Wednesday, 24 June 2020

डर कोरोना का

17
Bharat mein korona ka safar 
पहला केस कोरोना का तीस जनवरी नै पाया।।
चैबीस फरवरी ट्रम्प का कार्यक्रम था करवाया।।
1
कोरोना तैं पहली मौत नौ मार्च नै हुई बताई
कई एम एलयां की टोली बंगलूर गई बताई
नौ मार्च नै बंगलूर के मैं गया पूरा खेल रचाया।।
चैबीस फरवरी ट्रम्प का कार्यक्रम था करवाया।।
2
एमपी में बीस मार्च नै कांग्रेस की करी पिटाई
खरीद फरोख्त करकै उसकी सरकार गिराई
तेईस मार्च नै भाजपा नै अपना गुल खिलाया।।
चैबीस फरवरी ट्रम्प का कार्यक्रम था करवाया।।
3
चैबीस मार्च के दिन यो लॉक डाउन लगा दिया
जनता का बड़ा हिस्सा बिन तैयारी फंसा दिया
समझदार समझैगा जै तारीख हिसाब लगाया ।।
चैबीस फरवरी ट्रम्प का कार्यक्रम था करवाया।।
4
लॉक डाउन जनता नै सडकां ऊपर ले आई
दुर्गति हुई कितनी उड़ै बयां ना हो सकै भाई
रणबीर आंकड़ा आज भी यो बढ़ता दिखाया।।
चैबीस फरवरी ट्रम्प का कार्यक्रम था करवाया।।


******//
16
बिना किसे लेखे जोखे के लॉक डाउन बढ़ाया।।
फायदे नुकसान बारे जन को नहीं समझाया।।
1
 सारे मिलकै लॉक डाउन हम सफल करांगे
आस पास के गरीब भाई उनपै ध्यान धरांगे
गरीब जनता ताहिं ना पुख्ता इंतजाम बताया।।
फायदे नुकसान बारे जन को नहीं समझाया।।
2
नई गॉइड लाइन की हमनै आज इंतजार
म्हारा ध्यान करैगी चाहवाँ  म्हारी सरकार
लॉक डाउन मैं झेल्या उसका जिक्र ना आया।।
फायदे नुकसान बारे जन को नहीं समझाया।।
3
आयुर्वेद का काढ़ा पीओ और मौज करो भाई
काढ़ा कित तैं आवैगा इसपै तै गौर करो भाई
ठोस पैकेज गरीब का भाषण मैं कोण्या पाया।।
फायदे नुकसान बारे जन को नहीं समझाया।।
4
 तीन मई ताहिं यो लॉक डाउन रहैगा जारी
सोचो कोरोना की संख्या क्यूं ना रूक पारी
रणबीर राखो होंसला कम होगा इसका साया ।।
फायदे नुकसान बारे जन को नहीं समझाया।।

*******//
डर कोरोना का देखो चारों कान्ही छाया रै।।
सब क्याहें मैं दीखै घनाए उधम मचाया रै।।
1
दरवाजे के हैंडल कै हाथ लगाते डरते
डिब्बे तैं भय लागता इसनै उठाते डरते
बाहर जान तैं डरां राह नहीं कोये पाया रै।।
सब क्याहें मैं दीखै घनाए उधम मचाया रै।।
2
कोरोना की बूंदां नै संसार हिला दिया रै
सोलां लाख तैं आगै आंकड़ा जा लिया रै
एक दूजे तैं डर लागै बख़्त बुरा बताया रै।।
सब क्याहें मैं दीखै घनाए उधम मचाया रै।।
3
कोये किसे की जफी पाने तैं डरता भाई
बालक स्कूल जाने तैं आज तरसता भाई
सबनै इसके इलाज का यो सपना आया रै।।
सब क्याहें मैं दीखै घनाए उधम मचाया रै।।
4
विज्ञान की कांहीं आज सारे लोग ताक रहे
पंडित पुजारी गुपचुप इस कांहीं झांक रहे
रणबीर कहै डर नै सबकै सांस चढ़ाया रै।।
सब क्याहें मैं दीखै घनाए उधम मचाया रै।।

