ठेका प्रथा के खिलाफ

 आह्वान नौजवानों को ठेका प्रथा के खिलाफ

चलो भाइयो धरने ऊपर ईब नहीं घबराना सै।।
मिलकै संघर्ष के दम पै अपणा हक पाना सै।।
1
जल्दी करलयो पीणा खाणा
इस जिसा ना मौका थ्याणा
फेर हमनै ना पड़ै पछताणा
संघर्ष करकै हक पाणा, यो पूरा हाँगा लाणा सै।।
मिलकै संघर्ष के दम पै अपणा हक पाणा सै।।
2
जमा नाट गये देखो हाँ भरकै
धरने जलूसों से इणनै डरकै
मंत्री भकाज्या कदे आ करकै
या फ़ाइल जमा ना सरकै, रोजका फरमाणा सै।।
मिलकै संघर्ष के दम पै अपणा हक पाणा सै।।
3
बुलंद होवेंगे उड़ै म्हारे नारे
निजीकरण नै घाले सैं घारे
घणे दुखी मजदूर कर्मी सारे
ठेकेदारी प्रथा सारे कै ल्यारे, मिलकै पाठ पढ़ाणा सै।।
मिलकै संघर्ष के दम पै अपणा हक पाना सै।।
4
संघर्ष बिना नहीं सै गुजारा
जल्दी चालां हजारों हजारां
सरकार हैरान हो देख नज़ारा
रणबीर लिखता साथी म्हारा, ना पाछै कदम हटाणा सै।।
मिलकै संघर्ष के दम पै अपणा हक पाना सै।।