शरीर मोस्या

इतनी छोरियां का शरीर मोस्या ,पूरे गाम नै भरोसा खोस्या 
कद किसका शरीर जावै मोस्या , यो माहौल बदल्या गाम का 
घर घर मैं दारू आन बड़ी पूरी बोतल रोजाना पीनी जरूरी 
पीकै करते पिटाई घर मैं मिट्ज्या लिहाज शरम की दूरी
नादान छोरी शिकार होज्यां , पियकड़ कंट्रोल जमा खोज्यां
बिन ब्याही रोज दुखड़े ढ़ोज्यां, यो माहौल बदल्या गाम का
गाम की छोरी भान सबकी यो झूठा जुमला कर दिया रै
डाकटर बताते बिन ब्याही पर आज हमला कर दिया रै
बालक गिरवावन आते घरके चुप रहते बेइज्जती तैं डरते
माटी गेरन की बात ये करते , यो माहौल बदल्या गाम का
शादी शुदा गेल्याँ के के हो इसके लिखे जा सकते खाते ना
रिवाल्वर आले बदमाश टोल जबरी ठावण मैं देर लगाते ना
या भृष्ट पुलिश साथ निभाती, उल्टा महिलावां नै धमकाती
बेरा ना क्यूँ आवाज ना ठाती , यो माहौल बदल्या गाम का
महिला के फैशन बारे मैं कई कई फरमान सुनाये जावें रै
दारू पर क्यों चुपी साध रहे नए नए ठेके खुलाये जावैं रै
रणबीर सिंह का दिल भारी, महिला पै संकट बढ़ती जारी
आवाज उठाओ सब नर नारी, यो माहौल बदल्या गाम का