******//
2

कोरोना कोरोना होरी सै दुनिया मैं तहलका मचाया।।
इस वायरस नै सारे कै घणा कसूता भय फैलाया।।
1
सत्तानवैं केस पॉजिटिव आज भारत मैं बताये देखो
आज बन्द बारा राज्यों मैं स्कूल कालेज कराये देखो
बड़े प्रोग्राम नहीं करने यो पूरे देश मैं सन्देश पहुचाया।।
इस वायरस नै सारे कै घणा कसूता भय फैलाया।।
2
डब्ल्यू एच ओ नै कोरोना घोषित करया महामारी
सत्तर दिन बाट देख कै पत्र कर दिया इसनै जारी
कुछ एतिहात बरतनी होवैंगी एक एक कर बताया।।
इस वायरस नै सारे कै घणा कसूता भय फैलाया।।
3
बाहर तैं आवनियाँ की स्केनिंग करनी जरूरी बताई
पॉजिटिव केस को फिर कहते करना हो नोटिफाई
संकित लोगों का टेस्ट भी जावैगा जरूर करवाया।।
इस वायरस नै सारे कै घणा कसूता भय फैलाया।।
4
संदिग्ध केस निगरानी मैं यो कई दिन राख्या जावैगा
पैनिक नहीं होना सै हमनै बचाव तैं ए बच पावैगा
रणबीर हरड इम्युनिटी आवैगी मेटैगी इसकी छाया।।
इस वायरस नै सारे कै घणा कसूता भय फैलाया।।

******//

3

कोरोना वायरस नै भारत मैं पैर फैलाये।।
नौ हजार तैं ऊपर इसके मरीज हुए बताये।।
1
मजदूर महिला की मुशीबत बढ़ी बताई
गरीबी तो झेल रही कोरोना की जंग आई
खाण पीण के संकट लॉक डाउन नै बढ़ाये।।
नौ हजार तैं ऊपर इसके मरीज हुए बताये।।
2
कोरोना के कारण अर्थव्यवस्था और डूबैगी
इसकी मार की या सुई गरीब कै डूँघी चुभैगी
कोरोना बारे लापरवाही नै बुरे हाल बनाये।।
नौ हजार तैं ऊपर इसके मरीज हुए बताये।।
3
सरकार की घोषणा ऊंट के मूँह मैं जीरा रै
बाकी साध लेंगे मरै बेरोजगार फकीरा रै
मुश्किल बढ़ी पर पूरे बंदोबस्त ना हो पाये।।
नौ हजार तैं ऊपर इसके मरीज हुए बताये।।
4
लॉक डाउन बढ़ैगा इसे हुए सैं आसार रै
इसका करां सामना मिल नर और नार रै
रणबीर राखां होंसला या कोरोना हार जाये।।
नौ हजार तैं ऊपर इसके मरीज हुए बताये।।

*******//

4

*रेल बनाई*
*गायिका-मुकेश हेमसा*
*लेखक डॉ दहिया*
*कोरोना वायरस आगी इनें गरीब की रेल बनाई रै।।*
*न्यून पड़ै तो कुआं दीखै न्यून पड़ै तो खाई रै।।*
1
*कितै हवन करकै इसनै खत्म करना चाहरे*
*गोमूत्र का सेवन करो इलाज पक्का ये बतारे*
*जनता का बेकूफ़ बनारे, बता पक्की दवाई रै।।*
*न्यून पड़ै तो कुआं दीखै न्यून पड़ै तो खाई रै।।*
2
*भ्रम और अफवाह ये रोजाना नई नई घूमैं सैं*
*एमएलए और मंत्री देखो पैर बाबयाँ के चूमैँ सैं*
*थाली बजा झूमैं सैं कहैं सुन कोरोना घबराई रै।।*
*न्यून पड़ै तो कुआं दीखै न्यून पड़ै तो खाई रै।।*
3
*साइंसदानों नै इबै ना कोये वैक्सीन बनाई सै*
*इलाज खातर ना कोये इसकी बणी दवाई सै*
*लोक डाउन लगाई सै ज्यान मरण मैं आई रै।।*
*न्यून पड़ै तो कुआं दीखै न्यून पड़ै तो खाई रै।।*
4
*अंधविश्वास अनपढ़ता नै समस्या और बढ़ाई*
*लोक डाउन के साथ जीती कई देशां नै लड़ाई*
*रणबीर करी कविताई भ्रम दूर करनी चाही रै।।*
*न्यून पड़ै तो कुआं दीखै न्यून पड़ै तो खाई रै।।*
*******//

