Saturday, 12 May 2018

सलाम सफ़दर को

सलाम सफ़दर को 
समाज की खातर मरने आले आज तलक तो मरे नहीं ||
कुर्बान देश पर होने वाले कदे कभी किसी से डरे नहीं ||
सफ़दर की हांसी हवा मैं आज भी न्योंये गूँज रही
चारों धाम था मच्या तहलका हो दुनिया मैं बूझ रही 
बैरी को नहीं सूझ रही पिछले गढ़े इब्बऐ भरे नहीं ||
मीडिया मैं जगहां बनाई विडीयो बढ़िया त्यार करी थी
खिलती कलियाँ के महां बात सही हर बार करी थी 
जवानी उसकी हुंकार  भरी थी गलत काम कदे करे नहीं ||
जितनै जीया सफ़दर साथी जीया जमा जी भर कै नै 
था लेखक बढ़िया अदाकार नुकड़ रच्या कोशिश कर कै नै 
निभाया वायदा मर कै नै जुल्मों से सफ़दर डरे नहीं ||
एक सफ़दर नै राह दिखाई हजारों सफ़दर आगे आवैंगे 
माला हाश्मी बनी सै चिंगारी घर घर मैं अलख जगावैंगे 
फिरकापरस्ती तैं टकरावैंगे रणबीर म्हारे कलम जरे नहीं ||

जय तै काम चलै ना

एकली जय तै काम चलै ना आज बताऊ सूं
उस महामानव का संघर्ष जाणो न्यू समझाऊं सूं।

था वो ज्योति बा का प्यारा
शिक्षा संगठन संघर्ष नारा
उसके बिन था कडै गुजारा इतिहास उठाऊं सूं •••

सहे थे जुल्म घणे तन मन मैं
दुभात होई बहोत घणी बचपन मैं
कुंदन बण्गया सोना तपकै याद दुवाऊं सूं••

न्याय नीति का बांधया पाला
बणया संविधान रचावण आला
नारी शूद्र का गाला मनुवाद लिखाऊं सूं ••

जला दई चौड़े मनुस्मृति
संविधान मैं ला ल्यो सुरती 
तुरता फूर्ति विक्रम राही गीत बणाऊं सूं ••

पोल खोल

पोल खोल हल्ला बोल का जनता नै नारा अपनाया रै।।
पांच  साल के भाजपा के इस राज पै सवाल उठाया रै।।
1
भाजपा नै खूब बहकाये  इब जनता सबक सिखावै 
अपने वोट के दम ऊपर वोटर इसनै जरूर हरावै
किसानी संकट बढ़ा दिया किसान फांसी पै चढ़ाया रै।।
पांच साल के भाजपा के इस राज पै सवाल उठाया रै।।
2
तेईस मई नै जनादेश का यो नतीजा सामनै आवैगा 
भाजपा की सरकार को वोटर तो जरूर हरावैगा 
मजदूर किसान नै मिलकै संघर्ष का बिगुल बजाया रै।।
पांच साल के भाजपा के इस राज पै सवाल उठाया रै।।
3
भाजपा हराओ देश बचाओ यो नारा देश मैं छाज्या  
नौजवान इंक़लाब जिंदाबाद का जमकै नारा लाज्या
भाजपा नै नफरत का देश मैं कसूता माहौल बनाया रै 
पांच साल के भाजपा के इस राज पै सवाल उठाया रै।।
4
चौकस रैहणा होगा जनता  जात धर्म पै नहीं बंटैगी
हटकै आगी भाजपा तो  म्हारी आजादी पूरी कटैगी   
   
रणबीर सोच समझ कै नै आज गया  छंद बनाया  रै।।
पांच साल के भाजपा के इस राज पै सवाल उठाया रै।।

