जनता जागी---390---

जिब जिब जनता जागी यो जुल्मी शोषक झुका दिया।।
भारत तैं जुल्मी गोरा सबनै मिलकै भगा दिया।।
1
आजाद देश का सपना पहोंच्या शहर और गाम मैं
भगत सिंह फांसी टूट्या जोश था देश तमाम मैं
दुर्गा भाभी गेल्याँ जुटगी इस आजादी के काम मैं
लाखां नर और नारी देगे क़ुरबानी गुमनाम मैं
क़ुरबानी बिना नहीं आजादी गांधी अलख जगा दिया।।
भारत तैं जुल्मी गोरा सबनै मिलकै भगा दिया।।
2
गोरे गए काले आगे गरीबी पूरी मिटी नहीं सै
बुराई बधती आवै सै भिद्द इसकी पिटी नहीं सै
अच्छाई संघर्ष करण लागरी आस घटी नहीं सै
जनता एक दिन जीतैगी उम्मीद छुटी नहीं सै
समतावादी समाज होगा संघर्ष का डंका बजा दिया।।
भारत तैं जुल्मी गोरा सबनै मिलकै भगा दिया।।
3
अमीरां की जात अमीरी म्हारै गरीबी फैहरी भाईयो
विकास पूरा होवण दे ना दुनिया याहे कहरी भाईयो
वैज्ञानिक सोच काट सै इसकी जड़ घणी गहरी भाईयो
जात पात हरियाणे की सै सबतै बड्डी बैरी भाईयो
म्हारी एकता तोड़ण खातर यो जात पात फैला दिया।।
भारत तैं जुल्मी गोरा सबनै मिलकै भगा दिया।।
4
दारू माफिया मुनाफा खोर इनकी पक्की यारी देखो
भ्रष्ट पुलिसिया औछा नेता करता चौड़े गद्दारी देखो
बिचौलिया घणे पैदा होगे म्हारी अक्कल मारी देखो
लाम्बे जन संघर्ष की हमनै करली तैयारी देखो
लिखै रणबीर भगत सिंह नै रास्ता सही दिखा दिया ।।
भारत तैं जुल्मी गोरा मिलकै सबनै भगा दिया।।
भारत तैं जुल्मी गोरा सबनै मिलकै भगा दिया।।