बार बार झूठ बोलकै इसनै साच बतावण लागे रै ।।
असली आंकड़े ल्हको कै झूठे दिखावण लागे रै।।
1
सीबीआई पढण बिठाई सुप्रीम कोर्ट दिया घेरे मैं
रिजर्व बैंक कमजोर करया कई चीजां के फेरे मैं
हिन्दू राष्ट्र का देकै नारा धर्म जाल बिछावण लागे रै।।
असली आंकड़े ल्हको कै झूठे दिखावण लागे रै।।
2
किसानी संकट बढ़ता आवै ना कोये ख्याल किसान का
या महंगाई बढ़ती जावै बुरा हाल गरीब इंसान का
धर्मान्धता के नारे लवाकै दंगे करावण लागे रै।।
असली आंकड़े ल्हको कै झूठे दिखावण लागे रै।।
3
बेरोजगारों की लाइन लाम्बी कावड़ ल्याण पै लादी
अंध विश्वास खूब फैलारे विज्ञान की भ्यां बुलादी
आज समाज मैं नफरत जान बूझ बढ़ावण लागे रै।।
असली आंकड़े ल्हको कै झूठे दिखावण लागे रै।।
4
प्यारे हिंदुस्तान की बहुविविधता कोण्या भाती रै
जात धर्म पै बांट कै बण बैठे शासक खुरापाती रै
रणबीर भाईचारे की आवाज उठावण लागे रै ।।
असली आंकड़े ल्हको कै झूठे दिखावण लागे रै।।
No comments:
Post a Comment