म्हारी खोज म्हारी सभ्यता

 -- विज्ञान यूनिवर्सल है 

सारी खोजें बाहर हुई हिंदुस्तान कित सै

घड़ी बंधी जो हाथ पै इटली मैं हुई खोज बताई।।

भाप के इंजन की कर खोज इंग्लैंड नै ली अंगड़ाई।।

1

खुर्दबीन की खोज कदे नीदरलैंड मैं हुई बताई सै

बैरोमीटर तैं टॉरीसैली नै मौसमी खबर सुनाई सै

गुब्बारा सतरा सौ तिरासी मैं हमनै दिया दिखाई सै

टेलीग्राफ की खोज नै फेर फ्रांस की श्यान बधाई सै

गैस लाइट के आणे तैं जग मैं हुई घणी रूसनाई।।

घड़ी बंधी जो हाथ पै इटली मैं हुई खोज बताई।।

2

इटली के पी टैरी नै टाइप राइटर फेर बनाया रै

हम्फ्री डेवी नै लैंप सेफ्टी बणा मॉडल दिखाया रै

माचिस की खोज नै ठारा सौ छब्बीस याद दिलाया रै

साइकिल नै बनाने आला मैकलीन नाम बताया रै

ठारा सौ तितालिस सन मैं फैक्स मशीन गई बनाई।।

घड़ी बंधी जो हाथ पै इटली मैं हुई खोज बताई।।

3

ज्ञान विज्ञान आगै बढ़ग्या नए नए करे आविष्कार

अमरीका नै लिफ्ट खोजी मंजिलां की लागी लार

ठारा सौ बावन मैं फ्रांस मैं वायुयान नै भरी उडार

टेलबेट नै फ़ोटो खींचण की विधि करदी या त्यार

वैज्ञानिक सोच के दाम पै नई नई तरकीब सिखाई।।

घड़ी बंधी जो हाथ पै इटली मैं हुई खोज बताई।।

4

थॉमसन नै वैल्डिंग मशीन अमेरिका में तैयार किया

एडिसन नै बल्ब बिजली जगमगा पूरा संसार दिया

मोटर साइकिल डैमलर नै सड़कों पै फेर तार दिया

उन्नीस सौ बावन मैं हायड्रोजन बम भी सिंगार दिया

रणबीर आगे की फेर कदे बैठ कै करैगा कविताई ।।

घड़ी बंधी जो हाथ पै इटली मैं हुई खोज बताई।।