5

दुनिया मैं कोरोना का आज हिसाब लगाया रै।।
ग्यारा लाख मरीज होगे दिमाग भी चकराया रै।।
1
उनसठ हजार प्राणी भी मौत का शिकार होगे
हिसाब दुनिया का सुनकै होस हवास भी खोगे
घणे डॉक्टर पैदा होगे यो समाज भी उलझाया रै।।
ग्यारा लाख मरीज होगे दिमाग भी चकराया रै।।
2
कष्ट अमरीका और इटली बहोत घणा झेल रहे
अपने प्रयासों के म्हं सारा हांगा पेल रहे
डॉक्टर नर्स बाकी स्टाफ जोर खूब लगाया रै।।
ग्यारा लाख मरीज होगे दिमाग भी चकराया रै।।
3
आज पौने तीन लाख अमरीका मैं बीमार सैं
एक लाख बीस हजार इटली के मैं शिकार सैं
साढे चौदह हजार मरे इटली मैं यो भी भाई बताया रै।।
ग्यारा लाख मरीज होगे दिमाग भी चकराया रै।।
4
बत्तीस सौ म्हारे देश मैं मरीज आज गिनाए
थोड़े साधनों के साथ ये लॉक डाउन लगाए
कई करोड़ जनता देखो कितना यो दुख ठाया रै।।
ग्यारा लाख मरीज होगे दिमाग चकराया रै।।
*******//
6

साइनिंग और सफरिंग म्हारे दो भारत बणा राखे रै।।
कोरोना नै भी आज देखो ये सफरिंग भजा राखे रै।।
1
सफरिंग दीखै सडकां पै साइनिंग घरां मैं आराम करै
सफरिंग पै नहीं ठिकाना  कून इनका  इंतज़ाम करै
देश के लॉक डाउन नै दोनूआँ कै सांस चढ़ा राखे रै।।
कोरोना नै भी आज देखो ये सफरिंग भजा राखे रै।।


2
लॉक डाउन की पहले पूरी तैयारी नहीं हो पाई
सबको भोजन आवास सबको मुश्किल देवै दिखाई
सरकारी ऑडर भी कई  अफसरां नै भुला राखे रै।।
कोरोना नै भी आज देखो ये सफरिंग भजा राखे रै।।
3
ये स्वास्थ्य सुविधा कमजोर डॉक्टर नर्स तैनात दखे
दिन रात एक करण लागरे सलाम करां खुभात दखे
अस्पताल थोड़े पीपीई थोड़े फेर ये पूरे दिखा राखे रै।।
कोरोना नै भी आज देखो ये सफरिंग भजा राखे रै।।


4
महंगाई बेकारी असुरक्षा नै कड़ तोड़ कै धरदी रै
आज कोरोना नै म्हारी इसी बुरी हालत करदी रै
रणबीर  कोरोना नै देश वासी घरां बिठा राखे रै ।।
कोरोना नै भी आज देखो ये सफरिंग भजा राखे रै।।