सौ से ज्यादा संगठन


सौ से ज्यादा संगठन कट्ठे होकै संघर्ष का बिगुल बजारे सैं।।
बीस करोड़ तैं ज्यादा मैम्बर इनके झंडे तलै आरे सैं।।
1 
सन चौदा मैं जनता नै जिन नीतियों को ठुकराया देखो
इन चार सालों मैं वेहे नीति जोर तैं आगे बढ़ाया देखो
साम्प्रदायिकता की कटारी और घणी तेज चलारे सैं।।
बीस करोड़ तैं ज्यादा मैम्बर इनके झंडे तलै आरे सैं।।
2
प्रो कॉर्पोरेट गरीब विरोधी मोदी जी थारी नीति बताई
आत्म निर्भरता हिंदुस्तान की अखाड़ बाढै उखाड़ बगाई
थारी नीतियां करकै माणस साथ मैं डांगर भी रंभारे सैं।।
बीस करोड़ तैं ज्यादा मैम्बर इनके झंडे तलै आरे सैं।।
3
बेरोजगरी पूरे हिंदुस्तान मैं रोजाना बढ़ती जारी देखो 
नौजवानों आगै अँधेरा छाया इनपै निराशा छारी देखो 
युवक कुछ युवतियां धुत थारे कारण होते जारे सैं।।
बीस करोड़ तैं ज्यादा मैम्बर इनके झंडे तलै आरे सैं।।
4
डिफेंस मैं सौ प्रतिशत एफडीआई थारी सरकार ल्याई
कृषि खुदरा व्यापार मैं भी छाती जारी सै एफडीआई
रणबीर सिंह बरगे ज्यां करकै आज कलम उठारे सैं ।।
बीस करोड़ तैं ज्यादा मैम्बर इनके झंडे तलै आरे सैं।।

कर्ज

लिए कर्ज के मैं डूब, हमनै तिरकै देख्या खूब,
 ना भाजी म्हारी भूख, लुटेरयां नै जाल बिछाया, हे मेरी भाण
1. ज्यों.ज्यों इलाज करया मर्ज बढ़ग्या म्हारा बेबे
  पुराने कर्जे पाटे कोण्या नयां का लाग्या लारा बेबे
  झूठे सब्जबाग दिखाये, अमीरां के दाग छिपाये
  गरीबां के भाग लिवाये, कर सूना ताल दिखाया,  हे मेरी भाण
2. विश्व बैंक चिंघाड़ रहया घरेलू निवेश कम होग्या
  म्हंगाई ना घटती सखी, गरीबी क्यों बढ़ती सखी
   जनता भूखी मरती सखी, नाज का भण्डार बताया हे मेरी भाण
3. जल जंगल और जमीन खोस लिए म्हारे क्यों
  सिरकै उपर छात नहीं दिए झूठे लारे क्यों
  आदिवासी तै मार दिया, किसानां उपर वार किया
   कारीगर धर धार दियाए बेरोजगारी नै फंख फैलाया, हे मेरी भाण
4.इलाज करणिया डाक्टर बी खुद हुया बीमार फिरै
  सुआ लवाल्यो सुवा लवाल्यो करता या प्रचार फिरै
  होगी महंगी आज दवाई, लुटगी सारी आज कमाई
  रणबीर सिंह बात बताई, खोल कै भेद बताया,  हे मेरी भाण

लेफ्ट राइट

लेफ्ट राइट की खिंचती आवै विचारों की लड़ाई देखो
लेफ्ट गरीबों का हिम्माती राइट अमीरों की बताई देखो 
1
लेफ्ट कहता सबका देश यो भारत देश हमारा देश
सब धर्मों के वासी आड़े ये रहते आये बिना क्लेश 
बहु विविधता भारत की सब रंगों का है समावेश 
किसान मजदूर रीढ़ इसकी ये नदी पहाड़ विशेष 
जल जंगल जमीन की देवै आड़े मौज दिखाई देखो 
2
आजादी की जंग मैं संघ नै गोरयाँ का साथ निभाया 
हिन्दू राष्ट्र का नारा लगाकै देश विभाजन कराया 
जिन्हां नै भी अंगद पैर पाकिस्तान ऊपर जमाया 
हिन्दू राष्ट्र का नारा हरेक देशवासी नै ठुकराया 
कश्मीरियों नै भी देश खातर हथियार उठायी देखो
3
कांग्रेस नै राज सम्भाल्या राह पूंजीवादी अपनाया रै
जनतंत्र का नारा देकै नै देश का संविधान बनाया रै
आजादी पाछै आत्मनिर्भर विकास का रास्ता चाहया रै
बड़े बड़े कारखाने चाले मजदूरों नै पसीना बहाया रै
किसानों नै कदम बढ़ाये देश मैं रवानगी आई देखो 
4
बंगाल त्रिपुरा केरल मैं वामपंथ नै जोर पकड़या
ढीला करया शिकंजा जो अमीर चाहवै था जकड़या
भूमि सुधार लागू करने मैं बंगाल केरल आगै लिकड़या 
फासीवादी विचार भाजपा के वाम पंथ साहमी अकड़या 
भाजपा नै साम्प्रदायिकता की रणबीर मुहीम बढ़ाई देखो 

