पी वी सिंधु का मैडल पक्का

 पी वी सिंधु का मैडल पक्का 

मार दिया इसनै आज छक्का
ओकिहारा को दिया धक्का
थोड़ा सा दिल नै थाम लियो ।।
बैंडमिंटन मैं रियो मैं खेल दिखाया देखो
फाइनल मैं पहोंच कै मान बढ़ाया देखो
मीडिया न्यों अंदाज लगावै
मैडल पक्का जरूर बतावै
यो देश थारी तरफ लखावै
सिंधु लगा जोर तमाम दियो ।।
जापान की लड़की हरा अपने पैर जमाये
स्पेनी लड़की गेल्याँ पेचे फाइनल मैं बताये
राष्ट्रपति म्हारे नै दी सै बधाई
प्रधानमन्त्री नै करी सै बड़ाई
परिवार नै खूब खुशी मनाई
काल थकन का मत नाम लियो ।।
रात नै सोईये सिंधु थकान बी तार लिए
काल कौनसे गुर लाने कर विचार लिए
पूरे दम खम तैं खेलिए सिंधु
वार स्पेन की के झेलिये सिंधु
नम्बर तो फालतू लेलिए सिंधु
जितना हार का ना नाम लियो ।।
गोल्ड मैडल पै तूँ ध्यान राखिये पूरा हे
एक गोल्ड देश ले ख्याल राखिये पूरा हे
म्हारे देश की छोरी छारी सैं
रणबीर खूब जोर लगारी सैं
बेशक पेट मैं चलैं कटारी सैं
बुलंद कर देश का नाम दियो ।।

सिंधु जिसनै गोल्ड मैडल दिलवाया यो।।

 बैडमिंटन वर्ल्ड चैम्पियनशिप जीत आज इतिहास रचाया यो।।

पहली भारतीय बनीं सिंधु जिसनै गोल्ड मैडल दिलवाया यो।।
1
सिंधु नै ओकुहारा को सीधे गेमां मैं लाकै जोर हराया रै
हांगा लाकै खेली पी वी सिंधु गोल्ड मैडल देश मैं आया रै
इक्कीस सात इक्कीस सात तैं हराकै देश गौरव बढ़ाया यो।।
पहली भारतीय बनीं सिंधु जिनै गोल्ड मैडल दिलवाया यो।।
2
ओकुहारा के खिलाफ यो कैरियर रिकॉर्ड नौ सात करया
स्विट्जरलैंड में पी वी सिंधु नै बैडमिंटन मैं इतिहास रचया
नोजोमी ओकुहारा को मात देकै नै खास माहौल बनाया यो।।
पहली भारतीय बनीं सिंधु जिसनै गोल्ड मैडल दिलवाया यो।।
3
वर्ल्ड के स्तर पै  बैडमिंटन मैडल ना कोये बी ल्याया रै
पी वी सिंधु की मेहनत नै रविवार नै यो मैडल पाया रै
शाबाश पी वी सिंधु तनै म्हारी झंडा तिरंगा जितवाया यो।।
पहली भारतीय बनीं सिंधु जिसनै गोल्ड मैडल दिलवाया यो।।
4
यो मुकाबला अड़तीस मिनट चल्या पसीनम पसीन्यां होई
दो सौ सतरा की हार का बदला लेकै याद वा पुरानी धोई
बढ़त बना कै पहले खेल मैं रणबीर  आगै कदम उठाया यो ।।
पहली भारतीय बनीं सिंधु जिसनै गोल्ड मैडल दिलवाया यो।।

हिंदुस्तान और हैदराबाद

पीवी सिंधू की जीत पर एक रागनी:----
हिंदुस्तान और हैदराबाद का नाम इस दुनिया मैं लिखवाया सै।।
सिंधु जीतकै टोक्यो मैं मैडल अपने देश का नाम चमकाया सै।।
1
नगर घर गाम सारे तनै देवण लागरे बहोत घणी बधाई आज
थारे कोच की और थारी लग्न गजब का या रंग  ल्याई आज
पूरे घर और परिवार नै भी थारा होंसला खूब बढ़ाया सै।।
सिंधु जीतकै टोक्यो मैं मैडल अपने देश का नाम चमकाया सै।।
2
आंध्रप्रदेश बाट देखरया जीत की पूरी पूरी खुशी
मनाने की
मात पिता नै हुई घणी खुशी दूजा गोल्ड मैडल ल्याने की
कश्मीर तैं कन्याकुमारी ताहिं देश जीत पै खुशी मनाता पाया सै।।
सिंधु जीतकै टोक्यो मैं मैडल अपने देश का नाम चमकाया सै।।
3
खेल मैदान मैं चौकसी पूरी हिम्मत करती चली गई फेर
एक एक प्वाइंट जीत कै कदम आगै धरती चली
गई फेर
दूसरे ऑलम्पिक मैडल का यो रेकॉर्ड थामनै बनाया सै।।
सिंधु जीतकै टोक्यो मैं मैडल अपने देश का नाम चमकाया सै।।
4
बढ़ो हमेशा आगै सिंधु बेटी थाम मुड़कै कदे लखाईयो ना
मुश्किलों का करियो सामना कदम पाछे नै हटाईयो ना
रणबीर बरौने आले नै थारी श्यान मैं यो छंद बनाया सै।।
सिंधु जीतकै टोक्यो मैं मैडल अपने देश का नाम चमकाया सै।।