*******//
7

*सपना*
*के बूझैगी कमला घणा कसूता सपना आया।।*
*सपने के मां देख्या पूरा संसार बदल्या पाया।।*
*1*
*एक संसार मैं सोया था उठया दूजे संसार मैं*
*पाया पेरिस कोण्या उतना रोमांटिक प्यार मैं*
*न्यूयार्क पै भी दीखै आज काला बदल छाया।।*
*सपने के मां देख्या पूरा संसार बदल्या पाया।।*
*2*
*किला चीनी दीवार का चौड़े मैं दीखै ढहग्या*
*मक्का भी देखल्यो जमा खाली हाथ रैहग्या*
*इटली जर्मनी देखो कोरोना नै कहर ढाया।।*
*सपने के मां देख्या पूरा संसार बदल्या पाया।।*
*3*
*बेरा लाग्या पिस्से तैं ऑक्सीजन नहीं थ्यावै*
*ताकत धरी रैहज्या कोण्या कोये पार बसावै*
*प्रकृति नै इंसान तैं आज गंभीर पाठ पढ़ाया।।*
*सपने के मां देख्या पूरा संसार बदल्या पाया।।*
*4*
*हवा धरती आसमान आज न्यों कहते देखो*
*सुण तेरे बिना हमतै देख सुखतैं रहते देखो*
*रणबीर हाल सपने का न्यों का न्यों बताया।।*
*सपने के मां देख्या पूरा संसार बदल्या पाया।।*

*******//
8

दिल्ली आल्यो
गिणकै दिये बोल तीन सौ साठ दिल्ली आल्यो।
नहीं सुणते बात हम देखैं बाट दिल्ली आल्यो।।
1
कोरोना बीमारी आगी दुखी हिदुस्तान करया
लॉक डाउन लागू करकै गरीब परेशान करया
भूख घमासान करया प्रबन्ध घाट दिल्ली आल्यो।।
नहीं सुणते बात हम देखैं बाट दिल्ली आल्यो।।
2
ईब खत्म म्हारी कमाई कति गोलते कोण्या
हम मरते बिना दवाई कति तोलते कोन्या
कति बोलते कोण्या बनरे लाट दिल्ली आल्यो।।
3
नहीं सुणते बात हम देखैं बाट दिल्ली आल्यो।।
म्हारे बालक बिना घर दर दर के धक्के खावैं
थारे बैठे कोठियां मैं ये टीवी देख मौज उडावैं
हम भूखे टेम बितावैं थारे सैं ठाठ दिल्ली आल्यो।।
नहीं सुणते बात हम देखैं बाट दिल्ली आल्यो।।
4
कोरोना केस बढ़े रणबीर पोल थारी खोल दई
गउ भैंस बकरी म्हारी ये बिकवा बिन मोल दई
मचा रोल दई गया बेरा पाट दिल्ली आल्यो।।
नहीं सुणते बात हम देखैं बाट दिल्ली आल्यो

*********//

9
*भ्रांतियां*
*कोरोना वायरस नै दुनिया मैं अंधेर मचाया।।*
*उल जलूल बातां नै जमकै नै डेरा जमाया।।*
*1*
*भभूति इलाज भी आगे काढ़ा आण टपक्या रै*
*कोरोना नै गरीब का तै सब किमैं ए झटक्या रै*
*अन्धविश्वासां के साहरै यो आम जन भकाया।।*
*उल जलूल बातां नै जमकै नै डेरा जमाया।।*
*2*
*कहैं माछरां का मौसम इसनै और फैलावैगा*
*माच्छर तैं कोण्या फैलता न्यों कोण समझावैगा*
*अंडे और मांस कै  खामखा मैं दोष लगाया।।*
*उल जलूल बातां नै जमकै नै डेरा जमाया।।*
*3*
*कोरोना ठीक करने के नुस्खे नए नए आज्यावैं*
*भूखी गरीब जनता नै मीडिया आले भका ज्यावै*
*कोये दवाई बणी ना डब्ल्यू एच ओ नै बताया।।*
*उल जलूल बातां नै जमकै नै डेरा जमाया।।*
*4*
*गर्मी के कारण कोरोना खत्म होज्यागी बताते*
*महामारी के इतिहास या बात सही ना दिखाते*
*वैज्ञानिकां की बात माणां रणबीर छंद बनाया।।*
*उल जलूल बातां नै जमकै नै डेरा जमाया।।*
*********//
10