रोहनात

Tuesday, 1 May 2018

नया नव जागरण --440 ----

नया नवजागरण
दलित महिला नौजवान मिलकै आज नया हरियाणा बणावैंगे ।।
अपना खोया आत्म सम्मान हांसिल कर दुनिया नै दिखावैंगे।।
1
पूंजीवादी विकास की राही या देखियो खाई और बढावैगी रै
गरीब जावै और भी सताया अमीर की पीठ थप थपावैगी रै
कुप्रचार समाज वाद के बारे हम जनता के साहमी ल्यावैंगे।।
2
इस राही नै देखो अमरीका आज कति पढ़ण बिठा दिया रै
हटकै मंदी का दौर छाया दुनिया मैं तहलका मचा दिया रै
किसान मजदूर सब कट्ठे होकै क्रांति का बिगुल बजावैंगे।।
3
देशी और अमरीकी कारपोरेट नै बणा यो गठजोड़ लिया
एसी जिंदगी जीवैं खुद ये गरीब तैं कति नाता तोड़ लिया
जात धर्म पै बांट कै दुनिया ये कितने दिन ऐश उड़ावैंगे।।
4
राज बदलना आसान आड़े सिस्टम बदलना आसान नहीं
सिस्टम ना बदलै जिब तक हो कट्ठा मजदूर किसान नहीं
कहै रणबीर ये दोनूं मिलकै साझला नया साज बजावैंगे।।

सुभाष बोस

पार्क मैदान में युवक कांग्रेस के अधिवेशन में नेताजी सुभाष चन्द्र बोस ने कहा तो फिर क्या हमें बैलगाड़ी के बीते युग की ओर वापस जाना है? आत्मा के पाखण्ड को इतना पुष्ट किया जा रहा है कि भौतिक संस्कृति और फौजी प्रशिक्षण की उपेक्षा करके भी उन्हें लगता है सब ठीक चल रहा है। इस पावन भूमि के लिए मठ और आश्रम की कल्पना कोई नई नहीं है। सन्यासियों और सुपात्रों को इस माट्टी में सदैव आदर का स्थान प्राप्त होता रहा है और आगे भी होता रहेगा । परन्तु मैं युवाओं को चेतावनी देता हूँ कि यदि एक आधुनिक , स्वतंत्र , सुखी और शक्ति -सम्पन्न भारत का निर्माण करना है , तो हमें इस मंडली का अनुशरण नहीं करना है। इसके लिए पुरातन प्रभाव से मुक्त होकर नवयुग का शंख फूंको।
क्या बताया भला कवि ने------
पार्क मैदान मैं सुभाष नै ये अपने विचार सुनाये रै।।
युवाओं को ललकारया उसनै क्रांति के नारे गूँजाये रै।।
1
बोस नै युवा संगठन का उड़ै मतलब समझाया था
निठल्ले बेजान युवाओं का यो संगठन नहीं बताया था
सामाजिक सेवासंघ भी कोण्या बोस नै पाठ पढ़ाया था
अंग्रेज राज का विरोधी धधकता अंगार सुझाया था
रूस चीन जर्मनी के किस्से उड़ै पूरे खोल कै बताये रै।।
2
बोल्या अंग्रेजों नै चौतरफा करदी घेरेबंदी म्हारी वीरो
इम्पीरियल बैंक नै देश की करदी नाके बंदी भारी वीरो
कर्ज देने की करी मनाही जनता घणी दुख पारी वीरो
अंग्रेजों तैं छुटकारा पाल्यो ये देगे देश मैं बुहारी वीरो
ठारा सौ सत्तावन मैं भी संघर्ष के बिगुल बजाये रै।।
3
या आवाज बोस की उठी ऊंचे स्तर तलक बताई
साबरमती अर अरविंद के मतां पै सवाल उठाई
आधुनिक स्वतंत्र सुखी देश की या तीजी राह दिखाई
मठ आश्रम बीते समों की उनको सब बात समझाई
पुराने तैं मुक्त होवण नै नवयुग का शंख बजाया रै।।
4
युवकों के दिलो दिमाग मैं सुभाष पूरी तरियां छाग्या रै
भगत सिंह जतीनदास  इनका दस्ता मंच पै आग्या रै
दाढ़ी मूंछों आला नौजवान उड़ै पूरे पण्डाल नै भाग्या रै
सिर्फ अहिंसा के राह पै वो भगत सिंह सवाल ठाग्या रै
कहै रणबीर बरोणे आला सुण कै सुभाष मुस्कुराये रै।।

