पोलीथीन

पोलीथीन
पोलीथीन नै म्हारे देश  शहर का कर दिया बंटा धार
                          देखियो के होगा।।
नहीं गलै ना पिंघलै लोगो धरती पर तै मिटै नहीं
खेत क्यार का नाश करै नुकसान करण तै हटै नहीं
म्हारे जिस्यां पै उटै नहीं या पोलीथीन की मार
                          देखियो के होगा।।
कागज के लिफाफे म्हारे कति पढ़ण नै बिठा दिये
सन के थैले खूंटी टांगे मजे किसानां तै चखा दिये
सस्ते दामां बिका दिये इंहका इसा चढ़या बुखार
                          देखियो के होगा।।
गली नाली मैं जा कै जिब ये रोक लगादे भारी सै
गन्दे नाले बैक मारज्यां फैलै घणी बीमारी सै
न्यों होवै पीलिया महामारी सै माचै घणी हाहाकार
                          देखियो के होगा।।
बढ़िया वातावरण बिना म्हारा रैहणा मुश्किल होज्या गा
के बेरा किसका बालक न्यूं मौत के मुंह में सोज्या गा
रणबीर सही छन्द पिरोज्या गा सही प्रचार, देखियो के होगा।।