तीस जनवरी
तीस जनवरी नै कॅरोना का पहला केस था पाया।।
इस पाछै बी हवाई जहाज हमनै था खूब उड़ाया।।
1
रूक्का करोना वायरस का दुनिया मैं पाट लिया था
कई देशां नै हवाई यात्रा बख्त तैं करना नाट दिया था
हवाई यात्रा करोना ल्यावै उनकी समझ मैं आया।।
2
डेढ़ करोड़ लगभग नै म्हारै यात्रा करी हवाई थी
चीन इटली अमरीका तैं जारी म्हारी आवा जाई थी
इसतैं कितना फैल गया इसका हिसाब सै बकाया।।
3
कौन कौन किसनै बेरा अपनी गेल्याँ करोना ल्याए
पूरी सख्ती की चूक रही सही हिसाब ना लगा पाये
बाइस मार्च नै नो लैंडिंग का भारत नै बैन लगाया।।
4
हवाई यात्रा बैन आच्छा होता या पहले लग जाती
या करोना वायरस देश मैं इतनी फैल नहीं पाती
रणबीर इब्बी बख्त सै करोना मिलकै जा हराया।।

********//

11
सावधानी
सावधानी बरतां हम सारे मिलकै करोना नै हरावांगे।।
सरकार भी ले जिम्मेदारी हम मानवता नै जितावांगे।।
1
फिजिकल डिस्टेंसिंग करकै हम अपना ख्याल करांगे
घरां रहवांगे बाहर कदम भाई मजबूरी बीच धरांगे
आस पास सफरिंग तबका उसनै जरूर बचावांगे।।
सरकार भी ले जिम्मेदारी हम मानवता नै जितावांगे।
2
सफरिंग के रहने के इंतजाम या सरकार करै पूरे
भोजन रोज मिलै सबनै प्रबन्ध नहीं होंवैं अधूरे
प्रशासन नै मदद चाहिए सारे लोग साथ निभावांगे।।
सरकार भी ले जिम्मेदारी हम मानवता नै जितावांगे।
3
आज करोना के बारे मैं अफवाह खूब फैलाई जारी
कई तरां कै ईलाज बतावैं इसी ऑडियो घुमाई जारी
जो सलाह डब्ल्यूएचओ दे उनको अमल मैं ल्यावांगे।।
4
इब तक बणी कोण्या इसकी कोए वैक्सीन और दवाई
वैज्ञानिक दिन रात मंडरे सैं भूख प्यास और नींद भुलाई
रणबीर सफरिंग दुखी ना होवैं मिलकै नै हांगा लावांगे।।
सरकार भी ले जिम्मेदारी हम मानवता नै जितावांगे।

*******//

12
डर फैलाया
इस कोरोना नै देश मैं घणा डर फैलाया देखो।।
हरियाणे के चारों कांहीं सन्नाटा सा छाया देखो।।
1
लोक डाउन के देश मैं फरमान गए सुनाए
मजबूर मानस बाहर सैं बाकी घरां बिठाए
धर्म संस्थानों कै भी इसनै ताला लवाया देखो।।
2
रुसवाई आज चारों तरफ हमनै दीख रही
मानवता प्रकृति तैं पाठ नए नए सीख रही
कोरोना नै दुनिया के मैं महाघोर मचाया देखो।।
3
इस कोरोना करकै नै गरीब घणे दुख पाये
चीन इटली जर्मनी अमरीका के सांस फुलाये
भारत मैं भी कोरोना का आज कहर आया देखो।।
4
बचाव करेंगे मिलकै डब्ल्यू एच ओ संग भाई
सावधानी बचाव करैगी कोण्या और दवाई
रणबीर नै टूट्या फुटया यो छंद बनाया देखो ।।