Tuesday, 24 April 2018

चश्मा जात का --बैरी म्हारा

 
जिस दिन भाईयो यो जात का चश्मा टूटैगा।।
उस दिन पैंडा म्हारा जुल्मी शोषण तैं छूटैगा।।
1
हमनै बाँटन नै बैरी नै हथियार बनाई या
गेहूं के खेत मैं पैदा खरपतवार बताई या
दीवार जै नहीं ढाई या सिर म्हारा फूटैगा।।
उस दिन पैंडा म्हारा जुल्मी शोषण तैं छूटैगा।।
2
म्हारे देश के सब माणस जात्यां मैं बाँट दिए
नयों म्हारी एकता के लुटेरयाँ नै पर काट दिए
समझन तै नाट दिए तो यो लुटेरा हमनै चूटैगा ||
उस दिन पैंडा म्हारा जुल्मी शोषण तैं छूटैगा
3
लुटेरयाँ की जात मुनाफा आंख खोल देख्या ना
लुटेरे एकै बोली बोलें हमने बोल कै देख्या ना
नाप तोल कै देख्या ना मुनाफा खोर न्यूं लूटैगा ||
उस दिन पैंडा म्हारा जुल्मी शोषण तैं छूटैगा।।
4
रणबीर बरोने आला याहे बिनती आज करै सै
नए ज़माने मैं क्यों इसकी कुली आज भरै सै
इस्ते काम ना आज सरै सै इसतैं दूना गल घूंटैगा ||
उस दिन पैंडा म्हारा जुल्मी शोषण तैं छूटैगा।।

जीत गये --बल्ले बल्ले


टी वी ऊपर बैठ कै हमनै लंका भारत लड़े देखे ||
दोनों तरफ के ख़िलाड़ी मैदान के महँ अड़े देखे || 
1
लोग बैठे चारों कान्ही मैदान खचाखच भरया हुया
कोए घरमैं बैठ्या कोए ,एलसीडी साहमी धरया हुया
कोए चुप कोए डरया हुया कई निढाल खड़े देखे ||
दोनों तरफ के ख़िलाड़ी मैदान के महँ अड़े देखे ||
2
श्री लंका नै शुरू करया साँस म्हारी बंद करदी ये
दौ सौ चुहतर रन छः पै बना कै साहमी धरदी ये
असमंजस दिलों मैं भरदी ये चौके छके जड़े देखे ||
दोनों तरफ के ख़िलाड़ी मैदान के महँ अड़े देखे ||
3
जीतेंगे या हारेंगे हम चर्चा जौर की चाल पड़ी या
अपने अपने अंदाजे थे थी मुश्किल तत्काल घडी या
देखै जनता बेहाल खड़ी या कई मजबूत बड़े देखे ||
दोनों तरफ के ख़िलाड़ी मैदान के महँ अड़े देखे ||
4
सचिन और सहवाग गये मायूसी घनी छागी फेर
धोनी और गंभीर नै जंग थामन मैं ना लाई देर
लंका के ख़िलाड़ी करे ढेर मूंधे मूंह कई पड़े देखे ||
दोनों तरफ के ख़िलाड़ी मैदान के महँ अड़े देखे ||
5
भारत की देख इसी एकता धयान दिल मैं आया यो
भ्रष्टाचार ख़त्म होज्या जै इतना ऐका करकै भजाया यो
रणबीर सिंह गीत बनाया यो छंद तुरत घड़े देखे ||
दोनों तरफ के ख़िलाड़ी मैदान के महँ अड़े देखे ||

