नशे की लत माड़ी
एक बै आदत पड़ज्या तो छूटै ना कितने ऐ ताण तुड़ा ले ॥
मुश्किल होज्या ऐब छुड़ाणा चाहे कितनी ऐ कसम दुआ ले ॥
1
तम्बाकू की लत होज्या तो कैंसर रोग की खुलज्या सै राही
दमा बधै और साँस रोग भी मचावै बुढ़ापे मैं घणी तबाही
खांसी बलगम तड़कै ऐ तड़क माणस नै खूबै ऐ रूआ ले ॥
मुश्किल होज्या ऐब छुड़ाणा चाहे कितनी ऐ कसम दुआ ले ॥
2
दारू की लत का काम बुरा पूरे हरियाणा मैं छागी देखो
माणस की इस लत के कारण महिला दुःख पागी देखो
गैंग रेप बढे हरियाणा मैं या गिरती साख कौन बचा ले ॥
मुश्किल होज्या ऐब छुड़ाणा चाहे कितनी ऐ कसम दुआ ले ॥
3
पर नारी की लत कसूती घर परिवार बर्बाद करै
महिला पुरुष के रिश्त्यां मैं या कसूता खटास भरै
नहीं छूटै या लत मनास की चाहे कोए कितना ऐ समझाले ॥
मुश्किल होज्या ऐब छुड़ाणा चाहे कितनी ऐ कसम दुआ ले ॥
4
ताश खेलण की लत बढ़ी हरियाणे के गामां की गालों मैं
जुए की लत नै द्रोपदी का चीर हरण कराया दरबारों मैं
असर होवैगा पूरा जै कोए रागनी पूरे सुर के मैं गा ले ॥
मुश्किल होज्या ऐब छुड़ाणा चाहे कितनी ऐ कसम दुआ ले ॥
5
कई लड़के और लड़की भी ये कई लत्तां के शिकार हुए
समाज सुधार की जरूरत ये रणबीर सिंह के विचार हुए
कुछ पुलिस नेता अफसर हुए ये लत खोरों के रखवा ले ॥मुश्किल होज्या ऐब छुड़ाणा चाहे कितनी ऐ कसम दुआ ले ॥
No comments:
Post a Comment