901
तीज त्यौहार सब भूल गए मैं नहीं भुला पाई बेटी।।
जर्मनी मैं बताईये क्यूकर तीज मनाई बेटी।।
1
आडै़ भी शहर मैं लोग तीज मनाना भूलते जावैं
कितै कितै पींघ घालकै कुछ बालक झूलते पावैं
एकाध बुजुर्ग टहलते पावैं साची साच बताई बेटी।।
2
म्हारे बख़्ताँ मैं सारी मिलकै हम तीज मनाया करती
रजिया संतरा सखी दोनों सुरीले गीत गाया करती
ऊंची पींघ बधाया करती देखी असमानां छाई बेटी।।
3
साम्मण का मिन्हा रंगीला थोड़ी थोड़ी पड़ती फुहार
पूड़े रसगुल्ले ख़ावैं सारे मन गुगुदावै देख बहार
पीँघां की लागै थी लार नई खेती खूब लहलहाई बेटी।।
4
लाल चूंदड़ी दामण काला घणा कसूता चाला पाटै था
जम्फर सलवार रंग बिरंगी माणस
ठोडै़ चक्कर काटै था
देवर मोर्चा डाटै था रणबीर करै कविताई बेटी।।
902
किसान मजदूर आंदोलन जिंदाबाद
गरीब और गरीब होग्या इसा तरीका महारे विकास का
अमीर और अमीर होग्या इसा आरा चलाया विनाश का
1
कहते गरीबी दूर करांगे कई नई स्कीम चलाई गई
विकेंद्रीकरण कर दिया देखो बात खूब फैलाई गई
सल्फास किसान क्यों खावै के कारण उसके सत्यानाश का
अमीर और अमीर होग्या इसा आरा चलाया विनाश का
2
नाबरॉबरी और कितनी या भारत मैं बधांते जावांगे
भगत सिंह के सपन्यां आल्या समाजवाद कद ल्यावांगे
छल कपट छाग्या देश मैं के होगा भ्रीष्टाचारी घास का
अमीर और अमीर होग्या इसा आरा चलाया विनाश का
3
माणस अपणा आप्पा भूल गया पीस्से का आज दास हुया
बेईमानी बढ़ती जावै सै बाजार का दबाव आज खास हुया
स्कॉच चलै पांच *सितारा मैं ख्याल ना म्हारी प्यास का
अमीर और अमीर होग्या इसा आरा चलाया विनाश का
4
प्यार की जगां हवस छागी नँगे होवण की होड़ लगी रै
शरीर बेचकै एश करो बाजार मैं या दौड़ लगी रै
रणबीर सिंह बरोने आला साथ निभावै सोहनदास का
अमीर और अमीर होग्या इसा आरा चलाया विनाश का
903
म्हारी खोज म्हारी सभ्यता
घड़ी बंधी जो हाथ पै इटली मैं हुई खोज बताई।।
भाप के इंजन की खोज करी इंग्लैंड नै ली अंगड़ाई।।
1
खुर्दबीन की खोज कदे नीदरलैंड मैं हुई बताई सै
बैरोमीटर तै टारिसैली नै मौसमी खबर सुणाई सै
गुबारा सतरा सौ तिरासी मैं यो हमनै दिया दिखाई सै
टेलीग्राफ की खोज नै फेर फ्रांस की श्यान बढ़ाई सै
गैस लाइट के आणे तै जग मैं हुर्इ घणी रूसनाई।।
भाप के इंजन की खोज करी इंग्लैंड नै ली अंगड़ाई।।
2
इटली के पी टैरी नै टाइप राइटर फेर बणाया रै
हम्फ्री डेवी नै लैंप सेफटी बणा माडल दिखलाया रै
माचिस की खोज नै ठारा सौ छब्बीस याद कराया रै
साइकिल के बणाणे आला मैकलिन नाम बताया रै
ठारा सौ तितालिस सन मैं फैक्स मशीन बणाई।।
भाप के इंजन की खोज करी इंग्लैंड नै ली अंगड़ाई।।
3
ज्ञान विज्ञान आगै बढ़ग्या करे नये-नये आविष्कार
अमरीका नै लिफट खोजी मंजिलां की फेर लागी लार
ठारा सौ बावण मैं वायुयान नै फ्रांस मैं भरी उडार
टेलबेट नै फोटो खींचण की विधि कर दी तैयार
वैज्ञानिक सोच के दम पै नई-नई तरकीब सिखाई।।
भाप के इंजन की खोज करी इंग्लैंड नै ली अंगड़ाई।।
4
