किसान आंदोलन सफल होणा हम ताहिं क्यों घणा जरूरी।।

 किसान आंदोलन सफल होणा हम ताहिं क्यों घणा जरूरी।।

सफल हुया तै बात पक्की यो तोड़ेगा कारपोरेट की गरूरी।।
1
ऐकले जमीनी किसानों का यो रोला नहीं बताया सुणियो
बकरी पालन भी इसमैं यो कहैं शामिल दिखाया सुणियो
मछली पालन बाहर कोण्या कानून भीतर आया सुणियो
पशु पालन भी जोड़ राख्या बताओ के बच पाया सुणियो
खेत मजदूर की खत्म होवैगी या थोड़ी घणी जो मजदूरी।।
सफल हुया तै बात पक्की यो तोड़ेगा कारपोरेट की गरूरी।।
2
सोचां कट्ठे बैठ कानूनों बारे आछ भूंड की पहचान करां
किसान आंदोलन की मदद ठीक गलत पै ल्याण धरां
म्हारे घर मैं ना बचै चांदना जै अंधेरा छाया किसान घरां
चाले कर दिए सरकार नै जिसकी बड़ाई बेउन्मान करां
अडानी अम्बानी की तलहैडू सै या उनकी करती जी हजूरी।।
सफल हुया तै बात पक्की यो तोड़ेगा कारपोरेट की गरूरी।।
3
किताब एक सौ छह पन्यां की पेज छह पै या बखान करै
कृषि बाजार ताहिं सौंप रहे कारपोरेट का गुणगान करै
सब्सिडी सारी खत्म होवैगी सरकार मदद तैं प्रस्थान करै
छोटे व्यापारी कमजोर वर्ग नै ओन लाइन खरीद परेशान करै
इन सारी बातां नै समझ गई ये भरपाई सरतो और अंगूरी।।
सफल हुया तै बात पक्की यो तोड़ेगा कारपोरेट की गरूरी।।
4
किसनी का बड़ा हिस्सा फेर बेरोजगार होज्यागा भाई
गाम की बेरोजी का आंकड़ा यो बेशुमार होज्यागा भाई
देहात के संकट तैं दुखी यो छोटा व्यापार होज्यागा भाई
घणा असन्तोष बढ़ ज्यागा आड़े हाहाकार होज्यागा भाई
रणबीर किसान जीत कै करै काबू सरकार की सारी फतूरी।।
सफल हुया तै बात पक्की यो तोड़ेगा कारपोरेट की गरूरी।।