गया चौदा आवैगा पन्दरा

गया चौदा  आवैगा पन्दरा 
उठा पटक घनी देखि दो हजार चौदा  के साल मैं । 
दो हजार पन्दरा  मैं देश जान्ता दिखै बुरे हाल मैं । 
कालेधन का बोलबाला पाछले साल बताया देखो 
घोटाले पर घोटाला यो   सबके साहमी आया देखो 
कांग्रेस को सबक सिखाया देखो गेरदी पातळ मैं । 
जिन बातां का साहरा लेकै भाजपा केंद्र मैं आगी 
मोदी जी की लफ्फाजी एकबै पूरी जनता मैं छागी 
मीडिआ भी रोल निभागी मोदी के छवि उछाल मैं । 
महंगाई तैं ध्यान हटावन नै आर एस एस भड़कावै 
क्लेश हिन्दू मुस्लिम का जागां जागां पै भढ़वावै 
नफरत का जहर फैलावै यू पी बिहार बंगाल मैं । 
मेक इन इंडिया का नारा या बोल दई सरकार नै 
नकेल बदेशी कम्पनियाँ की खोल दई सरकार नै 
जहर घोल दई सरकार नै किसानां के खलिहान मैं । 
रणबीर --28 . 12 . 2014