थामसन नै वैलिडंग मशीन अमरीका मैं त्यार किया
एडीसन नै बलब बिजली जगमगा पूरा संसार दिया
मोटर साइकिल डैमलर नै सड़कां पै फेर उतार दिया
उन्नीस सौ बावण मैं हाइड्रोजन बम बी सिंगार लिया
रणबीर आगे की फेर कदे बैठ करैगा कविताई।।
भाप के इंजन की खोज करी इंग्लैंड नै ली अंगड़ाई।।
904
छोटा बड़ा परिवार
कड़ तोड़ कै धरदी मेरी इन बालकां की लार नै।।
मैं भी सुखी कोन्या बहना लेकै छोटे से परिवार नै।।
1
जिस घर मैं थोड़े बालक सुन्या वो आच्छा घर हो सै
पढ़ना लिखना हो बढ़िया ना करजे का डर हो सै
क्यान्हे चीज का ना तोड़ा सुरग मैं कहैं नर हो सै
प्यार मुलाहजा हो चोखा एक दूजे की खबर हो सै
यो सब कुछ दे कै भी मैं दुखी करी क्यों करतार नै।।
2
नौ जने ये बालक बेबे बस पांच इब आगै सैं
नहीं बखत पै मिलै दवाई जब दिन उल्टे लागैं सैं
लिकड़ते बढ़ते ये छिलकने बोल कसूते दागैं सैं
किततैं लयाऊं पढ़ाई और दवाई ये मेरे पै मांगैं सैं
कहते बड़ा कुनबा साहरा दे दे क्यूकर समझाऊं संसार नै।।
दोनों क्यों दुखी साँ नहीं बात समझ मैं आई
छोटे बड़े का रोला ना रोल विकास मैं बताई
मेहनत के फल का बंटवारा ना दे सही दिखाई
गरीबी अमीरी की खाई म्हारी क्यूकर हो भलाई
कौन बैरी खोस कै लेजया आज म्हारी सारी बहार नै।।
जनसंख्या के कारण लागैं कोन्या दुख म्हारे ये
म्हारे दुखों का कारण दिखैं जिंदगी के बंटवारे ये
इसी रची सै समाज व्यवस्था अमीर छंटे सैं न्यारे ये
विकास का बेढंग रास्ता इंकी ओंट मैं छिपारे ये
बेबे बैठ कै सोचां क्यूकर सुखी कराँ घरबार नै।।
ईसा विकास हो देश मैं जिसमैं सही बंटवारा हो
प्यार बढै आपस का ना भाई का भाई हत्यारा हो
बलात्कारी ना टोहया पावै म्हारा सुखी हर गलियारा हो
जनसंख्या समस्या ना रहै रणबीर हर घर उजियारा हो
यो परिवार नियोजन ना करना पडै़ सरकार नै।।
905
आहे सखी एक बात बताऊं , यो दिल अपना खोल दिखाऊं , नेता नै कर दिया चाला हे मनै तेरी सूं।।
1
मां बाप नै करी सगाई, बेबे मैं ना फूली समाई, मन मैं हुया था उजाला हे मनै तेरी सूं।।
2
ब्याह की तारीख धरी थी, रस्म बाकी पूरी करी थी, मैं जपूं थी उसकी माला, हे मनै तेरी सूं।।
3
उसकी नौकरी खास लई, म्हारी किस्मत मोस दई, कर दिया गुड का राला, हे मनै तेरी सूं।
4
टोहना चाहया कूंआ झेरा, महिला समिति भेज्या बेरा, हटावै दुख का छाहला, हे मनै तेरी सूं।।
जगमति बाहन दखे आई, उनै नई आस बंधाई, बताया संघर्ष का पाला, हे मनै तेरी सूं।।
घर म्हारा बचा दिया हे, ब्याह म्हारा रचा दिया हे, खोल दिया गम का ताला, हे मनै तेरी सूं।।
म्हारे साथ मैं सै रणबीर, समाज की खींचै सही तस्वीर, तार दिया आंख का जाला, हे मनै तेरी सूं।।
906
नया साल पच्चीस
किसा हो नया साल चौबीस आदान प्रदान हो विचारां का।।
हमारा सघर्ष देश का नक्सा बदलै कमेरे किरदारां का।।
1
सर्व समावेशी शिक्षा हो स्कूल होवैं एक समान रै
हरेक जात का सम्मान हो भाईचारा हो बलवान रै
मरीज डॉक्टर का मेल हो इलाज पावै हर इंसान रै
