आज नया साल शुरू होग्या इसमैं नया हिंदुस्तान के चाहवै सै।
किसानी संघर्ष जरूर जीतैगा जिकरा रोज सुणण मैं आवै सै।
1
आंदोलन करते किसानां तै म्हारा सै क्रांतिकारी सलाम भाई
जो किसान म्हारे शहीद होगे इतिहास मैं होवैगा नाम भाई रोजाना जोश म्हारे किसानां का बहोत घणा बढ़ता जावै सै।
2
देश मैं इंसानियत हटकै उभरै हम इस साल मैं हाँगा लावांगे
म्हारा प्रजातंत्र फेर हुँकार भरै किसानां का साथ निभावांगे इस लड़ाई का राह हमनै यो किसानी संघर्ष सही दिखावै सै।
3
कदर जनता की आवाज की हटकै आवै म्हारे हिंदुस्तान मैं
इज्जत होवै गरीब कमेंरे की होज्या शांति पूरे ही जहान मैं
हो गजब का भारत म्हारा सारी जनता जमकै नारा लावै सै।
4
इस साल मैं ईसा माहौल बनै किसान नै पूरा सम्मान मिलै
कहै रणबीर नहीं लुटैं कमेरे उन सबका हट कै चेहरा खिलै
आज किसान मोर्चे की जीत नए समाज की राह बतावै सै।
No comments:
Post a Comment