी गेल्याँ मिलकै इननै म्हारे खेत क्यार पिटवाये सैं
अपनी मौज बधावण नै म्हारे रोजगार घटवाये सैं
किसानों पै फांसी लावण नै युद्ध का हथियार ल्याये सैं
लिखता रणबीर सिंह साची बैठे महलां मैं डरैं देखो।।
(कई साल पहले की रचना है। आंकड़ों में कुछ बदलाव हो सकता है)

किसा हो साल तेईस का*

 *किसा हो साल तेईस का*

*लालच लूट खसोट बचै नहीं इसा तेईस का साल चाहवाँ ।।*
*धर्म का जहर खेल रचै नहीं हम इसा इन्सान बनावां।।*
1
नई तरां का इन्सान उभरै नई तरां के म्हारे समाज मैं
नई बात और बोल नए कहे जाँ नये सुर और साज मैं
*बीमारी कम होज्यावैं विज्ञान नै लोक हित मैं लगावां।।*
धर्म का जहर खेल रचै नहीं हम इसा इन्सान बनावां।।
2
दोगली शिक्षा का खात्मा हो ज्ञान पिटारा इन्सान होज्या
नाड़ काट मुकाबला ना रहै एक दूजे का सम्मान होज्या
*नशा खोरी नहीं टोही पावै इसका नामों निशान मिटावां।।*
धर्म का जहर खेल रचै नहीं हम इसा इन्सान बनावां।।
3
मुनाफा मंजिल नहीं रहै ना चारों तरफ घमासान मचै
लाठी की भैंस नहीं रहै ना हथियारों का सम्मान बचै
*प्रदूषण यो कम करकै धरती शमशान होण तैं बचावां।।*
धर्म का जहर खेल रचै नहीं हम इसा इन्सान बनावां।।
4
महिला नै इंसान समझैँ रीत खत्म हों दोयम दर्जे की
नौजवानों नै मिलै सही रास्ता ना मार बचै इस कर्जे की
*जात पात खत्म हो रणबीर सारे कै हम बिगुल बजावां।।*
धर्म का जहर खेल रचै नहीं हम इसा इन्सान बनावां।।

2023 का नया साल

 *2023 का नया साल*

*आज नया साल शुरू होग्या हर हिंदुस्तानी इसमैं के चाहवै रै ।।*
*बेरोजगारी कति खत्म होज्या स्वास्थ्य शिक्षा सबनै मिल ज्यावै रै।।*
1
आंदोलन कारी किसानों को म्हारा सै क्रांतिकारी सलाम भाई 
जो किसान म्हारे शहीद होगे इतिहास मैं होग्या नाम भाई
*बाइस मैं भी संघर्ष जारी था सरकार  वायदे नहीं पुगावै रै।।*
*बेरोजगारी कति खत्म होज्या स्वास्थ्य शिक्षा सबनै मिल ज्यावै रै।।*
2
देश मैं इंसानियत हटकै उभरै हम इस साल मैं हाँगा लावांगे
म्हारा प्रजातंत्र फेर हुँकार भरै मिलकै संविधान नै बचावांगे
*इस लड़ाई का राह हमनै यो किसानी संघर्ष सही दिखावै रै।।*
*बेरोजगारी कति खत्म होज्या स्वास्थ्य शिक्षा सबनै मिल ज्यावै रै।।*
3
कदर जनता की आवाज की हटकै आवै म्हारे हिंदुस्तान मैं
इज्जत होवै गरीब कमेंरे की होज्या शांति पूरे ही जहान मैं
*हो गजब का हिंदुस्तान म्हारा जनता ये नारे आज गूंजावै रै।।*
*बेरोजगारी कति खत्म होज्या स्वास्थ्य शिक्षा सबनै मिल ज्यावै रै।।*
4
इस साल मैं ईसा माहौल बनै इंसान नै पूरा सम्मान मिलै
कहै रणबीर नहीं लुटैं कमेरे उन सबका हट कै चेहरा खिलै
*इसकी खातर करां संघर्ष शहीद भगत सिंह  राह दिखावै रै।*
*बेरोजगारी कति खत्म होज्या स्वास्थ्य शिक्षा सबनै मिल ज्यावै रै।।*