औ दिन कद आवैगा

घर मैं सुनायी हो म्हारी औ दिन कद आवैगा ॥ 
मार पिटाई बंद हो सारी औ दिन कद आवैगा ||
1
रोटी कपडा किताब कापी नहीं घाट दिखाई देंगे 
चेहरे की त्योरी मिटजयां सब ठाठ दिखाई देंगे
काम करण के फेर पूरे घंटे आठ दिखाई देंगे
म्हारे बालक बने हुए मुल्की लाठ दिखाई देंगे
कूकै कोयल बागां मैं प्यारी औ दिन कद आवैगा ||
मार पिटाई बंद हो सारी औ दिन कद आवैगा ||
2
दूध दही का खाना हो बालकां नै मौज रहैगी
छोरी माँ बापां नै फेर कति ना बोझ रहैगी
तांगा तुलसी नहीं रहै दिवाली सी रोज रहैगी
बढ़िया व्यव्हार हो ज्यागा ना सिर पै फ़ौज रहैगी
ना हो औरत नै लाचारी औ दिन कद आवैगा ||
मार पिटाई बंद हो सारी औ दिन कद आवैगा ||
3
सुल्फा चरस फ़ीम का ना कोए भी अमली पावै
माणस डांगर जिसा ना रहै ना कोए जंगली पावै
दान दहेज़ करकै नै दुःख ना कोए बी बबली पावै
पीस्सा ईमान नहीं रहै ना कोए नकली पावै
होवें बराबर नर और नारी औ दिन कद आवैगा ||
मार पिटाई बंद हो सारी औ दिन कद आवैगा ||
4
माणस के गल नै माणस नहीं कदे बी काटैगा
गाम बरोना रणबीर का असली सुर नै छाँटैगा
लिख कै बात बबिता की सब दुःख सुख बांटैगा
वोह तो पापी होगा जो इसा सुनने तै नाटैगा
राड़ ख़तम हों म्हारी थारी औ दिन कद आवैगा ||
मार पिटाई बंद हो सारी औ दिन कद आवैगा ||

फ्लोरेंस नाइ टिनगेल


फ्लोरेंस नाइटिनगेल नै दुखिया का दुःख बांट्या हे 
वा अपना दर्द भूल गयी दुज्याँ का दर्द काट्या हे
1
वर्ल्ड वार मैं घायल फ़ौजी उनकी सेवा खूब करी 
दिन रात कदे ना देखे हथेली उप्पर ज्यान धरी
जितने फ़ौजी अस्पताल मैं सबका ए दिल डाट्या हे
वा अपना दर्द भूल गयी दुज्याँ का दर्द काट्या हे
2
दवा पट्टी और देख भाल दिल लगा करी उसनै
निराश फौजियाँ मैं फेर जीने की आश भरी उसनै
लालटेन आली नाइ टिनगेल का सबनै बेरा पाट्या हे
वा अपना दर्द भूल गयी दुज्याँ का दर्द काट्या हे
3
मानव सेवा मरीज की सेवा रास्ता उन्नै दिखाया हे
मानव प्रेम का सन्देश यो दुनिया के मैं पोंह्चाया हे
लालटेन तै करी रोशनी अँधेरा जग का छानट्या हे
वा अपना दर्द भूल गयी दुज्याँ का दर्द काट्या हे
4
नर्सिंग प्रोफेशन को भी दुनिया मैं सम्मान दिवाया
अवरोध घने पार करे यो करकै नै कमाल दिखाया
मानव सेवा तै रणबीर नहीं दिल उसका नाट्या हे ||
वा अपना दर्द भूल गयी दुज्याँ का दर्द काट्या हे

नक्सलवाद कितै पाकिस्तान

नक्सलवाद कितै पाकिस्तान ये जवान म्हारे झोंक दिए 
अडानी अम्बानी की खात्तर ये किसान म्हारे ठोक दिए 
1
शासक तंत्र का खेल दखे नहीं म्हारी समझ मैं आया रै
देश भक्ति के नाम पै जवान फ्रंट उप्पर लड़वाया रै
खेत मैं किसान दोफारे के मां यो पस्सीने पोंछता पाया रै
सरहद की रुखाली कराई खेत मैं हाँगा लगवाया रै
हक मांगे जिब जिब जनता नै चढ़ा सूली की नोक दिए।
2
दोनूंआं की देश सेवा तैं देखो अम्बानी का पेट फुलवाया
हमनै आवाज उठाई तो दोनूं फ्रण्टों पै हमें धमकाया
या किसी देशभक्ति जिसनै आज गरीब संकट बढ़ाया
सोचो जवानों और किसानों तमनै किसका राज बचाया
जिब हम बोलैं तो कहते ये कौन देशद्रोही भोंक दिए।
3
बेरा ना कितने किसान म्हारे ज्यान अनसमझी मैं खोगे
म्हारे देश के भक्त बेरा ना आज कित तान कै सोगे
हक मांगैं वे देशद्रोही देश लूटैं वे देश प्रेमी होगे
जात पात पै बांट दिए कमेरे ये बीज बिघ्न के बोगे
म्हारे संघर्षों के सारे रास्ते बांट बांट कै देखो रोक दिए।
4
देश द्रोह करणीये वे सैं जो हक छीन रहे किसानों के
देश द्रोही भक्त बणे हांडै आज हिमाती लुटेरे शैतानों के
म्हारे देश प्रेमी किसान क्यों आज शिकार अपमानों के
मुट्ठी भर शैतान क्यों बणे शासक देश मैं इंसानों के
कहै रणबीर छंद बनाकै ये समझा सही श्लोक दिए ।।

