तेरी घणी जरूरत सै हटकै

तेरी घणी जरूरत सै हटकै एकबै आज्या भगत सिंह।।
नौजवान पीढ़ी म्हारी नै राह सही बताज्या भगत सिंह।।
1
यकीन जमा नहीं आन्ता तेईस साल की उम्र तेरी थी
याणी उम्र मैं तमनै मिलकै घाली फिरंगियां कै घेरी थी
असेम्बली मैं बम्ब गेरी थी यो किस्सा सुनाज्या भगत सिंह ।।
नौजवान पीढ़ी म्हारी नै राह सही बताज्या भगत सिंह।।
2
जेल मैं भगत सिंह थामनै किताबां की करी पढ़ाई थी
आजाद भारत किसा हो घणी कामल तस्वीर बनाई थी
फांसी की सजा सुनाई थी कदे देश मैं छाज्या भगत सिंह ।।
नौजवान पीढ़ी म्हारी नै राह सही बताज्या भगत सिंह।।
3
एक दिन पहलम फांसी तै सतलुज के किनारे जला दिए
भारत की जनता के दिल ये घणे कसूते हिला दिए
सरकारों नै थाम भुला दिए इणनै समझाज्या भगत सिंह ।।
नौजवान पीढ़ी म्हारी नै राह सही बताज्या भगत सिंह।।
4
कहै रणबीर बरोने आला हम सपना पूरा करांगे तेरा
शोषण मुक्त समाज बणावां दूर करांगे घोर अँधेरा
चाहया तनै जो नया सबेरा तस्वीर दिखाज्या भगत सिंह ।।
नौजवान पीढ़ी म्हारी नै राह सही बताज्या भगत सिंह।।