Ranbir Singh Dahiya

इंगवायनल हरनिया

 इंगवायनल हरनिया

हरनिया की या मेरी बीमारी इसका पूरा हाल सुनाऊँ मैं।।
मेरी गेल्याँ के के क्युकर बीती आज सारी खोल बताऊँ मैं।।
1
नला मेरा सूज ज्यावै जिब काम हांगे का करणा होज्या
मुश्किल तैं चाल सकूं सम्भल सम्भल पां धरणा होज्या
कई बै उप्पर नै चढ़ै कोण्या दुख मैं मनै मरणा होज्या
काम होवै ना ताने लागैं घूंट सबर का भरणा होज्या
पड़या खाट मैं सोचें जां मुश्किल तैं उप्पर नै चढ़ाऊँ मैं।।
2
रोहतक मैडीकल चाल्या जा खरखोदे आले न्यों बोले रै
मैडीकल हत्थे का जिब नाम सुण्या मेरे पां जमा डोले रै
पीस्यां का इंतजाम राखिए मेरे कान कईयाँ नै खोले रै
सलाह मशवरे दिए जो वे मनै अपने हिसाब तैं तोले रै
चार बार तो पड़या जावणा पांचवैं जाकै दाखिल हो जाऊं मैं।।
3
परेशन की तैयारी शुरू होगी वार्ड मैं सब ताण कै सोगे
ज्यों ज्यों हुया सबेरा भाई मेरे होंश हवश सब खोगे
निर्णाबासी मरूं भूखा ये ड़ाक्टर बिघन कसूते बोगे
टेबल पै लिटा न्यों बोले ये एस टी सैगमेंट मूंधे होगे
मेरे परेशन की तै टाल होगी पड़या छात कैड़ लखाऊँ मैं।।
4
हटकै ईसीजी करवाई मेरी सबकिमैं ठीक बताया रै
आगले परेशन आले दिन मैं  टेबल पै फेर लिटाया रै
करौंठ दिवाकै कड़ साफ करी टीका कड़ मैं लगाया रै
पाहयाँ मैं कीड़ी सी चाली मेरा सब लत्ता तरवाया रै
बड्डा डॉक्टर कहवै छोटे नै ल्या तेरा हाथ साफ कराऊँ मैं।।
5
परेशन होग्या वार्ड मैं आग्या पेशाब का जोर होग्या
सारी बिध लाकै देखी मनै पर दर्द मेरै घनघोर होग्या
डॉक्टर नै एक टीका लगाया पेट पाटण नै और होग्या
सहज सहज पेशाब उतरया कम पेट का शोर होग्या
रणबीर दो दिन पाछै छुट्टी देदी डॉक्टरां के गुण गाऊँ मैं।।

खाणक

 खाणक

खाणक नै स्याहमी ल्यादी किसनै चौड़ै लूट मचाई।।
एक पाले मैं काम करणिये दूजे पालै ये लुटू अन्याई।।
1
अंग्रेजों नै ढाका मैं कारीगरां पै घणे जुल्म ढवाये थे
थाण मलमल के गोरयां नै सड़कों पै फिंकवाये थे
भारत देश कै उप्पर घणे काले कानून लगवाये  थे
विरोध मैं जो सिर उठया उसपै लठ बरसवाये
थे
यो जुल्मी राज हटावण नै भगत सिंह नै फांसी खाई ।।
2
देश आजाद हुये पाछै हमनै मेहनत खूब करी देखो
जंगल काट खेत बनाये सूकी जड़ फेर हुई हरी देखो
खाणक नै पहाड़ तोड़े हथेली उप्पर ज्यान धरी देखो
म्हारी मेहनत रंग ल्याई देश की तिजूरी थी भरी देखो
मुट्ठी भर की चांदी होगी म्हारे बालक रहे बिना पढ़ाई।।
3
सहज सहज देश मैं काला धन फेर छाण लग्या भाई
अमरबेल की ढ़ालां यो धोले धन नै खाण लग्या भाई
भ्रष्ट नेता गुंडे मिलगे समाज तले नै जाण लग्या
भाई
इसका काला छाया म्हारे खाणक मैं आण लग्या
भाई
इस काले धन नै म्हारा खाणक लूटण की स्कीम बनाई।।
4
खाणक कई गामां का सदियों तैं पेट पालता आया
क्यों इन पेटां नै जमा भूलगे खाणां का ठेका उठवाया
ठेकेदारों नै मचाई तबाही यो लूट का नाका लगवाया
माल की बिक्री तै कम होगी यो मजदूर गया दबाया
रणबीर बरोनिया नै सही तस्वीर इब खींच कै दिखाई।।