********//
13
कोरोना इसी बीमारी फैली इसनै सब कै सांस चढ़ाए।।
विश्व स्वास्थ्य संगठन नै महामारी के सैं एलान कराये।।
1
चीन तैं शुरू हुई या वायरस दुनिया के मैं छाई बताई
इटली जर्मनी अमरीका मैं घनी कसूती कहर मचाई
देख दुनिया की हालत नै केंद्र सरकार नै कदम ठाये।।
2
राज्य सरकारें देश की हरकत मैं फिर आन लगी सैं
केरल की सरकारी पहल तै उड़ै जनता खूब जगी सैं
पूरे देश मैं रोला माचरया भरम और डर भी छाये।।
3
फ्लू जिसी बीमारी सै या इसके इलाज घने बतावैं
कोये हवन करै कोये गौमूत्र का इलाज भी गिनावैं
डब्ल्यूएचओ नै तरीके इसतैं बचण के कई बताये।।
4
वैक्सीन और दवाई आज वैज्ञानिक टोहवण लागरे
लोकडाउन तनी दूरी तैं इसनै शासक रोकण लागरे
रणबीर दुनिया तैं कोरोमा नै ये सबक घने सिखाये।।
*****//
14
चरण कोरोना महामारी के डॉक्टर चार बतावैं भाई।।
सुनियो ध्यान लगा कै नै कदे फेर हम पछतावैं भाई।।
1
पहले चरण मैं यात्री जो प्रभावित देशों से आवैं देखो
वेहे इस कोरोना वायरस नै अपने साथ ल्यावैं देखो
उनका टैस्ट करया जावै तो कई पोजिटिव पावैं देखो
इस तरियां इलाज उनके फेर सम्भव हो ज्यावैं देखो
कुछ दिन मैं ठीक होज्यां डॉक्टर हमनै समझावैं भाई।।
सुनियो ध्यान लगा कै नै कदे फेर हम पछतावैं भाई।।
2
दूजे कोरोना देश तैं आये दूजा चरण कहते फैलावैं
परिवार मैं और पड़ौस मैं कीटाणु कहते पहोंचावैं
सोर्स का बेरा पाटज्या मरीज आसानी तैं छंटते जावैं
न्यारा करकै राखैं उसनै देखैं बीमारी नहीं बढ़ पावै
ये ठीक होज्यां तीजे चरण की रोकथाम करी जावैं भाई।।
सुनियो ध्यान लगा कै नै कदे फेर हम पछतावैं भाई।।
3
तीजे चरण मैं कोरोना कम्युनिटी ट्रांसमिशन मैं आवै
बड़ा हिस्सा फेर जनता का इसतैं प्रभावित हो ज्यावै
एक तैं दूजे प्राणी मैं फैलै संकट फेर चारों कान्ही छावै
मरीज का सोर्स न्यों कहते डॉक्टर नै टोहया नहीं पावै
अमरीका तीजे स्टेज मैं भारत भी तीजे मैं दिखावैं भाई।।
सुनियो ध्यान लगा कै नै कदे फेर हम पछतावैं भाई।।
4
चौथे चरण मैं बीमारी फेर रूप ले लेवै महामारी का
संकट चारों कांहीं छाज्या माहौल होज्यावै लाचारी का
फेर कोये बता नहीं पावै खात्मा कद होवैगा बीमारी का
सामना करण नै चाहिए यो होंसला सरकार म्हारी का
रणबीर गरीब भूखे हम सां फेर भी नहीं घबरावैं भाई।।
सुनियो ध्यान लगा कै नै कदे फेर हम पछतावैं भाई।।
*****//
15
कोरोना वायरस नै भारत मैं पैर फैलाये।।
नौ हजार तैं ऊपर इसके मरीज हुए बताये।।
1
मजदूर महिला की मुशीबत बढ़ी बताई
गरीबी तो झेल रही कोरोना की जंग आई
खाण पीण के संकट लॉक डाउन नै बढ़ाये।।
नौ हजार तैं ऊपर इसके मरीज हुए बताये।।
2
कोरोना के कारण अर्थव्यवस्था और डूबैगी
इसकी मार की या सुई गरीब कै डूँघी चुभैगी
कोरोना बारे लापरवाही नै बुरे हाल बनाये।।
नौ हजार तैं ऊपर इसके मरीज हुए बताये।।
3
सरकार की घोषणा ऊंट के मूँह मैं जीरा रै
बाकी साध लेंगे मरै बेरोजगार फकीरा रै
मुश्किल बढ़ी पर पूरे बंदोबस्त ना हो पाये।।
नौ हजार तैं ऊपर इसके मरीज हुए बताये।।
4
लॉक डाउन बढ़ैगा इसे हुए सैं आसार रै
इसका करां सामना मिल नर और नार रै
रणबीर राखां होंसला या कोरोना हार जाये।।
नौ हजार तैं ऊपर इसके मरीज हुए बताये।।