जेब कतरे

जेब कतरे धर्मात्मा
इब भूरा बण्या भूरसिंह , उसकै मोहर लगी सरकारी।
ना मानस नै मानस थापै, पुलिस की गेल्याँ लाई यारी।

पल  मैं तोला पल मैं माशा, कदे टाडै कदे छेरै खासा
चित बी मेरी पिट बी मेरी ना पड़ै कदे उल्टा पासा
ठाडे आगै होज्या म्याऊं पर हीने नै धमकावै खासा
घर मैं रहवै गऊ की ढालाँ बाहर करै यो पूरा तमाशा
पहरावे का नहीं ठिकाना हो पेंट कदे हो खद्दर धारी।

पूरा ज्ञानी ध्यानी बनै आरती हनुमान की तारै देखो
पिस्से नै भगवान मानै शेखी दिन रात बघारै देखो
दया धर्म दिखावे ताहिं पराई बीर पै तान्ने मारै देखो
बिना टूम धरें उधार दे ना ब्याज मैं खाल उतारै देखो
चुगली मैं बाप नारद का इनै लोगाँ की अक्कल मारी।

नीत डिगादे एक पैग पै हुया बिन पैंदे का लौटा रै
यार  का बनै यारी बख्त पै बिन बख्त मारै सौटा रै
बात घड़दे तुरत फुरत टोहले कोए बाहणा मौटा रै
अपने मुँह मियाँ मिठू कहै मैं सूँ सिक्का खौटा रै
यारे प्यारे उप्पर चलै उसकी भाई या तलवार दुधारी।

माखी भिंणकैं छिकमा सिनकै जब सत्ता तैं दूरी होज्या
पड़या खाट मैं रहै बाट मैं खत्म सारी गरूरी होज्या
हो बुरा हाल जनों सूने ताल मछली सी मजबूरी होज्या
ना चमक रहे ना दमक रहै झूऱ सिंह तैं यो झूरी होज्या
लिखै रणबीर जब झूरे पै उसकी आंख्यां मैं चिंगारी।

पीजीआई एमएस

कुछ समय पहले की हालत बयान की है। हो सकता है 
अब कुछ नर्स , डॉक्टर और मशीन आ गए हों। हालात 
खराब ही चल रहे हैं सरकार की नीतियों के चलते । क्या बताया भला---
पीजीआई एमएस की सुनियो कथा सुनाऊँ देखो।।
लाम्बी तै लाम्बी लाइन उड़ै ओपीडी मैं दिखाऊँ देखो।।
1
सर्जरी विभाग की हालत सुनकै झटके खाये रै
सीनियर रेजिडेंट बीस चाहियें पर पांच  बताये रै
ये तीन काम करते बीस का नहीं झूठ भकाऊँ देखो।।
लाम्बी तै लाम्बी लाइन उड़ै -------------
2
सात सौ स्टाफ नर्स आज मैडीकल मैं करती काम
नर्स काम नहीं करती मरीज रोज लगावैं इल्जाम
तीन हजार नर्स चाहियें राज की बात बताऊँ देखो।।
लाम्बी तै लाम्बी लाइन उड़ै----
3
बेहोशी विभाग मैं यो टोटा मशीनों का चलता आवै
कम होगी टेबल सर्जन की मरीज लाम्बी डेट पावै
ऑर्डर कर राखे सैं नयूं सालां तैं सुणता आऊं देखो।।
लाम्बी तै लाम्बी लाइन----
4
एक दिन मैं डॉक्टर आड़े डेढ़ सौ मरीज झेलता रै
दूजे देश का डॉक्टर उड़ै पन्दरा मरीज देखता रै
डॉक्टर मरीज भिड़ें आड़े कितनी भिड़ंत गिनाऊँ मैं।।
लाम्बी तै लाम्बी लाइन --------
5
मुख्यमंत्री मुफ्त इलाज योजना बेरा ना कित पड़ी सै
इसके लागू करने मैं चीज कुणसी या आण अड़ी सै
डिमांड सप्लाई का गैप यो किसकै जिम्मे लगाऊँ देखो।।
लाम्बी तैं लाम्बी लाइन---------
6
राष्ट्रीय बीमा योजना क्यों बन्द करदी पीजीआई मैं
पेशेंट वेलफेयर कमेटी क्यों ढीली होरी कार्यवाही मैं
गरीब का ना और ठिकाना दिल की बात सुनाऊँ देखो।।
लाम्बी तैं लाम्बी लाइन ---------

