गरीब किस्सान की आप बीती

गरीब किस्सान की आप बीती

दो किल्ले धरती सै मेरी मुश्किल हुया गुजारा रै॥ 

खाद बीज सब महंगे होगे कुछ ना चालै  चारा रै॥ 

बुलध यो पड्या बेचना ट्रैक्टर की सै  मार पड़ी

मैं एकला कोन्या लोगो मेरे जिस्याँ की लार खड़ी

स्वाद प्याज की चटनी का पाछै सी होग्या खारा रै ॥ 
मिंह बरस्या कोन्या ट्यूबवैल का खर्चा खूब हुया

धान पिटग्या मंदी के माँ इसका चर्चा खूब हुया 

चावल का भा ना तले आया देख्या इसा नजारा रै ॥ 

भैंस बांध ली बेचूं दूध यो दिन रात एक करां

तीन हजार भैंस बीमारी के गए डाक्टर के घरां 

तीस हजार कर्जा सिर पै टूट्या पड्या ढारा  रै ॥ 

बालक धक्के खान्ते हाँडै  इननै रुजगार नहीं 

छोरी बिन ब्याही बिन दहेज़ कोए त्यार नहीं

छोरा हाँडै गालाँ  मैं मेरे बाबू का चढ़ज्या पारा रै॥ 

घर आली करै सिलाई दिन रात करै वा काले

खुभात फालतू बचत नहीं हुए ये कसूते चाले

दारू पी दिल डाटूं ये  बालक कहैं मने आवारा रै॥ 

कर्जा जिस पै लिया उसकी नजर घनी बुरी सै

घरां आकै जम्जया सै दिलपै चल्ले मेरे छुरी सै

रणबीर बरोनिया का बिक्गया  घर का हारा  रै॥