Monday, 8 June 2020

शोषण हमारा

 शोषण हमारा
बदेशी कम्पनी आगी, हमनै चूट-चूट कै खागी
अमीर हुए घणे अमीर, यो मेरा अनुमान सै।।
हमनै पूरे दरवाजे खोल दिये,बदेशियां नै हमले बोल दिये
ये टाटा बिड़ला साथ मैं रलगे, उनकै घी के दीवे बलगे
बिगड़ी म्हारी तसबीर, या संकट मैं ज्यान सै।।
पहली चोट मारी रूजगार कै, हवालै कर दिये सां बाजार कै
गुजरात मैं आग लवाई  क्यों, मासूम जनता या जलाई  क्यों
गई  कड़ै तेरी जमीन, घणा मच्या घमसान सै।।
या म्हारी खेती बरबाद करदी, धरती सीलिंग तै आजाद करदी
किसे नै भी ख्याल ना दवाई का, भटठा बिठा दिया पढ़ाई  का
घाली गुरबत की जंजीर, या महिला परेशान सै।।
या सल्फाश की गोली सत्यानासी, हर दूजे घर मैं ल्यादे उदासी
आठ सौ बीस छोरी छोरा हजार यो, बढ़या हरियाणे मैं अत्याचार यो
लिखै साची सै रणबीर, नहीं झूठा बखान सै।।

2006 

मेरा संघर्ष

बात पते की
मेरा संघर्ष 
गाम की नजरां के म्हां कै बस अडडे पै आउं मैं।
कई  बै बस की बाट मैं लेट घणी हो जाउं मैं।।
भीड़ चीर कै बढ़णा सीख्या,करकै हिम्म्त चढ़णा सीख्या 
लड़ भिड़ कढ़णा सीख्या, झूठ नहीं भकाउ मैं।।
बस मैं के के बणै मेरी साथ,नहीं बता सकती सब बात
भोले चेहरे करैं उत्पात, मौके उपर धमकाउं मैं।।
दफतर मैं जी ला काम करूं,पलभर ना आराम कंरू
किंह किहं का नाम धरूं, नीच घणे बताउं मैं।।
डर मेरा सारा ईब  लिकड़ गया,दिल भी सही होंसला पकड़ गया,
जै रणबीर अकड़ गया, तो सबक सिखाउं मैं।।

ब्रह्रााण्ड महारा

ब्रह्रााण्ड महारा
इस ब्रह्रााण्ड का बेरा ना सोच-सोच घबराउं मैं।
धरती चन्द्रमा सूरज ये उसकी देण बताउं मैं।।
वैज्ञानिक दृषिट का पदार्थ नै आधार बताते
नाश हो सकता बदलै ना आकार सुणाते         
निर्जिव तै जीव की उत्पत्ति डारविन जी सिखाते
हमेश रहै बदलता क्यूकर या समझाउं मैं।।
जिज्ञासा और खोज तै उपजै उसनै ग्यान कहैं
क्रम बद्ध ग्यान नै फेर दुनिया मैं विग्यान कहैं
जिज्ञासा नै मारै सै जो उसको सारे अग्यान कहैं
गुण दोष पै जांचै परखै वैज्ञानिक इन्सान कहैं
पूर्वाग्रह तै टकराकै बणै नयी सोच दिखाउं मैं।।
मत विश्वास करो क्योंकि मां बाप नै बताया सै
शिक्षक नै कैहदी ज्यांतै आंख मूंद अपणाया सै
परीक्षण विश्लेषण पै जो सर्वहित कारी पाया सै
प्रयोग तै करैं दोबारा वो सिद्धांत आगै आया सै
ना भाग्यवाद पै कान धरूँ ऊंकै धोरै ना जाउं मैं।।
वैज्ञानिक दृषिट गुरू अपना चेला बताया होज्या
तीव्र ग्राही मन होवै जो कदे ना पड़कै सोज्या
सत्य का खोजी माणस बीज नई  खोज के बोज्या
प्रमाण पै टिक्या विवेक सारे अंधविश्वास नै खोज्या
रणबीर जोर लगाकै बात खोज कै ल्याउं मैं।।