फसल की कीमत ठीक मिलै फलैं फुलैं किसान रै
पर्दाफाश होज्या आज म्हारी लूट के ठेकेदारां का।।
हमारा सघर्ष जीत कै नक्सा बदलै कमेरे किरदारां का।।
2
मिलावट म्हारे समाज म्हैं नहीं टोही पावै यो चाहवां
नफरत का जहर समाज नै आज ना खावै यो चाहवां
बेरोजगारी कम होवै इसा माहौल आवै यो चाहवां
कोये माणस प्रदेश म्है ना भूखा रह ज्यावै यो चाहवां
होवै महिला महफूज ना जिकरा बचै बलात्कारां का।।
हमारा सघर्ष जीत कै नक्सा बदलै कमेरे किरदारां का।।
3
म्हारा यो सबका हिंदुस्तान, गूँज उठै यो नारा भाई
छुआछूत खत्म हो सुधरै यो वातावरण म्हारा भाई
सरकार करै ख्याल बणकै गरीबां का साहरा भाई
अंधविश्वास और नशे तैं मिलै सबनै छुटकारा भाई
या जनता राह बाँधेगी, देश भर म्हैं इन बदकारां का ।।
हमारा सघर्ष जीत कै नक्सा बदलै कमेरे किरदारां का।।
4
युवा नै रोजगार मिलै, कति नहीं फिरै आवारा रै
सुख का सांस लेवै सरतो, सुखी हो करतारा रै
विकास चालै सही राही पै,सही होवै बंटवारा रै
संविधान के अनुसार चलै, हिंदुस्तान देश म्हारा रै
रणबीर साल इक्कीस हो, मेहनतकाश किरदारां का ।।
हमारा सघर्ष जीत कै नक्सा बदलै कमेरे किरदारां का।।
907
नया साल पच्चीस
किसा हो नया साल पच्चीस आदान प्रदान हो विचारां का।।
हमारा सघर्ष जीत कै नक्सा बदलै कमेरे किरदारां का।।
1
सर्व समावेशी शिक्षा हो स्कूल होवैं एक समान रै
हरेक जात का सम्मान हो भाईचारा हो बलवान रै
मरीज डॉक्टर का मेल हो इलाज पावै हर इंसान रै
फसल की कीमत ठीक मिलै फलैं फुलैं किसान रै
पर्दाफाश होज्या आज म्हारी लूट के ठेकेदारां का।।
हमारा सघर्ष जीत कै नक्सा बदलै कमेरे किरदारां का।।
2
मिलावट म्हारे समाज म्हैं नहीं टोही पावै यो चाहवां
नफरत का जहर समाज नै आज ना खावै यो चाहवां
बेरोजगारी कम होवै इसा माहौल आवै यो चाहवां
कोये माणस प्रदेश म्है ना भूखा रह ज्यावै यो चाहवां
होवै महिला महफूज ना जिकरा बचै बलात्कारां का।।
हमारा सघर्ष जीत कै नक्सा बदलै कमेरे किरदारां का।।
3
म्हारा यो सबका हिंदुस्तान, गूँज उठै यो नारा भाई
छुआछूत खत्म हो सुधरै यो वातावरण म्हारा भाई
सरकार करै ख्याल बणकै गरीबां का साहरा भाई
अंधविश्वास और नशे तैं मिलै सबनै छुटकारा भाई
या जनता राह बाँधेगी, देश भर म्हैं इन बदकारां का ।।
हमारा सघर्ष जीत कै नक्सा बदलै कमेरे किरदारां का।।
4
युवा नै रोजगार मिलै, कति नहीं फिरै आवारा रै
सुख का सांस लेवै सरतो, सुखी हो करतारा रै
विकास चालै सही राही पै,सही होवै बंटवारा रै
संविधान के अनुसार चलै, हिंदुस्तान देश म्हारा रै
रणबीर साल पच्चीस हो, मेहनतकाश किरदारां का ।।
हमारा सघर्ष जीत कै नक्सा बदलै कमेरे किरदारां का।।
908
नया साल चौखे ब्योन्त आल्यां का
नए साल मैं चौखे ब्यौंत आला खूबै काच्चे काटैगा भाई रै ॥
ऑन लाइन पर काम करावैगा बढ़िया स्कीम चलायी रै ॥
1
मॉल घने गजब के सब कुछ मिलै एक छत नीचै
बाहर खड़या गरीब तो अपने खाली पेट नै भींचै
ब्यौंत आला घरां बैठ करै बुकिंग जहाज हवाई रै ॥
