36 दिन हड़ताल

 36 दिन *********

समाई कोण्या
फीस बढ़ा कै खावण लागरे बची इब कति समाई कोण्या।।
छत्तीस दिन होगे हड़ताल पै सरकार नै करी  सुनाई कोण्या।।
1
कुर्बान होज्यांगे पर झुकां नही नयूं मिलकै कसम खाई
डॉक्टर छात्रों की आवाज आज पूरे देश मैं पहूंचाई
बांड कानून मंजूर नहीं हम होण देवैं और तबाही कोण्या।।
छत्तीस दिन होगे हड़ताल पै सरकार नै करी  सुनाई कोण्या।।
2
लूटैं बनकै म्हारे हितेषी इब आंख आज म्हारी खुलगी
फीस अर बांड कानूनों मैं जमा लूटैं तस्वीर हमनै मिलगी
कहते यो बांड थारे भले मैं हमनै पाई वा भलाई कोण्या।।
छत्तीस दिन होगे हड़ताल पै सरकार नै करी  सुनाई कोण्या।।
3
एमबीबीएस की फीस बढ़ाई तैं म्हारी जेब पै बोझ धरैं
बालक क्युकर बनेंगे डॉक्टर ना इस बात नै हम  सोच मरैं
खावैं हमनै दीमक की ढालां चाहते म्हारी भलाई कोण्या।।
छत्तीस दिन होगे हड़ताल पै सरकार नै करी  सुनाई कोण्या।।
4
सारे कालेजों नै करी एकता संघर्ष जबरदस्त चला रहे
कितणी ए लाठी गोली चलाओ नहीं पाछै कदम हटा रहे
रणबीर बरोणे आले की रहै पाछै आज कविताई कोण्या।।
छत्तीस दिन होगे हड़ताल पै सरकार नै करी  सुनाई कोण्या।।