अंग्रेज हुकूमत ताहिं दी चुनौती पहली ठारा सो सतावन मैं।।

 अंग्रेज हुकूमत ताहिं दी चुनौती पहली ठारा सो सतावन मैं।।

उन्नीस सौ उन्नीस मैं चुनौती दूसरी आवै सै गावण मैं।।
1
सबक सिखावन नै हमको डायर जुल्मी तिलमिला गया था
रोलेट एक्ट खत्म करो हड़ताल देख कै बौखला गया था
बच्चा बुढ़ा कुलमुला गया था झेले कष्ट अंग्रेज भजावण मैं।।
उन्नीस सौ उन्नीस मैं चुनौती दूसरी आवै सै गावण मैं।।
2
इस पाछै तो भारत सारा आजादी खातर कूद पड़या था
पाली हाली क्लर्क बाबू जाड़ भींच कै खूब लड़या था
उधम लन्दन मैं जा बड़या था ओडायर तैं हिसाब चुकावण मैं।।
उन्नीस सौ उन्नीस मैं चुनौती दूसरी आवै सै गावण मैं।।
3
तेरा अप्रैल का दिन था कट्ठे बाग मैं नर नार हुए थे
काले कानून उल्टे लेओ वे लड़ने खातर तैयार हुए थे
पैने अंग्रेज के हथियार हुए थे म्हारी आवाज दबावण मैं।।
उन्नीस सौ उन्नीस मैं चुनौती दूसरी आवै सै गावण मैं।।
4
फेर बख्त की धार बदलगी जलियाँ वाले बाग के म्हां
सारे हिंदुस्तानी कूद पड़े थे आजादी आले फाग के म्हां
रणबीर कूद पड़े आग के म्हां देश नै आजाद करावण मैं।।