2
अपोलो बरगे फाइव स्टार अस्पताल गजब खोले
इलाज घना मंहगा करया सुनकै म्हारा हिया डोले
गरीब मरो सड़कै नै कहवण की ये मुफ्त दवाई रै ॥
3
एयर कंडीशन्ड जीवन का न्यारा यो संसार बनाया
स्कूल घर कार अस्पताल सारै इसका जाल बिछाया
नये साल की आज रात नै जावैगी धूम मचाई रै ॥
4
मुबारक क्यांकि अर किसनै थोड़ा सै गम्भीर सवाल
इंकलाब जिंदाबाद ला नारा किया सै गजब कमाल
जनता नै बेचैनी अपनी पूरी दुनिया ताहिं बताई रै ॥
सब रंगां का समावेश भारत देश हमारा देश होवै
जात पात और मजहब का आड़ै ना यो क्लेश होवै
रणबीर सोच समझ कै करता अपनी कविताई रै ॥
909
हम बहुत जल्दी भूल जाते हैं और गंभीर विमर्श से दूर भागते हैं । आज का हरियाणा का माणस किसा सै एक गामोळी की नजर से----
आज का माणस किसा होग्या थाम सुणियो ध्यान लगाकै।
खुदगर्जी का कोय उनमान नहीं जब देख्या नजर घुमाकै।
बिना चाट भैंस हरियाणे की दूध जमा नहीं देवै देखो
इसका दूध पी कै नै शहरी खुबै ए रिश्वत लेवै देखो
भगवान इणनै सेहवै देखो आ बैठया घर मैं इनके आकै।
और किसे की परवाह कोण्या अपणे आपे मैं खोया
दूज्यां की खोज खबर ना हमेशा अपणा रोना रोया
कमजोर कै ताकू चभोया बैठै ठाड्डे की गोदी मैं जाकै।
दूसरयाँ नै खत्म करकै अपणा व्यापार बढ़ावैं देखो
चुगली चाटी मारै डांडी हथकण्डे सारे अपनावैं देखो
दगाबाज मौज उड़ावैं देखो चौड़ै सट्टे की बाजी लाकै।
मारो खाओ मौज उड़ाओ इस लाइन पर चाल पड़े सैं
हाथ ना आवैं जै आवैं तो होंवैं रिश्वत कै तान खड़े सैं
रणबीर सिंह नै छंद घड़या सच्चाई का पाला पाकै।
910
इंगवायनल हरनिया
हरनिया की या मेरी बीमारी इसका पूरा हाल सुनाऊँ मैं।।
मेरी गेल्याँ के के क्युकर बीती आज सारी खोल बताऊँ मैं।।
1
नला मेरा सूज ज्यावै जिब काम हांगे का करणा होज्या
मुश्किल तैं चाल सकूं सम्भल सम्भल पां धरणा होज्या
कई बै उप्पर नै चढ़ै कोण्या दुख मैं मनै मरणा होज्या
काम होवै ना ताने लागैं घूंट सबर का भरणा होज्या
पड़या खाट मैं सोचें जां मुश्किल तैं उप्पर नै चढ़ाऊँ मैं।।
2
रोहतक मैडीकल चाल्या जा खरखोदे आले न्यों बोले रै
मैडीकल हत्थे का जिब नाम सुण्या मेरे पां जमा डोले रै
पीस्यां का इंतजाम राखिए मेरे कान कईयाँ नै खोले रै
सलाह मशवरे दिए जो वे मनै अपने हिसाब तैं तोले रै
चार बार तो पड़या जावणा पांचवैं जाकै दाखिल हो जाऊं मैं।।
3
परेशन की तैयारी शुरू होगी वार्ड मैं सब ताण कै सोगे
ज्यों ज्यों हुया सबेरा भाई मेरे होंश हवश सब खोगे
निर्णाबासी मरूं भूखा ये ड़ाक्टर बिघन कसूते बोगे
टेबल पै लिटा न्यों बोले ये एस टी सैगमेंट मूंधे होगे
मेरे परेशन की तै टाल होगी पड़या छात कैड़ लखाऊँ मैं।।
4
हटकै ईसीजी करवाई मेरी सबकिमैं ठीक बताया रै
आगले परेशन आले दिन मैं टेबल पै फेर लिटाया रै
करौंठ दिवाकै कड़ साफ करी टीका कड़ मैं लगाया रै
पाहयाँ मैं कीड़ी सी चाली मेरा सब लत्ता तरवाया रै
बड्डा डॉक्टर कहवै छोटे नै ल्या तेरा हाथ साफ कराऊँ मैं।।
5
