मुनाफाखोर कम्पनियां

मुनाफाखोर कम्पनियां नै स्वास्थ्य सेवा ढांचा कब्जाया 
पाणी बिकता खाणा महंगा घणा प्रदूषण आज फैलाया 

सरकारी पै लगाम लगावैं प्राइवेट नै आज बढ़ावा देते 
जनता धक्के खा सरकारी मैं प्राइवेट घणे पिस्से लेते 
दवा मशीन करदी महंगी आज मार गरीब घणी खेते 
पीसे आले की ज्यान बचै हम बिना इलाज मौत सेहते 
बीमारियां का औड़ नहीं कदे डेंगू कदे स्वाइन फ्लू आया 

कितै कमी नर्सों की कितै डॉक्टर घणे कम बताये रै 
कितै कमी दवाईयां की कितै औजार कम ल्याए रै 
कितै दिन रात काम करते कितै कामचोर भी पाये रै 
चोर नै तो सजा कोण्या ईमानदार बार बार सताए रै 
घर बेच इलाज पड़ै कराना जै चाहते ज्यान बचाया 

कीट नाशकों करकै देखो जिंदगी मुश्किल होती जारी 
आर एम पी डॉक्टर गामां मैं ये स्टेराइड ख़िलावैं भारी 
ब्लड प्रेस्सर और शूगर की घर घर के माँ बीमारी छारी 
वातावरण प्रदूषण बढ़या बढ़ी कैंसर दमे की बीमारी 
ऊपर तैं जादू टोने टोटके गरीब इणनै घणा भरमाया 

एम्पेनलमेंट पै प्राइवेट इलाज लेते ये कर्मचारी 
इन हस्पतालों मैं जाती म्हारी अफसरशाही सारी 
लाखां मैं इलाज हार्ट अटेक का बचै जिसकी जेब भारी 
कई बीमा कम्पनी देखो ये भ्रष्टाचार का ऊधम मचारी 
रणबीर मुनाफेखोरी नै म्हारी सेहत का धुम्मा ठाया