तोड़ की बात


स्वास्थ्य और शिक्षा का यो सरकार नै बजट घटाया रै
स्वामीनाथन रिपोर्ट नाटगे किसान फांसी पै चढ़ाया रै
1
विश्व बैंक मुद्रा कोष गेट की तिग्गी मार गहरी करती
बदेशी पूंजी देशी कारपोरेट म्हारी कष्ट कमाई चरती
पन्दरा लाख काले धन तैं म्हारी गौज क्यों नहीं भरती
महंगाई तैं ध्यान हटाणे नै दंगे करवाने तैं नहीं डरती 
मेल देशी बदेशी पूंजी का साम्प्रदायिकता तैं बिठाया रै
स्वास्थ्य और शिक्षा का यो सरकार नै बजट घटाया रै
2
पब्लिक सेक्टर ऊपर इसका हमला घणा भारी देखो
प्राइवेट सैक्टर की चाँदी सरकार बणी महतारी देखो 
42 लाख करोड़ बारा साल मैं सब्सिडी जारी देखो
अम्बानी के तलवे चाटते मजदूरां पै धरी आरी देखो 
सातवें वेतन आयोग का कर्मचारी पै तीर चलाया रै
स्वास्थ्य और शिक्षा का यो सरकार नै बजट घटाया रै
3
हरियाणे मैं भी अपणे वायदे भाजपा जमा भूल गई
राज नशे मैं कसूती ढालां देखो सरकार टूहल गई
पढ़ाई की शर्त का चुनाव पै बणा छाकटा रूल गई
आरक्षण पै खेल खेलकै पकड़ा तबाही नै तूल गई
जाट गैर जाट का जाणकै यो जहर कसूत फैलाया रै
स्वास्थ्य और शिक्षा का यो सरकार नै बजट घटाया रै
4
स्कूली शिक्षा हो चाहे उच्च शिक्षा सारै फीस बधाई सै
सरकारी अस्पतालों मैं भी बिन डॉक्टर इलाज चाही सै
सरकारी नौकरियां पै आज या कसूती कटार चलाई सै
किसान मजदूर मारे धरती कै महिला की भ्यां बुलाई सै
रणबीर लेल्यो सम्भाला विकास नहीं विनास कराया रै
स्वास्थ्य और शिक्षा का यो सरकार नै बजट घटाया रै

लव जिहाद

बीफ गऊ भारत माता आगे असली मुद्दे फैंक बगाये।।
लव जिहाद देश द्रोही गैल कब्रिस्तान नै ठाकै ल्याये।।
1
कितने करोड़ युवाओं को रोजगार दिया बताते कोण्या
गंगा मैया कितनी साफ़ हुई जिकरा कति चलाते कोण्या
बुल्लेट ट्रेन के कोच कितने तैयार करे दिखाते कोण्या
मेक इन इंडिया का के नतीजे लिखे कितै पाते कोण्या
दलित विरोध बढाँते जावैं दलित राष्ट्रपति भी बनाये।।
लव जिहाद देश द्रोही गैल कब्रिस्तान नै ठाकै ल्याये।।
2
कितने दागी नेता जेल गए नहीं कोये हिसाब बताया 
पन्दरा लाख म्हारे खातयाँ मैं आज तलक कोन्या आया
कश्मीर का हाल बुरा करया पीडीएफ तैं हाथ मिलाया
जवानों के खाण पीण मैं यो सुधार थोड़ा बी ना पाया
झूठे इतने वायदे करकै देखो फ़ौज के जवान बहकाये।।
लव जिहाद देश द्रोही गैल कब्रिस्तान नै ठाकै ल्याये।।
3
किसान आमदनी दुगणी करांगे जोर के नारे लगाये थे
डीजल पैट्रोल करांगे सस्ते घणे सब्ज बाग़ दिखाये थे
फांसी नहीं खावण देवांगे जुमले बहोत घणे सुनाये थे
स्वामीनाथन रिपोर्ट लागू करांगे ये सन्देश पहोंचाये थे
गरीबी कति टोही नहीं पावैगी सपन्यां मैं खूब घुमाये।।
4 
ईमानदारों के खाते मैं यो म्हारा भारत देश आया कोण्या
रूपये के मुकाबले यो डॉलर नीचे नै आता पाया कोण्या
स्मार्ट सिटी का नक्शा थारा इस जनता नै भाया कोण्या
बहुविविधता पढ़न बिठा दी यो भाईचारा भाया कोण्या
कहै रणबीर बरोने आला दिमाग लगा मनै छंद रचाये ।।
लव जिहाद देश द्रोही गैल कब्रिस्तान नै ठाकै ल्याये।।