परेशन होग्या वार्ड मैं आग्या पेशाब का जोर होग्या
सारी बिध लाकै देखी मनै पर दर्द मेरै घनघोर होग्या
डॉक्टर नै एक टीका लगाया पेट पाटण नै और होग्या
सहज सहज पेशाब उतरया कम पेट का शोर होग्या
रणबीर दो दिन पाछै छुट्टी देदी डॉक्टरां के गुण गाऊँ मैं।।
911
रोहतक का हाल सुनो
*रोहतक का हाल सुनो इसमैं जामां नै सिर घुमाया।।*
*किला रोड का जिकरा करते नहीं खाली स्थान बताया।।*
आॅटो का औड़ रहया नहीं स्कूटी घणी ए घूम रही
मोटर बाईक टेढ़ी मेढ़ी ये भीड़ बीच मैं घूम रही
*कारां का नहीं कोए ठिकाणा कडे़ तैं इतना पीस्सा आया।।*
साइकिल चलाना मुश्किल सै कोए बी साइड मारज्या
पैदल का कोए खाता नहीं कोए बी छोह नै तारज्या
*रोजाना रोड एक्सीडैंट होवैं मौत नै अपना खेल रचाया।।*
एक्सीडैंट पाछै फिरैं ढूंढते नहीं वैंटीलेटर थ्यावै
सांस उपर नीचै होरी कोए मरीज कित लेज्यावै
*वैंटीलेटर के नाम पर प्राईवेट नै जाल बिछाया।।*
या वैंटीलेटर की लूट दखे घणे घर उजाड़ देवै
बीस हजार रोज का खर्चा बैलैंस नै बिगाड़ देवै
*हाई टैक नै इलाज रणबीर असमानां पै पहोंचाया।।*
912
म्हारी कुर्बानी
म्हारी कुर्बानी हरियाणा मैं एक दिन रंग लयावैगी।
झूठ की हाण्डी फूटैगी साच खूब्बै सम्मान पावैगी।।
1
किसान आन्दोलन बढ़ैगा या धरती भीड़ी होज्यागी
किसान के बेटे पुलिस मैं उनकी आत्मा रोज्यागी
सरकार खोखली होज्यागी जमा मूँह की खावैगी।।
झूठ की हाण्डी फूटैगी साच खूब्बै सम्मान पावैगी।।
2
बन्द एम आई टी सी कई औरों का नम्बर आया सै
पीस्से कोन्या तनखा के कदम ज्यां करड़ा ठाया सै
हरियाणा दां पै लाया सै या वारी समझ मैं आवैगी।।
झूठ की हाण्डी फूटैगी साच खूब्बै सम्मान पावैगी।।
3
हमने सोचना बन्द करया या गलती करदी भारी
इस अेहदी पन के कारण गई म्हारी खाल उतारी
विचार की ताकत न्यारी या म्हारी चेतना जगावैगी।।
झूठ की हाण्डी फूटैगी साच खूब्बै सम्मान पावैगी।।
4
बढ़िया इन्सान किसा हो सै इसपै विचार करांगे रै
सुन्दर समाज का सपना इसमें पूरे रंग भरांगे रै
आपस में नहीं लड़ांगे रै बात रणबीर की भावैगी।।
झूठ की हाण्डी फूटैगी साच खूब्बै सम्मान पावैगी।।
913
साम्राज्यवाद नै दुनिया मैं तबाही मचाई खास
देखियो के होगा ।।
1
अपनी लूट बढ़ावन खातर हथियार उद्योग बढ़ाया
पूरी दुनिया मैं इसनै आज खुल कै नै धौंस जमाया
दूजे देशों पै हमले करकै बहोत बिछाई लाश
देखियो के होगा ।।
2
मजदूर किसानों को चूस्या इसी नीत ले कै नै आया
अपनी फौज मिल्ट्री के दम पै तलहेडू हमें बनाया
देशी पूंजी तैं हाथ मिलाकै दुनिया कै चढ़ाई सांस,
देखियो के होगा ।।
3
मुनाफाखोरी बाजार व्यवस्था पूरे संसार मैं ल्याया
सरमायेदारों का मुनाफा सब देशों मैं खूब बढ़वाया
अपना संकट मेटण खातर गरीबों की ढाई आस
देखियो के होगा ।।
4
ईसा बंब बनाया जो जीव का सत्यानाश करैगा
निर्जीव नै बचावै इसतैं अपना भोभा तूं भरैगा
रणबीर अपनी बुझावण नै म्हारी बधाई प्यास
देखियो के होगा ।।
No comments:
Post a Comment