वैज्ञानिक दृषिट--300---

वैज्ञानिक दृषिट
वैज्ञानिक दृष्टि  बिन सृष्टि  नहीं समझ मैं आवै।
कुदरत के नियम जाण कै समाज आगै बढ़ पावै।।
किसनै सै संसार बणाया किसनै रच्या समाज यो
म्हारा भाग कहैं माड़ा बांधै  कामचोर कै ताज यो
सरमायेदार क्यों लूट रहया सै मेहनतकशी की लाज यो
क्यों ना समझां बात मोटी कूण म्हारा भूत बणावै।।
कौण पहाड़ तोड़ कै करता धरती समतल मैदान ये
हल चला खेती उपजावै उसे का नाम किसान ये
कौण धरा चीर कै खोदै चांदी सोने की खान ये
ओहे क्यों कंगला घूम रहया चोर बण्या धनवान ये
करमां के फल मिलै सबनै क्यों कैहकै बहकावै।।
हम उठां अक अनपढ़ता का मिटा सकां अन्धकार  यो
हम उठां अक जोर जुलम का मिटा सकां संसार यो
हम उठां अक उंच नीच का मिटा सकां व्यवहार यो
जात पात और भाग भरोसे कोण्या पार बसावै।।
झूठयां पै ना यकीन करां म्हारी ताकत सै भरपूर
म्हारी छाती तै टकरा कै गोली होज्या चकनाचूर
जागते रहियो मत सोइयो म्हारी मंजिल ना सै दूर
सिरजन होरे हाथ म्हारे सैं घणे अजब रणसूर
नया समाज सुधार का रणबीर रास्ता बतावै।।

म्हारी खोज म्हारी सभ्यता

म्हारी खोज म्हारी सभ्यता
घड़ी बंधी  जो हाथ पै इटली मैं हुई  खोज बताई ।।
भाप के इंजन की खोज करी इंग्लैंड नै ली अंगड़ाई ।।
खुर्दबीन की खोज कदे नीदरलैंड मैं हुई  बताई  सै
बैरोमीटर तै टारिसैली नै मौसमी खबर सुणाई  सै
गुबारा सतरा सौ तिरासी मैं यो हमनै दिया दिखाई  सै
टेलीग्राफ की खोज नै फेर फ्रांस की श्यान बढ़ाई  सै
गैस लाइट के आणे तै जग मैं हुर्इ घणी रूसनाई ।।
इटली के पी टैरी नै टाइप राइटर फेर बणाया रै
हम्फ्री डेवी नै लैंप सेफटी बणा माडल दिखलाया रै
माचिस की खोज नै ठारा सौ छब्बीस याद कराया रै
साइकिल के बणाणे आला मैकलिन नाम बताया रै
ठारा सौ तितालिस सन मैं फैक्स मशीन बणाई ।।
ज्ञान विज्ञान आगै बढ़ग्या करे नये-नये आविष्कार
अमरीका नै लिफट खोजी मंजिलां की फेर लागी लार
ठारा सौ बावण मैं वायुयान नै फ्रांस मैं भरी उडार
टेलबेट नै फोटो खींचण की विधि  कर दी तैयार
वैज्ञानिक सोच के दम पै नई -नई  तरकीब सिखाई ।।
थामसन नै वैलिडंग मशीन अमरीका मैं त्यार किया
एडीसन नै बलब बिजली जगमगा पूरा संसार दिया
मोटर साइकिल डैमलर नै सड़कां पै फेर उतार दिया
उन्नीस सौ बावण मैं हाइड्रोजन बम बी सिंगार लिया
रणबीर आगे की फेर कदे बैठ करैगा कविताई ।।