SMART CITY




सम्राट सिटी बण्या तो कौन बसै कौन उजड़ज्यागा ॥ 
किसकी पांचों घी मैं होंगी किसका खेल बिगड़ज्यागा ॥
1
म्हारे गाम की धरती नै सरकार कब्जाना चाहवै सै 
बिकै तीस लाख मैं किल्ला किसान बाधु पाया चाहवै सै 
बिन किल्ले आले लोगों का यो पीतलिया लिकड़ज्यागा ॥ 
किसकी पांचों घी मैं होंगी किसका खेल बिगड़ज्यागा ॥
2 
राजस्थान मैं जाकै खरीदैं चौधरी बीस किल्ले धरती के 
बिना बिसवे आला भटकै हाल बुरे होये सैं सरती के 
किसा बुरा जमाना आया यो गरीब जमा पिछड़ज्यागा ॥ 
किसकी पांचों घी मैं होंगी किसका खेल बिगड़ज्यागा॥ 
3 
पुराने गाम मैं म्हारे पै थोड़ा ए घणा सै रोजगार देखो 
हाल बढ़िया नहीं सैं मुश्किल मैं जीवै परिवार देखो 
नए शहर मैं कून बड़न दे यो असल उड़ै उघड़ज्यागा ॥
किसकी पांचों घी मैं होंगी किसका खेल बिगड़ज्यागा॥ 
4
खेत मजूरी बचै नहीं नए शहर मैं काम मिलै ना भाई 
घरबार रूल ज्यांगे म्हारे यो चेहरा कदे खिलै ना भाई 
रणबीर सिंह की कविताई यो घेरा घणा जकड़ ज्यागा ॥ 

किसकी पांचों घी मैं होंगी किसका खेल बिगड़ज्यागा॥ 

बहुविविधता

बहुविविधता
बहुविविधता म्हारे देश की सुनियो आज सुणाऊं मैं ॥ 
इसपै हमला भारी सै इसनै आज बचाना चाहूँ मैं।।
जिस पत्थर की मूर्ती के पाहयों के मां पड़ते देख 
उन मूर्तियों को मुसलमान कारीगर ही घड़ते देख 
किस कारण फेर ये दोनूं क्यों आपस मैं भिड़ते देख 
मिलजुल पहले की ढालां क्यों ना बीमारी तैं लड़ते देख
म्हारी गंगा जमनी परम्परा हटकै याद दिलाऊं मैं।।
इसपै हमला भारी सै इसनै आज बचाना चाहूँ मैं।।
हिन्दू देवी देवताओं का मुसलमान ही व्यापर करते 
हर सिंगार मूर्तियों का सब मुसलमान तैयार करते 
ताजा ताजा फूल तोड़कै तैयार गले का हार करते 
और भी कई तरियां के ये बढ़िया व्यवहार करते
कदे कदीमी चलती आयी या कारोबार दिखाऊं मैं ॥ 
इसपै हमला भारी सै इसनै आज बचाना चाहूँ मैं ।।
देवी देवताओं उप्पर हिन्दू जो प्रसाद चढ़ाते देखो 
खील पतासे बूरा मखाने मुस्लिम भाई बनाते देखो 
भोग लगाकै देवता का इणनै सारे हिन्दू खाते देखो 
इस तरियां दोनूं मिलकै जीवन सही चलाते देखो 
कोए भावना नहीं सै द्वेष की कोण्या झूठ भकाऊं मैं ।।
इसपै हमला भारी सै इसनै आज बचाना चाहूँ मैं ।।
कदे यात्रा करी सै तमनै कैलाश मानसरोवर जाकै 
हिन्दू यात्रियों का बोझा मुस्लिम ढोता सिर पै ठाकै 
हिन्दू मुस्लिम रहे सैं मिलकै देखल्यो पाछे नै लखाकै 
चूड़ी सिंदूर ये बनाते हैं खुश होती महिला लगा कै
रणबीर विविधता का हुया खूब आदर समझाऊँ मैं ।।
इसपै हमला भारी सै इसनै आज बचाना चाहूँ मैं ।।
ranbir dahiya