एक बी पीस्सा

फरवरी पाछै दिया कोन्या एक बी पीस्सा म्हारे तैं।
एमडी बोल्या टोटा आग्या बताती साच्ची बात थारे तै।।
1. बड़े जतन करकै हमनै यो खेत बोया बाहया देख
  गंडेरी बोई खेत म्हारे मैं कई बै कुण्बे नै नुलाया देख
  छोल कै जाड्डे मैं ल्याया देख बुग्गी मांगी मुखत्यारे तैं।।
2. ये मिल के चक्कर काटे कई दिन मैं नम्बर थ्यावै था
  कदे कम तोलैं कदे नुक्स किमै दम नाक मैं आवै था
  रोटी टूक कड़ै भावै था जिब काम चालता उधारे तैं।।
3. पन्दरा हजार खड़े मिल मैं कोए अता पता देन्ता ना
  बाली नेता म्हारा इस बात पै किसे नै बी सेहन्ता ना
  सीएम दरखास्त लेन्ता ना बात करै घणे इशारे तैं।।
4. मिलकै सोचां कष्ट निवारण न्यों पार ना पड़ै म्हारी
  मजबूत संगठन बणा अपणा पेमैंट लेवांगे सारी
  किसानां नै दी किलकारी एमडी आज्या तलै चौबारे तैं।।