बम्बई

कोठा बंगले अर भूखे कंगले बम्बई की तसबीर भाई रै।
मेहनत करता वो भूख मरता दुनिया की तकदीर भाई रै।।
1. समुद्र किनारा शहर प्यारा इसतै आच्छी बात नहीं सै
  महल अट्टारी बनती जारी बिन पीस्से औकात नहीं सै
  पीस्सा ईमान हुया भगवान रही माणस की जात नहीं सै
  इनसान मशीन करले यकीन फुरसत दिन रात नहीं सै
  होटल आलीशान ये बढ़ावैं मान मनै सही तदबीर लड़ाई रै।
2. शिवसेना भाई उड़ै छाई बदमाशी का कोए औड़ नहीं
  माफिया राज बताया आज इसका कहैं कोए जोड़ नहीं
  फिल्मी सितारे टोर बनारे राजकुमार तै घणी मरोड़ नहीं
  सारी बात मिलै फुटपाथ छत नीचे कई करोड़ नहीं
  हुया हैरान मैं करूं बखान परेशान चलता राहगीर भाई रै।।
3. परिन्दा नया टोहलें एक पल मैं जेब साफ करैं
  उपर नीचे नीचे उपर पीस्सा बांट कै इन्साफ करैं
  करैं हद बन्दी और पाले बन्दी ना दूजे नै माफ करैं
  बड़े घराने शाही खजाने लूट का हाफ-हाफ करैं
  नजर आवै इनै कोन छिपावै जो लूट अमीर मचाई रै।।
4. घणी लम्बाई और चौड़ाई इस शहर बम्बई की रै
  उंची इमारत और तिजारत मशहूर शहर बम्बई की रै
  फुटपाथ बतावैं शर्त लगावैं बड्डी शहर बम्बई की रै
  ठगी बतावैं किस्से सुनावैं नामी शहर बम्बई की रै
  सुण कमल या कहै अमन या लिखै रणबीर कतिवाई रै।।